ਲੰਡਨ, 13 ਨਵੰਬਰ (ਪੋਸਟ ਬਿਊਰੋ)- ਬ੍ਰਿਟੇਨ ਵਿਚ ਪਾਰਲੀਮੈਂਟ ਚੋਣਾਂ ਨੇੜੇ ਆਉਣ ਤੋਂ ਪਹਿਲਾਂ ਦੇ ਚਾਰ ਸਾਲਾਂ ਵਿਚ ਨੌਕਰੀਆਂ ਵਿਚ ਸਭ ਤੋਂ ਭਾਰੀ ਕਟੌਤੀ ਹੋਈ ਹੈ। ਅੰਕੜਿਆਂ ਮੁਤਾਬਕ ਜੁਲਾਈ-ਸਤੰਬਰ ਦੀ ਤਿਮਾਹੀ ਵਿਚ 58 ਹਜ਼ਾਰ ਲੋਕਾਂ ਦੀ ਨੌਕਰੀ ਚਲੀ ਗਈ ਹੈ। ਬੇਰੁਜ਼ਗਾਰੀ ਦਰ 1975 ਦੇ ਬਾਅਦ ਤੋਂ ਸਭ ਤੋਂ ਹੇਠਲੇ ਪੱਧਰ 3.8 ਫੀਸਦੀ ਉੱਤੇ ਚਲੀ ਗਈ। ਨੌਕਰੀਆਂ ਵਿਚ ਕਟੌਤੀ ਅਰਥ ਸ਼ਾਸਤਰੀਆਂ ਦੇ ਅਨੁਮਾਨ ਤੋਂ ਹਾਲੇ ਘੱਟ ਹੋਈ ਹੈ।
ਬ੍ਰੈਗਜ਼ਿਟ (ਯੂਰਪੀ ਯੂਨੀਅਨ ਤੋਂ ਬ੍ਰਿਟੇਨ ਦਾ ਨਿਕਲਣਾ) ਵਾਲੇ ਅੜਿੱਕੇ ਨੂੰ ਖਤਮ ਕਰਨ ਦੀ ਸੋਚ ਦੇ ਨਾਲ ਪ੍ਰਧਾਨ ਮੰਤਰੀ ਬੋਰਿਸ ਜੌਨਸਨ ਨੇ 12 ਦਸੰਬਰ ਨੂੰ ਚੋਣਾਂ ਕਰਾਉਣ ਦਾ ਐਲਾਨ ਕੀਤਾ ਹੈ। ਇਸ ਦੌਰਾਨ ਨੌਕਰੀਆਂ ਵਿਚ ਕਟੌਤੀ ਮੁਸੀਬਤ ਖੜ੍ਹੀ ਕਰ ਸਕਦੀ ਹੈ। ਕੰਪਨੀ ਮਾਲਕਾਂ ਦਾ ਕਹਿਣਾ ਹੈ ਕਿ ਬੋਰਿਸ ਜੌਨਸਨ ਦੇ ਜਿੱਤਣ ਦੇ ਬਾਅਦ ਵੀ ਨੌਕਰੀਆਂ ਵਿਚ ਕਟੌਤੀ ਜਾਰੀ ਰਹਿ ਸਕਦੀ ਹੈ। ਇਸ ਲਈ ਪ੍ਰਧਾਨ ਮੰਤਰੀ ਨੂੰ 2020 ਦੀ ਤੈਅ ਸੀਮਾ ਤੋਂ ਪਹਿਲਾਂ ਯੂਰਪੀ ਯੂਨੀਅਨ ਦੇ ਨਾਲ ਨਵੇਂ ਵਪਾਰ ਸਮਝੌਤੇ ਨੂੰ ਆਖਰੀ ਰੂਪ ਦੇਣਾ ਹੋਵੇਗਾ।
ਐੱਚ ਐੱਸ ਬੀ ਬੀ ਦੇ ਅਰਥ ਸ਼ਾਸਤਰੀ ਕ੍ਰਿਸ ਹੈਰੇ ਨੇ ਕਿਹਾ, ‘ਮੰਨ ਲੈਂਦੇ ਹਾਂ ਕਿ ਰੋਜ਼ਗਾਰ ਦੇ ਅੰਕੜੇ ਅਸਥਿਰ ਹੋ ਸਕਦੇ ਹਨ। ਨੌਕਰੀਆਂ ਦੀ ਇਹ ਗਿਰਾਵਟ ਪਾਰਟ ਟਾਈਮ ਰੋਜ਼ਗਾਰ ਦੀ ਹੋ ਸਕਦੀ ਹੈ।` ਵਰਨਣ ਯੋਗ ਹੈ ਕਿ ਨੌਕਰੀਆਂ ਵਿਚ ਕਟੌਤੀ ਪਿੱਚੋਂ ਬੈਂਕ ਆਫ ਇੰਗਲੈਂਡ ਨੇ ਵਿਆਜ਼ ਦਰਾਂ ਘਟਾ ਦਿੱਤੀਆਂ ਹਨ। ਉਂਜ ਅਰਥ ਸ਼ਾਸਤਰੀਆਂ ਦਾ ਇਸ ਮੌਕੇ ਕਰੀਬ 94 ਹਜ਼ਾਰ ਲੋਕਾਂ ਦੀ ਨੌਕਰੀ ਜਾਣ ਦਾ ਅਨੁਮਾਨ ਸੀ, ਪਰ ਕਰੀਬ 58 ਹਜ਼ਾਰ ਲੋਕਾਂ ਦੀ ਨੌਕਰੀ ਹੀ ਗਈ ਹੈ। ਅੰਕੜਿਆਂ ਮੁਤਾਬਕ ਕੁੱਲ ਤੇ ਮੂਲ ਆਮਦਨ ਵਿਚ 3.6 ਫੀਸਦੀ ਦਾ ਮਾਮੂਲੀ ਵਾਧਾ ਹੋਇਆ ਹੈ, ਜੋ ਅਨੁਮਾਨ ਤੋਂ ਕਾਫੀ ਘੱਟ ਹੈ। ਬ੍ਰਿਟੇਨ ਦੀ ਅਰਥ ਵਿਵਸਥਾ ਵਿਚ ਵਾਧਾ ਇਸ ਸਾਲ ਸਤੰਬਰ ਤੱਕ ਮਸਾਂ 1 ਫੀਸਦੀ ਰਿਹਾ, ਜੋ ਪੂਰੇ ਦਹਾਕੇ ਵਿਚ ਸਭ ਤੋਂ ਘੱਟ ਹੈ। ਮਾਹਰ ਇਸ ਨੂੰ ਅਮਰੀਕਾ, ਚੀਨ ਦੇ ਤਣਾਅ ਦਾ ਅਸਰ ਮੰਨਦੇ ਹਨ।