ਓਨਟਾਰੀਓ, 1 ਅਕਤੂਬਰ (ਪੋਸਟ ਬਿਊਰੋ) : ਲਿਬਰਲ ਆਗੂ ਜਸਟਿਨ ਟਰੂਡੋ ਵੱਲੋਂ ਲਗਾਤਾਰ ਪ੍ਰੋਵਿੰਸ਼ੀਅਲ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਸਰਕਾਰ ਨੂੰ ਆਪਣਾ ਨਿਸ਼ਾਨਾ ਬਣਾਏ ਜਾਣ ਕਾਰਨ ਪ੍ਰੀਮੀਅਰ ਡੱਗ ਫੋਰਡ ਨੂੰ ਬਹੁਤ ਪਰੇਸ਼ਾਨੀ ਹੋ ਰਹੀ ਹੈ ਤੇ ਵਾਰੀ ਵਾਰੀ ਉਨ੍ਹਾਂ ਦਾ ਜੀਅ ਟਰੂਡੋ ਨੂੰ ਮੂੰਹ ਤੋੜ ਜਵਾਬ ਦੇਣ ਲਈ ਵੀ ਕਰਦਾ ਹੈ ਪਰ ਉਹ ਚੁੱਪ ਵੱਟੀ ਬੈਠੇ ਹਨ।
ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਨੂੰ ਨੁਕਸਾਨ ਨਾ ਪਹੁੰਚੇ ਇਸ ਕਾਰਨ ਫੋਰਡ ਕਿਸੇ ਤਰ੍ਹਾਂ ਦੜ ਵੱਟ ਰਹੇ ਹਨ। ਪਰ ਪ੍ਰਾਈਵੇਟ ਤੌਰ ਉੱਤੇ ਉਹ ਇਹ ਖੁਲਾਸਾ ਕਰ ਚੁੱਕੇ ਹਨ ਕਿ ਉਹ ਟਰੂਡੋ ਵੱਲੋਂ ਰੋਜ਼ਾਨਾ ਉਨ੍ਹਾਂ ਦੀ ਸਰਕਾਰ ਉੱਤੇ ਚਿੱਕੜ ਉਛਾਲੇ ਜਾਣ ਤੋਂ ਉਹ ਅੱਕ ਚੁੱਕੇ ਹਨ। ਆਪਣੇ ਵੱਲੋਂ ਜਨਤਕ ਤੌਰ ਉੱਤੇ ਕੀਤੀਆਂ ਗਈਆਂ ਕੁੱਝ ਟਿੱਪਣੀਆਂ ਵਿੱਚ ਪ੍ਰੀਮੀਅਰ ਵੱਲੋਂ ਇਹ ਦਰਸਾਇਆ ਜਾ ਰਿਹਾ ਹੈ ਕਿ ਉਹ ਸਿਰਫ ਆਪਣੀ ਸਰਕਾਰ ਚਲਾਉਣ ਵੱਲ ਧਿਆਨ ਦੇ ਰਹੇ ਹਨ ਜਦਕਿ ਟਰੂਡੋ ਕੈਂਪੇਨਿੰਗ ਵਿੱਚ ਲੱਗੇ ਹੋਏ ਹਨ।
ਪਰ ਫੋਰਡ ਦੇ ਨਜ਼ਦੀਕੀਆਂ ਦਾ ਕਹਿਣਾ ਹੈ ਕਿ ਟਰੂਡੋ ਵੱਲੋਂ ਉਨ੍ਹਾਂ ਉੱਤੇ ਝਾੜੇ ਜਾ ਰਹੇ ਨਜ਼ਲੇ ਤੋਂ ਉਹ ਉੱਕਾ ਹੀ ਖੁਸ਼ ਨਹੀਂ ਹਨ। ਇੱਥੇ ਦੱਸਣਾ ਬਣਦਾ ਹੈ ਕਿ ਟਰੂਡੋ ਸਿੱਖਿਆ, ਸਿਹਤ, ਨਿਆਂ ਤੇ ਇਨਫਰਾਸਟ੍ਰਕਚਰ ਫੰਡਿੰਗ ਵਰਗੇ ਮੁੱਦਿਆਂ ਉੱਤੇ ਫੋਰਡ ਉੱਤੇ ਤਣਜ ਕੱਸਣ ਤੋਂ ਬਾਜ਼ ਨਹੀਂ ਆ ਰਹੇ। ਫੋਰਡ ਦੇ ਨਜ਼ਦੀਕੀਆਂ ਦਾ ਕਹਿਣਾ ਹੈ ਕਿ ਕਿਸੇ ਦੀ ਗੱਲ ਸੁਣ ਕੇ ਚੁੱਪ ਵੱਟਣਾ ਫੋਰਡ ਦੀ ਆਦਤ ਵਿੱਚ ਸ਼ੁਮਾਰ ਨਹੀਂ ਹੈ।