ਟੋਰਾਂਟੋ, (ਡਾ. ਝੰਡ) -ਬੀਤੇ ਐਤਵਾਰ 22 ਸਤੰਬਰ ਨੂੰ ਟੋਰਾਂਟੋ ਬੀਚ ਏਰੀਏ ਦੇ ਟੌਮੀ ਥੌਂਪਸਨ ਪਾਰਕ ਵਿਚ ਹੋਈ 'ਮੈੱਕ ਟੋਰਾਂਟੋ ਰੇਸ' ਵਿਚ ਮੈਰਾਥਨ ਰੱਨਰ ਸੰਜੂ ਗੁਪਤਾ ਲੱਗਭੱਗ ਦੋ ਮਹੀਨੇ ਪਹਿਲਾਂ ਸੱਜੇ ਗਿੱਟੇ ਵਿਚ ਆਈ ਚੋਟ ਕਾਰਨ ਕੇਵਲ 5 ਕਿਲੋਮੀਟਰ ਵਾੱਕ ਵਿਚ ਹੀ ਭਾਗ ਲੈ ਸਕੇ, ਹਾਲਾਂਕਿ ਉਨ੍ਹਾਂ ਨੇ ਇਸ ਈਵੈਂਟ ਲਈ ਆਪਣੀ ਰਜਿਸਟ੍ਰੇਸ਼ਨ ਹਾਫ਼-ਮੈਰਾਥਨ ਲਈ ਕਰਵਾਈ ਹੋਈ ਸੀ। ਜਿ਼ਕਰਯੋਗ ਹੈ ਕਿ ਇਸ ਰੇਸ ਈਵੈਂਟ ਵਿਚ ਹਾਫ਼ ਮੈਰਾਥਨ, 10 ਕਿਲੋਮੀਟਰ ਅਤੇ 5 ਕਿਲੋਮੀਟਰ ਦੌੜਾਂ ਸ਼ਾਮਲ ਹੁੰਦੀਆਂ ਹਨ।
ਸੰਜੂ ਗੁਪਤਾ ਨੇ ਇਸ ਪੱਤਰਕਾਰ ਨੂੰ ਫ਼ੋਨ 'ਤੇ ਹੋਈ ਗੱਲਬਾਤ ਵਿਚ ਦੱਸਿਆ ਕਿ ਉਨ੍ਹਾਂ ਨੇ ਇਸ ਈਵੈਂਟ ਲਈ ਆਪਣੀ ਰਜਿਸਟ੍ਰੇਸ਼ਨ ਤਿੰਨ ਮਹੀਨੇ ਪਹਿਲਾਂ ਹਾਫ਼ ਮੈਰਾਥਨ ਲਈ ਕਰਵਾਈ ਸੀ ਪਰ ਦੋ ਕੁ ਮਹੀਨੇ ਸੱਜੇ ਗਿੱਟੇ 'ਤੇ ਆਈ ਮੋਚ ਕਾਰਨ ਉਹ ਇਸ ਲੰਮੀ ਦੌੜ ਵਿਚ ਭਾਗ ਲੈਣ ਲਈ ਫਿੱਟ ਨਹੀਂ ਸਨ ਅਤੇ ਉਨ੍ਹਾਂ ਨੇ ਆਪਣੀ ਰਜਿਸਟ੍ਰੇਸਨ਼ 5 ਕਿਲੋਮੀਟਰ ਵਾੱਕ ਲਈ ਬਦਲਵਾ ਲਈ ਜਿਸ ਨੂੰ ਉਨ੍ਹਾਂ ਨੇ 49 ਮਿੰਟ 30 ਸਕਿੰਟ ਵਿਚ ਆਰਾਮ ਨਾਲ ਪੂਰਾ ਕਰ ਲਿਆ। ਭਾਵੇਂ ਉਹ ਉਸ ਸਮੇਂ ਆਪਣੇ ਆਪ ਨੂੰ ਕਾਫ਼ੀ ਠੀਕ ਮਹਿਸੂਸ ਕਰ ਰਹੇ ਸਨ ਪਰ ਫਿਰ ਵੀ ਆਪਣੇ ਡਾਕਟਰ ਦੀ ਹਦਾਇਤ ਅਨੁਸਾਰ ਲੰਮੀ ਦੌੜ ਲਈ ਰਿਸਕ ਨਹੀਂ ਲੈਣਾ ਚਾਹੁੰਦੇ ਸਨ।
ਉਨ੍ਹਾਂ ਹੋਰ ਦੱਸਿਆ ਕਿ 20 ਅਕਤੂਬਰ ਨੂੰ ਹੋਣ ਵਾਲੀ ਸਕੋਸ਼ੀਆ ਵਾਟਰਫ਼ਰੰਟ ਮੈਰਾਥਨ ਵਿਚ ਵੀ ਉਨ੍ਹਾਂ ਨੇ ਰਜਿਸ਼ਟ੍ਰੇਸ਼ਨ ਤਾਂ ਹਾਫ਼਼ ਮੈਰਾਥਨ ਲਈ ਹੀ ਕਰਵਾਈ ਹੈ ਪਰ ਹੋ ਸਕਦਾ ਹੈ ਕਿ ਉਹ 5 ਕਿਲੋਮੀਟਰ ਦੌੜ ਵਿਚ ਹੀ ਭਾਗ ਲੈ ਸਕਣ, ਕਿਉਂੁਕਿ ਡਾਕਟਰ ਸਾਹਿਬ ਨੇ ਉਨ੍ਹਾਂ ਨੂੰ ਅਜੇ ਕੁਝ ਹੋਰ ਮਹੀਨਿਆਂ ਲਈ ਲੰਮੀ ਦੌੜ ਲਈ ਮਨ੍ਹਾਂ ਕੀਤਾ ਹੋਇਆ ਹੈ।