ਓਨਟਾਰੀਓ, 25 ਅਪਰੈਲ (ਪੋਸਟ ਬਿਊਰੋ) : ਵੀਰਵਾਰ ਨੂੰ ਓਨਟਾਰੀਓ ਵਿਧਾਨਸਭਾ ਵਿੱਚ ਕੈਫੀਯੇਹ ਉਤਾਰਨ ਲਈ ਆਖੇ ਜਾਣ ਤੋਂ ਬਾਅਦ ਵੀ ਇਸ ਹੁਕਮ ਨੂੰ ਨਾ ਮੰਨਣ ਕਾਰਨ ਆਜ਼ਾਦ ਐਮਪੀਪੀ ਸਾਰਾਹ ਜਾਮਾ ਨੂੰ ਵਿਧਾਨਸਭਾ ਤੋਂ ਬਾਹਰ ਜਾਣ ਲਈ ਆਖਿਆ ਗਿਆ।
ਜਿ਼ਕਰਯੋਗ ਹੈ ਕਿ ਹਾਊਸ ਦੇ ਸਪੀਕਰ ਟੈੱਡ ਆਰਨੌਟ ਨੇ ਰਵਾਇਤੀ ਫਲਸਤੀਨੀ ਸਕਾਰਫ ਕੈਫੀਯੇਹ ਵਿਧਾਨਸਭਾ ਵਿੱਚ ਪਾਉਣ ਉੱਤੇ ਪਾਬੰਦੀ ਲਗਾਈ ਹੋਈ ਹੈ। ਉਨ੍ਹਾਂ ਵੱਲੋਂ ਇਸ ਲਈ ਇਹ ਤਰਕ ਦਿੱਤਾ ਗਿਆ ਸੀ ਕਿ ਕੈਫੀਯੇਹ ਸਿਆਸੀ ਸਟੇਟਮੈਂਟ ਦੇਣ ਲਈ ਪਾਏ ਜਾਂਦੇ ਹਨ। ਪਿਛਲੇ ਸਾਲ ਐਨਡੀਪੀ ਕਾਕਸ ਤੋਂ ਬਾਹਰ ਕੀਤੇ ਜਾਣ ਤੋਂ ਬਾਅਦ ਜਾਮਾ ਹੈਮਿਲਟਨ-ਸੈਂਟਰ ਤੋਂ ਆਜ਼ਾਦ ਮੈਂਬਰ ਵਜੋਂ ਵਿਧਾਨਸਭਾ ਵਿੱਚ ਬੈਠਦੀ ਹੈ। ਇਸ ਤੋਂ ਬਾਅਦ ਉਸ ਨੂੰ ਵਿਧਾਨਸਭਾ ਦੇ ਮਾਮਲਿਆਂ ਵਿੱਚ ਵੋਟ ਪਾਉਣ ਜਾਂ ਕਿਸੇ ਵੀ ਕਮੇਟੀ ਜਾਂ ਪੇਸ਼ ਕੀਤੇ ਜਾਣ ਵਾਲੇ ਮਤੇ ਵਿੱਚ ਹਿੱਸਾ ਲੈਣ ਦਾ ਹੱਕ ਨਹੀਂ ਹੈ।
ਆਰਨੌਟ ਨੇ ਆਖਿਆ ਕਿ ਜੇ ਉਹ ਕੈਫੀਯੇਹ ਨਹੀਂ ਹਟਾ ਸਕਦੀ ਤਾਂ ਵਿਧਾਨਸਭਾ ਤੋਂ ਬਾਹਰ ਚਲੀ ਜਾਵੇ। ਜਾਮਾ ਨੇ ਇਸ ਗੱਲ ਵੱਲ ਕੋਈ ਧਿਆਨ ਨਹੀਂ ਦਿੱਤਾ। ਕਲਰਕ ਤੇ ਸਾਰਜੈਂਟ ਐਟ ਆਰਮਜ਼ ਦੋਵਾਂ ਨੇ ਜਾਮਾ ਨਾਲ ਗੱਲ ਕੀਤੀ ਪਰ ਕਿਸੇ ਨੇ ਉਸ ਨੂੰ ਜਬਰੀ ਬਾਹਰ ਨਹੀਂ ਕੱਢਿਆ। ਆਰਨੌਟ ਨੇ ਬਾਅਦ ਵਿੱਚ ਆਖਿਆ ਕਿ ਉਹ ਐਨੀ ਹੱਦ ਤੱਕ ਨਹੀਂ ਜਾਣਾ ਚਾਹੁੰਦੇ। ਇਸ ਹਫਤੇ ਵਿੱਚ ਜਾਮਾ ਨੇ ਦੂਜੀ ਵਾਰੀ ਵਿਧਾਨਸਭਾ ਵਿੱਚ ਸਕਾਰਫ ਪਾਇਆ ਤੇ ਉਸ ਨੇ ਆਖਿਆ ਕਿ ਉਹ ਇਹ ਪਾਉਣਾ ਜਾਰੀ ਰੱਖੇਗੀ ਤੇ ਲੋਕਾਂ ਨੂੰ ਇਹ ਚੇਤੇ ਕਰਵਾਉਂਦੀ ਰਹੇਗੀ ਕਿ ਇਹ ਸੱਭਿਆਚਾਰਕ ਕੱਪੜਾ ਹੈ।