ਸਸਕੈਚਵਨ, 13 ਅਗਸਤ (ਪੋਸਟ ਬਿਊਰੋ) : ਸਸਕੈਚਵਨ ਦੇ ਉੱਤਰੀ ਹਿੱਸੇ ਵਿੱਚ 70 ਸਾਲਾ ਮਹਿਲਾ ਨੂੰ ਕੋਕੀਨ ਰੱਖਣ ਦੇ ਸਬੰਧ ਵਿੱਚ ਚਾਰਜ ਕੀਤਾ ਗਿਆ ਹੈ। ਇਹ ਜਾਣਕਾਰੀ ਆਰਸੀਐਮਪੀ ਦੇ ਅਧਿਕਾਰੀਆਂ ਵੱਲੋਂ ਦਿੱਤੀ ਗਈ।
ਪਿਛਲੇ ਹਫਤੇ ਗ੍ਰੀਨ ਲੇਕ ਤੇ ਮੀਡੋਅ ਲੇਕ ਵਿਖੇ ਸਸਕੈਚਵਨ ਦੇ ਆਰਸੀਐਮਪੀ ਅਧਿਕਾਰੀਆਂ ਵੱਲੋਂ ਨੌਰਥ ਬੈਟਲਫੋਰਡ ਪੁਲਿਸ ਦੀ ਡੌਗ ਯੂਨਿਟ ਦੀ ਮਦਦ ਨਾਲ ਗ੍ਰੀਨ ਲੇਕ, ਸਸਕੈਚਵਨ ਸਥਿਤ ਇੱਕ ਘਰ ਦੀ ਤਲਾਸ਼ੀ ਲਈ ਗਈ। ਪੁਲਿਸ ਨੇ ਇਹ ਨਹੀਂ ਦੱਸਿਆ ਕਿ ਕਿੰਨੀ ਕੋਕੀਨ ਫੜ੍ਹੀ ਗਈ ਪਰ ਪੁਲਿਸ ਨੇ ਇਹ ਜ਼ਰੂਰ ਦੱਸਿਆ ਕਿ ਇਸ ਦੌਰਾਨ ਇੱਕ ਔਰਤ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
70 ਸਾਲਾ ਰੀਟਾ ਸਿੰਕਲੇਅਰ ਨੂੰ ਸਮਗਲਿੰਗ ਦੇ ਇਰਾਦੇ ਨਾਲ ਕੋਕੀਨ ਰੱਖਣ ਲਈ ਚਾਰਜ ਕੀਤਾ ਗਿਆ। ਉਸ ਨੂੰ ਹਿਰਾਸਤ ਵਿੱਚੋਂ ਰਿਹਾਅ ਕਰ ਦਿੱਤਾ ਗਿਆ ਤੇ ਪਹਿਲੀ ਵਾਰੀ 16 ਸਤੰਬਰ ਨੂੰ ਉਸ ਨੂੰ ਮੀਡੋਅ ਲੇਕ ਪ੍ਰੋਵਿੰਸ਼ੀਅਲ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।