ਟੋਰਾਂਟੋ, 11 ਅਗਸਤ (ਪੋਸਟ ਬਿਊਰੋ) : ਸੈਰੇਨਾ ਵਿਲੀਅਮਜ਼ ਨੂੰ ਹਰਾਉਣ ਤੋਂ ਬਾਅਦ ਰੌਜਰਜ਼ ਕੱਪ ਜਿੱਤਣ ਵਾਲੀ ਬਿਆਂਕਾ ਐਂਡਰੀਸਕੂ ਪਹਿਲੀ ਕੈਨੇਡੀਅਨ ਬਣ ਗਈ ਹੈ। ਪਿਛਲੇ 50 ਸਾਲਾਂ ਵਿੱਚ ਐਂਡਰੀਸਕੂ ਪਹਿਲੀ ਕੈਨੇਡੀਅਨ ਹੈ ਜਿਸ ਨੇ ਇਹ ਟੂਰਨਾਮੈਂਟ ਆਪਣੇ ਨਾਂ ਕੀਤਾ ਹੈ।
ਜਿਵੇਂ ਹੀ ਐਂਡਰੀਸਕੂ ਨੂੰ ਇਹ ਪਤਾ ਲੱਗਿਆ ਕਿ ਸੈਰੇਨਾ ਵਿਲੀਅਮਜ਼ ਰੌਜਰਜ਼ ਕੱਪ ਦੇ ਇਸ ਮੈਚ ਨੂੰ ਵਿਚਾਲੇ ਹੀ ਛੱਡ ਰਹੀ ਹੈ ਤਾਂ ਉਹ ਤੁਰੰਤ ਆਪਣੀ ਵਿਰੋਧੀ ਖਿਡਾਰਨ ਦੇ ਬੈਂਚ ਕੋਲ ਗਈ ਤੇ ਉਸ ਨੇ ਆਪਣੀ ਸੀਨੀਅਰ ਟੈਨਿਸ ਖਿਡਾਰਨ ਦੀ ਹੌਸਲਾ ਅਫਜ਼ਾਈ ਕਰਨ ਦੇ ਨਾਲ ਨਾਲ ਉਸ ਨੂੰ ਦਿਲਾਸਾ ਵੀ ਦਿੱਤਾ। ਇਸ ਮੌਕੇ ਐਂਡਰੀਸਕੂ ਨੇ ਆਖਿਆ ਕਿ ਇਸ ਸਮੇਂ ਵਿਲੀਅਮਜ਼ ਜਿਹੋ ਜਿਹਾ ਮਹਿਸੂਸ ਕਰ ਰਹੀ ਹੈ ਉਹ ਉਸ ਬਾਰੇ ਜਾਣਦੀ ਹੈ। ਉਹ ਜਾਣਦੀ ਹੈ ਕਿ ਕਿਸ ਤਰ੍ਹਾਂ ਸੱਟਾਂ ਦੁੱਖ ਦਿੰਦੀਆਂ ਹਨ।
ਮਿਸੀਸਾਗਾ, ਓਨਟਾਰੀਓ ਦੀ ਐਂਡਰੀਸਕੂ ਨੇ ਅਵੀਵਾ ਸੈਂਟਰ ਵਿੱਚ ਖੇਡੇ ਜਾ ਰਹੇ ਇਸ ਮੈਚ ਦੇ ਪਹਿਲੇ ਸੈੱਟ ਵਿੱਚ 3-1 ਨਾਲ ਲੀਡ ਲੈ ਲਈ ਸੀ ਜਦੋਂ ਵਿਲੀਅਮਜ਼ ਨੂੰ ਮੈਡੀਲਕ ਸਹਾਇਤਾ ਲਈ ਥੋੜ੍ਹਾ ਸਮਾਂ ਖੇਡ ਰੁਕਵਾਉਣੀ ਪਈ। ਪਰ ਇੱਕ ਮਿੰਟ ਬਾਅਦ ਹੀ ਚੇਅਰ ਅੰਪਾਇਰ ਨੇ ਇਹ ਐਲਾਨ ਕੀਤਾ ਕਿ ਵਿਲੀਅਮਜ਼ ਨੂੰ ਸਿਹਤ ਠੀਕ ਨਾ ਹੋਣ ਕਾਰਨ ਮੈਚ ਵਿਚਾਲੇ ਹੀ ਛੱਡਣਾ ਪੈ ਰਿਹਾ ਹੈ। ਇਹ ਮੈਚ ਜਿੱਤਣ ਨਾਲ ਐਂਡਰੀਸਕੂ ਨੂੰ ਸੀਜ਼ਨ ਦਾ ਦੂਜਾ ਡਬਲਿਊਟੀਏ ਪ੍ਰੀਮੀਅਰ ਟਾਈਟਲ ਵੀ ਹਾਸਲ ਹੋ ਗਿਆ ਹੈ।
1969 ਵਿੱਚ ਵੈਨਕੂਵਰ ਦੇ ਵਿੱਕੀ ਬਰਨਰ ਨੂੰ ਹਰਾ ਕੇ ਵਿੰਡਸਰ, ਓਨਟਾਰੀਓ ਦੇ ਫਾਯੇ ਅਰਬਨ ਨੇ ਇਹ ਖਿਤਾਬ ਜਿੱਤਿਆ ਸੀ। ਉਸ ਤੋਂ ਬਾਅਦ ਹੁਣ ਇਸ ਖਿਤਾਬ ਉੱਤੇ ਕਬਜਾ ਜਮਾਉਣ ਵਾਲੀ ਐਂਡਰੀਸਕੂ ਪਹਿਲੀ ਕੈਨੇਡੀਅਨ ਬਣ ਗਈ ਹੈ। ਇਸ ਮੌਕੇ ਐਂਡਰੀਸਕੂ ਨੇ ਆਖਿਆ ਕਿ ਉਹ ਇਸ ਤਰ੍ਹਾਂ ਨਹੀਂ ਸੀ ਜਿੱਤਣਾ ਚਾਹੁੰਦੀ ਪਰ ਜਿੱਤ ਤਾਂ ਜਿੱਤ ਹੀ ਹੁੰਦੀ ਹੈ। ਇਸ ਲਈ ਉਹ ਖੁਸ਼ ਹੈ।
37 ਸਾਲਾ ਵਿਲੀਅਮਜ਼ ਨੇ 19 ਸਾਲਾ ਐਂਡਰੀਸਕੂ ਦੀ ਸਿਫਤ ਕਰਦਿਆਂ ਆਖਿਆ ਕਿ ਜਿਸ ਤਰ੍ਹਾਂ ਖੇਡ ਵਿਚਾਲੇ ਛੱਡਣ ਤੋਂ ਬਾਅਦ ਉਸ ਨੇ ਆ ਕੇ ਦਿਲਾਸਾ ਦਿੱਤਾ ਉਸ ਤੋਂ ਮਹਿਸੂਸ ਹੋਇਆ ਕਿ ਉਹ ਬਿਹਤਰੀਨ ਖਿਡਾਰਨ ਹੋਣ ਦੇ ਨਾਲ ਨਾਲ ਨੇਕ ਇਨਸਾਨ ਹੈ। ਆਪਣੀ ਉਮਰ ਦੇ ਹਿਸਾਬ ਨਾਲ ਉਹ ਜਿ਼ਆਦਾ ਸਿਆਣੀ ਹੈ। ਆਪਣੇ ਸ਼ਬਦਾਂ, ਖੇਡ, ਰਵੱਈਏ ਤੇ ਆਪਣੀ ਕਰਨੀ ਤੋਂ ਉਹ ਬਿਲਕੁਲ ਵੀ 19 ਸਾਲਾਂ ਦੀ ਨਹੀਂ ਲੱਗਦੀ। ਉਸ ਦੀ ਖੇਡ ਐਨੀ ਨਿੱਕੀ ਉਮਰ ਵਿੱਚ ਹੀ ਕਾਫੀ ਸਧੀ ਹੋਈ ਹੈ। ਮਾਰਚ ਵਿੱਚ ਐਂਡਰੀਸਕੂ ਨੇ ਇੰਡੀਅਨ ਵੈੱਲਜ਼ ਮੁਕਾਬਲਾ ਵੀ ਜਿੱਤਿਆ ਸੀ।