ਓਟਵਾ, 7 ਅਗਸਤ (ਪੋਸਟ ਬਿਊਰੋ) : ਇਲੈਕਟ੍ਰਿਕ ਕਾਰਾਂ ਨੂੰ ਸਸਤਾ ਬਣਾਉਣ ਲਈ ਕੈਨੇਡਾ ਸਰਕਾਰ ਵੱਲੋਂ ਦਿੱਤੀ ਜਾਣ ਵਾਲੀ ਛੋਟ ਸਬੰਧੀ ਨਵੇਂ ਪ੍ਰੋਗਰਾਮ ਸਦਕਾ ਇਨ੍ਹਾਂ ਕਾਰਾਂ ਦੀ ਵਿੱਕਰੀ ਵਿੱਚ ਤੇਜ਼ੀ ਆਉਣ ਦੇ ਸੰਕੇਤ ਮਿਲ ਰਹੇ ਹਨ।
ਪਹਿਲੀ ਮਈ ਤੋਂ ਓਟਵਾ ਵੱਲੋਂ ਇਨ੍ਹਾਂ ਇਲੈਕਟ੍ਰਿਕ ਕਾਰਾਂ ਵਿੱਚੋਂ ਕੁੱਝ ਨੂੰ ਖਰੀਦਣ ਉੱਤੇ 5000 ਡਾਲਰ ਦੀ ਛੋਟ ਦੀ ਪੇਸ਼ਕਸ਼ ਸ਼ੁਰੂ ਕੀਤੀ ਗਈ। ਇਹ ਉਪਰਾਲਾ ਘੱਟ ਵਿਕਣ ਵਾਲੇ ਮਾਡਲਜ਼ ਨੂੰ ਗੈਸ ਨਾਲ ਚੱਲਣ ਵਾਲੀਆਂ ਕਾਰਾਂ ਦੀ ਬਰਾਬਰੀ ਉੱਤੇ ਲਿਆਉਣਾ ਸੀ। ਮਾਰਚ ਵਿੱਚ ਐਲਾਨੇ ਬਜਟ ਵਿੱਚ ਓਟਵਾ ਵੱਲੋਂ 2025 ਤੱਕ ਇਨ੍ਹਾਂ ਇਲੈਕਟ੍ਰਿਕ ਗੱਡੀਆਂ ਦੀ ਵਿੱਕਰੀ ਵਿੱਚ 10 ਫੀ ਸਦੀ, 2030 ਤੱਕ 30 ਫੀ ਸਦੀ ਤੇ 2040 ਤੱਕ 100 ਫੀ ਸਦੀ ਵਾਧਾ ਕੀਤੇ ਜਾਣ ਦਾ ਟੀਚਾ ਮਿਥਿਆ ਗਿਆ ਸੀ।
ਪਿਛਲੇ ਸਾਲ ਇਲੈਕਟ੍ਰਿਕ ਤੇ ਪਲੱਗ ਇਨ ਹਾਈਬ੍ਰਿਡ ਕਾਰਾਂ ਦੀ ਰਲਾ ਕੇ ਵਿੱਕਰੀ ਦੋ ਫੀ ਸਦੀ ਹੀ ਰਹੀ ਸੀ। ਟਰਾਂਸਪੋਰਟ ਕੈਨੇਡਾ ਦਾ ਕਹਿਣਾ ਹੈ ਕਿ ਪਹਿਲੀ ਮਈ ਤੋਂ ਲੈ ਕੇ ਹੁਣ ਤੱਕ 14000 ਤੋਂ ਵੀ ਵੱਧ ਇਲੈਕਟ੍ਰਿਕ ਕਾਰਾਂ ਤੇ ਮਿਨੀਵੈਨਜ਼ ਇਸ ਛੋਟ ਤੋਂ ਬਾਅਦ ਤੋਂ ਦੇਸ਼ ਭਰ ਵਿੱਚ ਵਰਤੀਆਂ ਜਾ ਰਹੀਆਂ ਹਨ। ਇਸ ਛੋਟ ਪ੍ਰੋਗਰਾਮ ਦੀ ਨਿਗਰਾਨੀ ਕਰ ਰਹੇ ਡਿਪਾਰਟਮੈਂਟ ਦਾ ਕਹਿਣਾ ਹੈ ਕਿ ਜਨਵਰੀ ਤੋਂ ਜੂਨ ਦਰਮਿਆਨ ਇਨ੍ਹਾਂ ਇਲੈਕਟ੍ਰਿਕ ਗੱਡੀਆਂ ਦੀ ਵਿੱਕਰੀ ਵਿੱਚ ਪਿਛਲੇ ਸਾਲ ਦੇ ਮੁਕਾਬਲੇ 30 ਫੀ ਸਦੀ ਵਾਧਾ ਹੋਇਆ ਹੈ।