ਮਿਸੀਸਾਗਾ, 31 ਜੁਲਾਈ (ਪੋਸਟ ਬਿਊਰੋ)- ਵਿਰਾਸਤ ਆਰਟ ਐਂਡ ਕਲਚਰ ਅਤੇ ਬ੍ਰਾਈਟ ਇੰਟਰਟੇਨਮੈਂਨ ਵੱਲੋਂ ਤ੍ਰਿੰਝਣਾਂ ਤੀਜ ਦਾ ਮੇਲਾ 3 ਅਗਸਤ ਦਿਨ ਸ਼ਨਿਚਰਵਾਰ ਨੂੰ ਮਾਲਟਨ ਦੇ ਗ੍ਰੇਟ ਪੰਜਾਬ ਪਲਾਜਾ ਵਿਚ ਕਰਵਾਇਆ ਜਾ ਰਿਹਾ ਹੈ। ਇਸ ਵਿਚ ਚੋਟੀ ਦੇ ਪੰਜਾਬੀ ਗਾਇਕ, ਜਿਨ੍ਹਾਂ ਵਿਚ ਗੈਰੀ ਸੰਧੂ, ਦਿਲਪ੍ਰੀਤ ਢਿੱਲੋਂ, ਸਿੱਪੀ ਗਿੱਲ, ਜਸ ਬਾਜਵਾ, ਗੁਰਲੇਜ ਅਖਤਰ, ਜਿੰਮੀ ਕਲੇਰ, ਜੱਸੀ ਕੌਰ, ਐਚ ਸਾਬ, ਟਿਮ ਰਾਏਕੋਟੀ, ਬਾਨੀ ਸੰਧੂ ਅਤੇ ਕੁਲਵਿੰਦਰ ਕੈਲੀ ਆਦਿ ਕਲਾਕਾਰ ਸ਼ਾਮਿਲ ਹੋਣ ਜਾ ਰਹੇ ਹਨ। ਇਸ ਦੀ ਟਿਕਟ 10 ਡਾਲਰ ਹੈ, ਜਿਸ ਦੀ ਜਾਣਕਾਰੀ ਸ਼ਰਨ ਕੌਰ ਨਾਲ 647-906-5151 ਨੰਬਰ `ਤੇ ਗੱਲ ਕਰਕੇ ਲਈ ਜਾ ਸਕਦੀ ਹੈ। ਬੀਤੇ ਦਿਨੀਂ ਇਸ ਤ੍ਰਿੰਝਣਾਂ ਤੀਜ ਦੇ ਮੇਲੇ ਦਾ ਪੋਸਟਰ ਇਕ ਵਿਲੱਖਣ ਢੰਗ ਨਾਲ ਜਾਰੀ ਕੀਤਾ ਗਿਆ। ਤ੍ਰਿੰਝਣਾਂ ਤੀਜ ਦਾ ਮੇਲਾ ਕਰਵਾਉਣ ਵਾਲੀਆਂ ਪ੍ਰਬੰਧਕ ਬੀਬੀਆਂ ਵੱਲੋਂ ਬਰੈਂਪਟਨ ਦੇ ਚਿਊਜ਼ੀ ਪਾਰਕ ਵਿਖੇ ਪੀਂਘਾਂ ਪਾਈਆਂ ਗਈਆਂ, ਚਰਖਾ ਕੱਤਿਆ ਗਿਆ ਤੇ ਪੰਜਾਬੀ ਵਿਰਾਸਤ ਨੂੰ ਯਾਦ ਕਰਵਾਉਂਦਾ ਇਕ ਮਹੌਲ ਬਣਾਇਆ ਗਿਆ। ਇਸ ਮਹੌਲ `ਚ ਤ੍ਰਿੰਝਣਾਂ ਤੀਜ ਦੇ ਮੇਲੇ ਦਾ ਪੋਸਟਰ ਜਾਰੀ ਕੀਤਾ ਗਿਆ। ਇਸ ਪੋਸਟਰ ਨੂੰ ਜਾਰੀ ਕਰਨ ਮੌਕੇ ਪੀਂਘਾਂ ਝੂਟਦੀਆਂ, ਚਰਖਾ ਕੱਤਦੀਆਂ ਤੇ ਪੰਜਾਬੀ ਪਹਿਰਾਵੇ ਵਿਚ ਸਜੀਆਂ ਪੰਜਾਬੀ ਮੁਟਿਆਰਾਂ ਦੀਆਂ ਤਸਵੀਰਾਂ ਅੱਜ ਕੱਲ੍ਹ ਕਾਫੀ ਚਰਚਿਤ ਹੋ ਰਹੀਆਂ ਹਨ।