ਰੈਕਸਡੇਲ, (ਡਾ. ਝੰਡ) -ਸਿੱਖ ਸਪਿਰਿਚੂਅਲ ਸੈਂਟਰ ਰੈਕਸਡੇਲ ਵਿਚ ਚੱਲ ਰਹੀ ਗੁਰੂ ਨਾਨਕ ਅਕੈਡਮੀ ਵਿਚ ਬੀਤੇ ਦਿਨੀਂ ਬੱਚਿਆਂ ਦੇ ਭਾਸ਼ਨ ਮੁਕਾਬਲੇ ਕਰਵਾਏ ਗਏ। ਗੁਰੂ ਨਾਨਕ ਦੇਵ ਜੀ ਦੇ 550'ਵੇਂ ਪ੍ਰਕਾਸ-ਉਤਸਵ ਨੂੰ ਸਮੱਰਪਿਤ ਇਨ੍ਹਾਂ ਮੁਕਾਬਲਿਆਂ ਵਿਚ ਸਾਰੇ ਵਰਗਾਂ ਦੇ ਬੱਚਿਆਂ ਨੂੰ ਗੁਰਨਕ ਦੇਵ ਜੀ ਨਾਲ ਸਬੰਧਿਤ ਵਿਸ਼ੇ ਹੀ ਦਿੱਤੇ ਗਏ। ਪਹਿਲੇ ਗਰੁੱਪ ਦੇ 4-6 ਸਾਲ ਦੇ ਬੱਚਿਆਂ ਨੇ ਗੁਰੂ ਨਾਨਕ ਦੇਵ ਜੀ ਦੇ ਉਦੇਸ਼ ਅਤੇ ਸਿੱਖੀ ਦੇ ਮੂਲ ਸਿਧਾਂਤਾਂ ਬਾਰੇ ਬੋਲਣਾ ਸੀ ਅਤੇ ਇਸ ਗਰੁੱਪ ਵਿਚ ਗੁਰਲੀਨ ਕੌਰ ਪਹਿਲੇ ਸਥਾਨ, ਹਰਨੂਰ ਕੌਰ ਦੂਸਰੇ ਅਤੇ ਅਭੀਰੂਪ ਕੌਰ ਤੀਸਰੇ ਸਥਾਨ 'ਤੇ ਰਹੀਆਂ। ਦੂਸਰੇ ਗਰੁੱਪ ਦੇ 7-9 ਸਾਲ ਦੇ ਬੱਚਿਆਂ ਦੇ ਬੋਲਣ ਦਾ ਵਿਸ਼ਾ ਸੀ "ਸੋ ਕਿਉ ਮੰਦਾ ਆਖੀਐ ਜਿਤੁ ਜੰਮੈ ਰਾਜਾਨ" ਅਤੇ ਇਸ ਵਿਚ ਗੋਵਿੰਦਪ੍ਰੀਤ ਸਿੰਘ ਪਹਿਲੇ, ਅਸ਼ਨੀਰ ਕੌਰ ਦੂਸਰੇ ਅਤੇ ਗੁਨੀਤ ਕੌਰ ਤੀਸਰੇ ਨੰਬਰ 'ਤੇ ਰਹੇ।
ਏਸੇ ਤਰ੍ਹਾਂ 10-12 ਸਾਲ ਦੇ ਤੀਸਰੇ ਗਰੁੱਪ ਦੇ ਬੱਚਿਆਂ ਨੂੰ “ਗੁਰੂ ਨਾਨਕ ਦੇਵ ਜੀ ਦੀਆਂ ਉਦਾਸੀਆਂ” ਦਾ ਵਿਸ਼ਾ ਦਿੱਤਾ ਗਿਆ ਸੀ ਅਤੇ ਇਸ ਵਿਚ ਜੋਤ ਸਰੂਪ ਸਿੰਘ ਪਹਿਲੇ, ਅਰਸ਼ਦੀਪ ਕੌਰ ਦੂਸਰੇ ਅਤੇ ਤੀਸਰੇ ਨੰਬਰ ਲਈ ਹਰਮਨਜੋਤ ਕੌਰ ਤੇ ਹਰਮਨਪ੍ਰੀਤ ਕੌਰ ਵਿਚਕਾਰ ਟਾਈ ਸੀ। ਚੌਥੇ ਗਰੁੱਪ ਵਿਚ 13-15 ਸਾਲ ਦੇ ਬੱਚੇ ਸ਼ਾਮਲ ਸਨ ਜਿਨ੍ਹਾਂ ਨੂੰ "ਗੁਰੂ ਨਾਨਕ ਦੇਵ ਜੀ ਦੀਆਂ ਸਿੱਖਿਆਵਾਂ ਦੀ ਅਜੋਕੇ ਸਮੇਂ ਵਿਚ ਮਹੱਤਤਾ" ਦਾ ਵਿਸ਼ਾ ਦਿੱਤਾ ਗਿਆ ਸੀ। ਇਸ ਵਿਚ ਗੁਰਪ੍ਰਤਾਪ ਸਿੰਘ ਪਹਿਲੇ, ਗੁਰਜਾਨ ਸਿੰਘ ਦੂਸਰੇ ਅਤੇ ਮਹਿਕਰੀਤ ਕੌਰ ਤੀਸਰੇ ਸਥਾਨ 'ਤੇ ਰਹੇ।
ਪੰਜਵਾਂ ਆਖ਼ਰੀ ਗਰੁੱਪ 16 ਸਾਲ ਅਤੇ ਇਸ ਤੋਂ ਵਧੇਰੀ ਉਮਰ ਦੇ ਬੱਚਿਆਂ ਲਈ ਸੀ ਅਤੇ ਇਸ ਦਾ ਵਿਸ਼ਾ ਉੱਪਰ ਵਰਨਣ ਚੌਥੇ ਗਰੁੱਪ ਵਾਲਾ ਹੀ ਸੀ। ਇਸ ਵਿਚ ਮੁਨੀਤ ਕੌਰ ਪਹਿਲੇ ਅਤੇ ਕੰਚਨਦੀਪ ਦੂਸਰੇ ਨੰਬਰ 'ਤ ਰਹੇ। ਇਸ ਤਰ੍ਹਾਂ ਇਨ੍ਹਾਂ ਭਾਸ਼ਨ ਮੁਕਾਬਲਿਆਂ ਵਿਚ ਕੁਲ ਮਿਲਾ ਕੇ 40 ਬੱਚਿਆਂ ਨੇ ਭਾਗ ਲਿਆ। ਜਤਿੰਦਰ ਕੌਰ ਚੱਠਾ, ਹਰਜੋਤ ਕੌਰ, ਗੁਰਦੀਪ ਸਿੰਘ ਨਾਗਰਾ ਅਤੇ ਮੇਜਰ ਸਿੰਘ ਨਾਗਰਾ ਨੇ ਇਨ੍ਹਾਂ ਭਾਸ਼ਨ ਮੁਕਾਬਲਿਆਂ ਵਿਚ ਅਕੈਡਮੀ ਲਈ ਜੱਜਮੈਂਟ ਵਿਚ ਬਹੁਤ ਵਧੀਆ ਤਰੀਕੇ ਨਾਲ ਮਦਦ ਕੀਤੀ। ਭਾਸ਼ਨ ਮੁਕਾਬਲਿਆਂ ਦੇ ਇਸ ਸਮਾਗ਼ਮ ਦੀ ਸਫ਼ਲਤਾ ਦਾ ਸਿਹਰਾ ਅਕੈਡਮੀ ਦੇ ਡਾਇਰੈਕਟਰ ਸ. ਬਲਵੰਤ ਸਿੰਘ, ਪ੍ਰਿੰਸੀਪਲ ਕੰਵਲਪ੍ਰੀਤ ਕੌਰ ਅਤੇ ਮਿਹਨਤੀ ਸਟਾਫ਼ ਨੂੰ ਜਾਂਦਾ ਹੈ।