ਓਟਵਾ, 25 ਜੁਲਾਈ (ਪੋਸਟ ਬਿਊਰੋ) : ਸੁਪਰੀਮ ਕੋਰਟ ਵਿੱਚ ਖਾਲੀ ਹੋਣ ਜਾ ਰਹੇ ਅਹੁਦੇ ਨੂੰ ਭਰਨ ਲਈ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਨਾਮਜਦ ਕੀਤੇ ਗਏ ਕਿਊਬਿਕ ਦੇ ਜੱਜ ਨਿਕੋਲਸ ਕੈਸੀਰਰ ਤੋਂ ਸਵਾਲ ਜਵਾਬ ਕਰਨ ਤੇ ਵਿਚਾਰ ਵਟਾਂਦਰਾ ਕਰਨ ਲਈ ਵੀਰਵਾਰ ਨੂੰ ਐਮਪੀਜ਼ ਤੇ ਸੈਨੇਟਰਜ਼ ਓਟਵਾ ਵਿੱਚ ਇੱਕਠੇ ਹੋਣਗੇ।
ਪਹਿਲੀ ਮੀਟਿੰਗ ਸਵੇਰੇ 11:00 ਵਜੇ ਲਿਬਰਲ ਐਮਪੀ ਐਂਥਨੀ ਹਾਊਸਫਾਦਰ ਦੀ ਅਗਵਾਈ ਵਿੱਚ ਹਾਊਸ ਆਫ ਕਾਮਨਜ਼ ਦੀ ਨਿਆਂ ਕਮੇਟੀ ਦੀ ਹੋਵੇਗੀ। ਇਸ ਵਿੱਚ ਨਿਆਂ ਮੰਤਰੀ ਤੇ ਅਟਾਰਨੀ ਜਨਰਲ ਡੇਵਿਡ ਲੈਮੇਟੀ ਤੇ ਸਾਬਕਾ ਪ੍ਰਧਾਨ ਮੰਤਰੀ ਕਿੰਮ ਕੈਂਪਬੈਲ, ਜੋ ਕਿ ਸੁਪਰੀਮ ਕੋਰਟ ਆਫ ਕੈਨੇਡਾ ਦੀਆਂ ਨਿਆਂਇਕ ਨਿਯੁਕਤੀਆਂ ਸਬੰਧੀ ਆਜ਼ਾਦਾਨਾ ਐਡਵਾਇਜ਼ਰੀ ਬੋਰਡ ਦੀ ਚੇਅਰ ਹੈ, ਚਸ਼ਮਦੀਦ ਹੋਣਗੇ। ਫਿਰ ਦੁਪਹਿਰ ਨੂੰ 2:00 ਵਜੇ ਨਾਮਜਦ ਜੱਜ ਕੈਸੀਰਰ ਸਬੰਧੀ ਸੁਣਵਾਈ ਹੋਵੇਗੀ।
ਯੂਨੀਵਰਸਿਟੀ ਆਫ ਸ਼ੇਰਬਰੁੱਕ ਵਿਖੇ ਫੈਕਲਟੀ ਆਫ ਲਾਅ ਦੇ ਡੀਨ ਜੈਨੇਵੀਵ ਕਾਰਟੀਅਰ ਇਸ ਸੈਸ਼ਨ ਨੂੰ ਚਲਾਉਣ ਦੀ ਜਿ਼ੰਮੇਵਾਰੀ ਨਿਭਾਉਣਗੇ। ਨਵੇਂ ਬਣਨ ਜਾ ਰਹੇ ਸੁਪਰੀਮ ਕੋਰਟ ਜੱਜ ਹਾਊਸ ਜਸਟਿਸ ਕਮੇਟੀ ਤੇ ਸੈਨੇਟ ਕਮੇਟੀ ਆਨ ਲੀਗਲ ਐਂਡ ਕੌਂਸਟੀਚਿਊਸ਼ਨਲ ਅਫੇਅਰਜ਼ ਦੇ ਮੈਂਬਰਜ਼ ਦੇ ਸਵਾਲਾਂ ਦੇ ਜਵਾਬ ਦੇਣਗੇ। ਇਨ੍ਹਾਂ ਕਮੇਟੀਆਂ ਵਿੱਚ ਭਾਵੇਂ ਬਲਾਕ ਕਿਊਬਿਕੌਇਸ, ਗ੍ਰੀਨ ਪਾਰਟੀ ਤੇ ਪੀਪਲਜ਼ ਪਾਰਟੀ ਦੇ ਨੁਮਾਇੰਦੇ ਸ਼ਾਮਲ ਨਹੀਂ ਹਨ ਪਰ ਉਹ ਵੀ ਇਸ ਸਵਾਲ ਜਵਾਬ ਸੈਸ਼ਨ ਵਿੱਚ ਹਿੱਸਾ ਲੈ ਸਕਣਗੇ।
ਕੈਸੀਰਰ ਸਤੰਬਰ ਵਿੱਚ ਅਹੁਦਾ ਛੱਡਣ ਜਾ ਰਹੇ ਜੱਜ ਕਲੇਮੈਂਟ ਗੈਸਕਨ ਦੀ ਥਾਂ ਲੈਣਗੇ। ਗੈਸਕਨ ਨੇ ਨਿਜੀ ਤੇ ਪਰਿਵਾਰਕ ਕਾਰਨਾਂ ਕਰਕੇ ਇਹ ਅਹੁਦਾ ਛੱਡਣ ਦਾ ਐਲਾਨ ਕੀਤਾ ਸੀ।