ਤਹਿਰਾਨ, 25 ਜੂਨ (ਪੋਸਟ ਬਿਊਰੋ) : ਇਸਲਾਮਿਕ ਰਿਪਬਲਿਕ ਦੇ ਸੁਪਰੀਮ ਆਗੂ ਤੇ ਹੋਰਨਾਂ ਉੱਘੇ ਅਧਿਕਾਰੀਆਂ ਨੂੰ ਨਿਸ਼ਾਨਾ ਬਣਾਉਣ ਲਈ ਕਥਿਤ ਤੌਰ ਉੱਤੇ ਅਮਰੀਕਾ ਵੱਲੋਂ ਲਾਈਆਂ ਗਈਆਂ ਪਾਬੰਦੀਆਂ ਦੀ ਮੰਗਲਵਾਰ ਨੂੰ ਇਰਾਨ ਵੱਲੋਂ ਸਖ਼ਤ ਨਿਖੇਧੀ ਕੀਤੀ ਗਈ। ਇਰਾਨ ਨੇ ਇਹ ਵੀ ਸਪਸ਼ਟ ਕਰ ਦਿੱਤਾ ਹੈ ਕਿ ਇਸ ਤਰ੍ਹਾਂ ਦੇ ਸਖ਼ਤ ਮਾਪਦੰਡ ਚੁੱਕੇ ਜਾਣ ਕਾਰਨ ਦੋਵਾਂ ਦੇਸ਼ਾਂ ਦਰਮਿਆਨ ਡਿਪਲੋਮੈਟਿਕ ਸਬੰਧ ਹਮੇਸ਼ਾਂ ਲਈ ਖ਼ਤਮ ਹੋ ਸਕਦੇ ਹਨ। ਇਰਾਨ ਨੇ ਆਪਣੇ ਬਿਆਨ ਵਿੱਚ ਵਾੲ੍ਹੀਟ ਹਾਊਸ ਨੂੰ ਮਾਨਸਿਕ ਤੌਰ ਉੱਤੇ ਪਰੇਸ਼ਾਨੀ ਵਿੱਚ ਘਿਰਿਆ ਹੋਇਆ ਦੱਸਿਆ।
ਰਾਸ਼ਟਰਪਤੀ ਹਸਨ ਰੂਹਾਨੀ ਨੇ ਆਖਿਆ ਕਿ ਸੁਪਰੀਮ ਆਗੂ ਆਯਤੁੱਲਾਹ ਅਲੀ ਖਾਮੈਨੀ ਦੇ ਸੰਦਰਭ ਵਿੱਚ ਅਮਰੀਕਾ ਵੱਲੋਂ ਲਾਈਆਂ ਪਾਬੰਦੀਆਂ ਮੂਰਖਤਾਨਾ ਹਨ। ਖਾਸ ਤੌਰ ਉੱਤੇ ਉਸ ਸਮੇਂ ਜਦੋਂ 80 ਸਾਲਾ ਸ਼ੀਆ ਆਗੂ ਦੀ ਅਮਰੀਕਾ ਜਾਣ ਦੀ ਕੋਈ ਯੋਜਨਾ ਨਹੀਂ ਹੈ। ਇਜ਼ਰਾਈਲ ਤੋਂ ਟਰੰਪ ਦੇ ਨੈਸ਼ਨਲ ਸਕਿਊਰਿਟੀ ਸਲਾਹਕਾਰ ਜੌਹਨ ਬੋਲਟਨ ਨੇ ਆਖਿਆ ਕਿ ਅਮਰੀਕਾ ਨਾਲ ਗੱਲਬਾਤ ਅਜੇ ਵੀ ਸੰਭਵ ਹੈ ਤੇ ਅਮਰੀਕਾ ਅਜੇ ਵੀ ਇਰਾਨ ਨੂੰ ਹੋਰ ਮੌਕਾ ਦੇ ਰਿਹਾ ਹੈ।
ਪਰ ਤਹਿਰਾਨ ਤੋਂ ਟਿੱਪਣੀਆਂ ਤੋਂ ਇਹ ਸਪਸ਼ਟ ਹੋ ਗਿਆ ਕਿ ਉਸ ਦੇ ਆਗੂ ਦੂਜੀ ਤਰ੍ਹਾਂ ਸੋਚਦੇ ਹਨ। ਇਰਾਨ ਦੋ ਪ੍ਰਮਾਣੂ ਪ੍ਰੋਗਰਾਮ ਕਾਰਨ ਅਮਰੀਕਾ ਤੇ ਇਰਾਨ ਦਰਮਿਆਨ ਪੈਦਾ ਹੋਏ ਤਣਾਅ ਵਿੱਚ ਉਦੋਂ ਹੋਰ ਵਾਧਾ ਹੋ ਗਿਆ ਜਦੋਂ ਪਿਛਲੇ ਹਫਤੇ ਇਰਾਨ ਨੇ ਅਮਰੀਕਾ ਦੇ ਸਰਵੇਅਲੈਂਸ ਡਰੋਨ ਨੂੰ ਫੁੰਡ ਸੁੱਟਿਆ। ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਅੱਬਾਸ ਮੌਸਾਵੀ ਨੇ ਵੀ ਇਹੋ ਆਖਿਆ ਕਿ ਇਨ੍ਹਾਂ ਪਾਬੰਦੀਆਂ ਨਾਲ ਅਗਲੀ ਗੱਲਬਾਤ ਦੇ ਸਾਰੇ ਰਾਹ ਬੰਦ ਹੋ ਜਾਣਗੇ।