ਲੌਂਗਿਊਅਲ, ਕਿਊਬਿਕ, 25 ਜੂਨ (ਪੋਸਟ ਬਿਊਰੋ) : ਇੰਟਰਨੈਸ਼ਨਲ ਸਪੇਸ ਸਟੇਸਨ ਉੱਤੇ ਛੇ ਮਹੀਨੇ ਗੁਜ਼ਾਰਨ ਤੋਂ ਬਾਅਦ ਸੋਮਵਾਰ ਨੂੰ ਕੈਨੇਡੀਅਨ ਐਸਟ੍ਰੋਨੌਟ ਡੇਵਿਡ ਸੇਂਟ ਜੈਕੁਅਸ ਧਰਤੀ ਉੱਤੇ ਪਰਤ ਆਏ।
ਮੂਲ ਰੂਪ ਵਿੱਚ ਸੇਂਟ ਲੈਂਬਰਟ, ਕਿਊਬਿਕ ਨਾਲ ਸਬੰਧਤ ਜੈਕੁਅਸ ਸਪੇਸ ਸਟੇਸ਼ਨ ਵਿੱਚ ਸੱਭ ਤੋਂ ਵੱਧ ਸਮਾਂ, ਭਾਵ 204 ਦਿਨ ਰਹਿਣ ਵਾਲੇ ਪਹਿਲੇ ਐਸਟ੍ਰੋਨੌਟ ਬਣ ਗਏ ਹਨ। ਇਸ ਕੈਨੇਡੀਅਨ ਐਸਟ੍ਰੋਨੌਟ ਨੂੰ ਨਾਸਾ ਤੋਂ ਐਨੇ ਮੈਕਲੇਨ ਤੇ ਰੂਸੀ ਕੌਸਮੋਨੌਅ ਓਲੈਗ ਕੋਨੋਨੈਂਕੋ ਨੇ ਸੋਊਜ਼ ਕੈਪਸੂਲ ਵਿੱਚ ਜੁਆਇਨ ਕੀਤਾ, ਜੋ ਕਿ ਕਜ਼ਾਕਿਸਤਾਨ ਵਿੱਚ ਲੈਂਡ ਕੀਤਾ। ਸੇਂਟ ਜੈਕੁਅਸ ਮਿਸ਼ਨ 3 ਦਸੰਬਰ ਤੋਂ ਪਹਿਲਾਂ ਸ਼ੁਰੂ ਹੋਇਆ ਸੀ, ਜਦੋਂ ਅਕਤੂਬਰ ਵਿੱਚ ਹੋਏ ਰਾਕੇਟ ਹਾਦਸੇ ਤੋਂ ਬਾਅਦ ਉਹ ਪਹਿਲੇ ਸੋਊਜ਼ ਮਿਸ਼ਨ ਦਾ ਹਿੱਸਾ ਸੀ। ਇਸ ਹਾਦਸੇ ਤੋਂ ਬਾਅਦ ਦੋ ਐਸਟ੍ਰੋਨੌਟਸ ਨੂੰ ਮਿਸ਼ਨ ਵਿਚਾਲੇ ਛੱਡ ਕੇ ਐਮਰਜੰਸੀ ਲੈਂਡਿੰਗ ਕਰਨੀ ਪਈ ਸੀ।
49 ਸਾਲਾ ਸੇਂਟ-ਜੈਕੁਅਸ ਨੇ ਅਪਰੈਲ ਵਿੱਚ ਸਾਢੇ ਛੇ ਘੰਟੇ ਦੀ ਸਪੇਸ ਵਾਕ ਤੇ ਕੈਨੇਡਾਆਰਮ 2 ਦੀ ਵਰਤੋਂ ਨਾਲ ਸਪੇਸ ਐਕਸ ਡਰੈਗਨ ਕਾਰਗੋ ਦੀ ਕੌਸਮਿਕ ਕੈਚ ਵਿੱਚ ਹਿੱਸਾ ਲਿਆ। ਪਹਿਲੀ ਵਾਰੀ ਕਿਸੇ ਕੈਨੇਡੀਅਨ ਐਸਟ੍ਰੋਨੌਟ ਨੇ ਰੋਬੋਟਿਕ ਆਰਮ ਦੀ ਵਰਤੋਂ ਕੀਤੀ। ਇੰਜੀਨੀਅਰ, ਐਸਟ੍ਰੋਫਿਜ਼ੀਸਿਸਟ ਤੇ ਫੈਮਿਲੀ ਡਾਕਟਰ ਨੇ ਵਿਗਿਆਨ ਦੇ ਤਜ਼ਰਬਿਆਂ ਦੀ ਨਿਗਰਾਨੀ ਕੀਤੀ ਤੇ ਇਸ ਮਿਸ਼ਨ ਦੌਰਾਨ ਕੈਨੇਡਾ ਭਰ ਦੇ ਕਈ ਬੱਚਿਆਂ ਨਾਲ ਗੱਲਬਾਤ ਵੀ ਕੀਤੀ।
ਨਾਸਾ ਨੇ ਇਸ ਲੈਂਡਿੰਗ ਨੂੰ ਬਿਲਕੁਲ ਸਹੀ ਦੱਸਿਆ। ਕੈਪਸੂਲ ਵਿੱਚੋਂ ਸੇਂਟ ਜੈਕੁਅਸ ਨੂੰ ਸੱਭ ਤੋਂ ਅਖੀਰ ਵਿੱਚ ਬਾਹਰ ਕੱਢਿਆ ਗਿਆ। ਸੇਂਟ ਜੈਕੁਅਸ ਵਿਆਹੇ ਹੋਏ ਹਨ ਤੇ ਉਨ੍ਹਾਂ ਦੇ ਤਿੰਨ ਬੱਚੇ ਹਨ। ਉਨ੍ਹਾਂ ਨੇ ਜਲਦ ਹੀ ਆਪਣੇ ਪਰਿਵਾਰ ਨਾਲ ਮੁਲਾਕਾਤ ਦੀ ਸੰਭਾਵਨਾ ਪ੍ਰਗਟਾਈ ਹੈ।