ਬਰੈਂਪਟਨ, 23 ਜੂਨ (ਪੋਸਟ ਬਿਊਰੋ)- 2012 ਵਿਚ ਮੋਟਰ ਸਾਈਕਲ ਚਲਾਉਂਦੇ ਸਮੇਂ ਸੜਕ ਹਾਦਸੇ ਦੌਰਾਨ ਅਕਾਲ ਚਲਾਣਾ ਕਰ ਗਏ ਮਨਦੀਪ ਸਿੰਘ ਚੀਮਾ ਦੀ ਯਾਦ ਵਿਚ ਆਯੋਜਿਤ ਰਾਈਡ ਫਾਰ ਰਾਜਾ ਵਿਚ ਇਸ ਵਾਰ 100 ਦੇ ਕਰੀਬ ਮੋਟਰਸਾਈਕਲ ਰਾਈਡਰਜ਼ ਨੇ ਹਿੱਸਾ ਲਿਆ। ਸਵੇਰੇ ਸਾਢੇ 10 ਵਜੇ ਦੇ ਕਰੀਬ ਸ਼ੁਰੂ ਹੋਈ ਇਹ ਰਾਈਡ 2 ਘੰਟੇ ਦਾ ਸਫਰ ਤੈਅ ਕਰਕੇ ਵਾਪਸ ਬਰੈਂਪਟਨ ਦੇ ਸਾਕਰ ਸੈਟਰ ਵਿਚ ਪਹੁੰਚੀ। ਇਸ ਮੋਟਰਸਾਈਕਲ ਰਾਈਡ ਦਾ ਮਕਸਦ ਬੱਚਿਆਂ ਦੀ ਮੱਦਦ ਲਈ ਕੁੱਝ ਪੈਸਾ ਇਕੱਠਾ ਕਰਨਾ ਹੁੰਦਾ ਹੈ ਤੇ ਮੋਟਰਸਾਈਕਲ ਚਾਲਕਾਂ ਦਰਮਿਆਨ ਜਾਗ੍ਰਿਤੀ ਪੈਦਾ ਕਰਨਾ ਹੁੰਦਾ ਹੈ। ਰਾਈਡ ਫਾਰ ਰਾਜਾ ਦੀ ਪ੍ਰਬੰਧਕੀ ਟੀਮ ਵਲੋਂ ਬਹੁਤ ਹੀ ਵਧੀਆ ਪ੍ਰਬੰਧ ਕੀਤਾ ਗਿਆ। ਸਵੇਰੇ ਸਾਰੇ ਹਿੱਸਾ ਲੈਣ ਵਾਲਿਆਂ ਵਾਸਤੇ ਬ੍ਰੇਕਫਾਸਟ ਅਤੇ ਦੁਪਹਿਰ ਲੰਚ ਦਾ ਵੀ ਇੰਤਜ਼ਾਮ ਕੀਤਾ ਗਿਆ। ਇਸ ਮੌਕੇ ਓਂਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ, ਮਿਨਿਸਟਰ ਪ੍ਰਭਮੀਤ ਸਰਕਾਰੀਆ, ਐਮਪੀਪੀ ਅਮਰਜੋਤ ਸੰਧੂ, ਸਿਟੀ ਕੌਂਸਲਰ ਗੁਰਪ੍ਰੀਤ ਢਿੱਲੋਂ ਅਤੇ ਹੋਰ ਕਮਿਉਨਿਟੀ ਆਗੂਆਂ ਨੇ ਹਿੱਸਾ ਲਿਆ। ਯੁਨਾਈਟਡ ਸਿੱਖ ਮੋਟਰਸਾਈਕਲ ਕਲੱਬ ਵਲੋਂ ਦਸਤਾਰ ਸਜਾਉਣ ਲਈ ਸਿਖਲਾਈ, ਪੇਟਿੰਗ ਅਤੇ ਹੋਰ ਕਈ ਤਰ੍ਹਾਂ ਦੇ ਬੂਥ ਲੱਗੇ ਹੋਏ ਸਨ। ਇਸ ਟੀਮ ਦੀ ਸੰਚਾਲਕ ਮਨਦੀਪ ਸਿੰਘ ਚੀਮਾ ਦੀ ਭੈਣ ਮੀਕਾ ਚੀਮਾ ਗਿੱਲ ਨੇ ਦੱਸਿਆ ਕਿ ਪਹਿਲੇ ਸਾਲ ਜਿਥੇ ਸਿਰਫ 10 ਮੋਟਰਸਾਈਕਲ ਸ਼ਾਮਲ ਹੋਏ ਸਨ, ਇਸ ਸਾਲ 100 ਦੇ ਕਰੀਬ ਮੋਟਰਸਾਈਕਲਿਸਟ ਭਾਗ ਲੈ ਰਹੇ ਹਨ ਅਤੇ ਲਗਭਗ 45 ਹਜ਼ਾਰ ਡਾਲਰ ਦੇ ਕਰੀਬ ਪੀਲ ਚਿਲਡਰਨ ਏਡ ਸੁਸਾਇਟੀ ਲਈ ਇਸ ਸਾਲ ਇਕੱਠਾ ਕੀਤਾ ਗਿਆ ਹੈ। ਸ: ਭੁਪਿੰਦਰ ਸਿੰਘ ਚੀਮਾ ਨੇ ਸਾਰੇ ਪਾਰਟੀਸਿਪੈਟਸ ਦਾ ਧੰਨਵਾਦ ਕੀਤਾ। ਇਸੇ ਤਰ੍ਹਾਂ ਬਰਂੈਪਟਨ ਦੇ ਮੇਅਰ ਪੈਟ੍ਰਿਕ ਬ੍ਰਾਊਨ ਨੇ ਵੀ ਬਾਅਦ ਦੁਪਹਿਰ ਸਿ਼ਰਕਤ ਕਰਕੇ ਕੇਕ ਕੱਟਣ ਦੀ ਰਸਮ ਅਦਾ ਕੀਤੀ। ਇਹ ਇਕ ਅਜਿਹਾ ਪ੍ਰੋਗਰਾਮ ਹੈ, ਜਿਥੇ ਸਿੱਖ ਦਸਤਾਰਾਂ ਸਜਾ ਕੇ ਮੋਟਰਸਾਈਕਲ ਚਲਾਉਦੇ ਹਨ, ਉਸ ਦੇ ਨਾਲ-ਨਾਲ ਅੱਧ ਦੇ ਕਰੀਬ ਦੂਸਰੀਆਂ ਕਮਿਉਨਿਟੀਆਂ ਦੇ ਲੋਕ ਵੀ ਸ਼ਾਮਲ ਹੁੰਦੇ ਹਨ। ਇਸ ਤਰ੍ਹਾਂ ਰਲਣ-ਮਿਲਣ ਦਾ ਇਹ ਇਕ ਵਧੀਆ ਮੌਕਾ ਹੋ ਨਿਬੜਿਆ।