ਮਾਂਟਰੀਅਲ, 19 ਜੂਨ (ਪੋਸਟ ਬਿਊਰੋ) : ਕਿਊਬਿਕ ਵਿੱਚ ਧਾਰਮਿਕ ਚਿੰਨ੍ਹ ਧਾਰਨ ਕਰਨ ਉੱਤੇ ਰੋਕ ਲਾਉਣ ਸਬੰਧੀ ਬਿੱਲ 21 ਪਾਸ ਕੀਤੇ ਜਾਣ ਉੱਤੇ ਵਰਲਡ ਸਿੱਖ ਆਰਗੇਨਾਈਜੇਸਨ ਆਫ ਕੈਨੇਡਾ ਵੱਲੋਂ ਸਖਤ ਇਤਰਾਜ ਕੀਤਾ ਗਿਆ ਹੈ। ਇਹ ਬਿੱਲ ਐਤਵਾਰ ਨੂੰ ਲੇਟ ਨਾਈਟ ਕਰਵਾਈ ਗਈ ਵੋਟ ਵਿੱਚ ਪਾਸ ਕੀਤਾ ਗਿਆ। ਇਸ ਦੇ ਨਾਲ ਹੀ ਕੈਨੇਡੀਅਨ ਚਾਰਟਰ ਆਫ ਰਾਈਟਸ ਐਂਡ ਫਰੀਡਮਜ ਵਿੱਚ ਦਰਜ ਧਾਰਮਿਕ ਆਜਾਦੀ ਦੀ ਹਿਫਾਜਤ ਦੇ ਕਲਾਜ ਨੂੰ ਵੀ ਇਸ ਬਿੱਲ ਨੂੰ ਪਾਸ ਕਰਨ ਸਮੇਂ ਅਣਗੌਲਿਆ ਗਿਆ।
ਇਸ ਦੌਰਾਨ ਬਿੱਲ 9 ਵੀ ਪਾਸ ਕੀਤਾ ਗਿਆ, ਜੋ ਕਿ ਵਿਵਾਦਗ੍ਰਸਤ ਕਾਨੂੰਨ ਹੈ ਤੇ ਜਿਸ ਨਾਲ ਕਿਊਬਿਕ ਪਹੁੰਚੀਆਂ 18000 ਪੈਂਡਿੰਗ ਇਮੀਗ੍ਰੇਸਨ ਅਰਜੀਆਂ ਨੂੰ ਬਿਨਾਂ ਵਿਚਾਰ ਕੀਤਿਆਂ ਖਤਮ ਕਰ ਦਿੱਤਾ ਜਾਵੇਗਾ। ਬਿੱਲ 9 ਤਹਿਤ ਕਿਊਬਿਕ ਦੀਆਂ ਕਦਰਾਂ ਕੀਮਤਾਂ ਲਈ ਇੱਥੋ ਦੀ ਪਰਮਾਨੈਂਟ ਰੈਜੀਡੈਂਸ ਹਾਸਲ ਕਰਨ ਲਈ ਇਮੀਗ੍ਰੈਂਟਸ ਨੂੰ ਟੈਸਟ ਪਾਸ ਕਰਨਾ ਹੁੰਦਾ ਹੈ। ਬਿੱਲ 21 ਪਾਸ ਹੋਣ ਤੋਂ ਬਾਅਦ ਹੁਣ ਪਬਲਿਕ ਸਰਵੈਂਟਸ ਜਿਵੇਂ ਕਿ ਪੁਲਿਸ ਅਧਿਕਾਰੀ, ਜੱਜ, ਪ੍ਰੌਸੀਕਿਊਟਰਜ ਤੇ ਸਕੂਲ ਟੀਚਰਜ ਦੇ ਨਾਲ ਨਾਲ ਪ੍ਰਿੰਸੀਪਲਜ ਵੀ ਧਾਰਮਿਕ ਚਿੰਨ੍ਹ ਧਾਰਨ ਨਹੀਂ ਕਰ ਸਕਣਗੇ।
ਆਖਰੀ ਪਲ ਵਿੱਚ ਕੀਤੀ ਗਈ ਸੋਧ ਤਹਿਤ ਕਿਊਬਿਕ ਸਰਕਾਰ ਵੱਲੋਂ ਇਹ ਪ੍ਰਾਵਧਾਨ ਵੀ ਦਰਜ ਕੀਤਾ ਗਿਆ ਹੈ ਕਿ ਇਸ ਸੈਕੂਲਰਿਜਮ ਲਾਅ ਨੂੰ ਲਾਗੂ ਕੀਤੇ ਜਾਣ ਤੇ ਇਸ ਦੀ ਸਾਰਿਆਂ ਵੱਲੋਂ ਪਾਲਣਾ ਯਕੀਨੀ ਬਣਾਉਣ ਦੀ ਜਿੰਮੇਵਾਰੀ ਇੰਸਪੈਕਟਰਜ ਦੀ ਹੋਵੇਗੀ। ਇਸ ਕਾਨੂੰਨ ਦੀ ਉਲੰਘਣਾ ਕਰਨ ਵਾਲਿਆਂ ਖਿਲਾਫ ਅਨੁਸਾਸਕੀ ਕਾਰਵਾਈ ਕੀਤੀ ਜਾਵੇਗੀ। ਇਸ ਸੋਧ ਦੇ ਬਾਵਜੂਦ ਮਾਹਿਰਾਂ ਦਾ ਮੰਨਣਾ ਹੈ ਕਿ ਬਿੱਲ ਵਿੱਚ ਧਾਰਮਿਕ ਚਿੰਨ੍ਹਾਂ ਨੂੰ ਕੱਪੜਿਆਂ, ਜਿਊਲਰੀ, ਗਹਿਣਿਆਂ ਜਾਂ ਸਿਰ ਉੱਤੇ ਧਾਰਨ ਕੀਤੇ ਜਾਣ ਵਾਲੇ ਹੈੱਡਗੇਅਰ ਵਜੋਂ ਪਰਿਭਾਸਤ ਕੀਤਾ ਗਿਆ ਹੈ।
ਇੱਥੇ ਦੱਸਣਾ ਬਣਦਾ ਹੈ ਕਿ ਕਿਊਬਿਕ ਵਿੱਚ ਅੰਦਾਜਨ 15,000 ਸਿੱਖ ਰਹਿੰਦੇ ਹਨ। ਧਾਰਮਿਕ ਕੱਪੜਿਆਂ ਤੇ ਚਿੰਨ੍ਹਾਂ ਉੱਤੇ ਪਾਬੰਦੀ ਨਾਲ ਉਨ੍ਹਾਂ ਉੱਤੇ ਸਿੱਧਾ ਅਸਰ ਪਵੇਗਾ। ਸਿੱਖੀ ਮਾਨਤਾ ਅਨੁਸਾਰ ਪੁਰਸਾਂ ਤੇ ਮਹਿਲਾਵਾਂ ਨੂੰ ਕਕਾਰ ਪਾਉਣੇ ਪੈਂਦੇ ਹਨ ਤੇ ਜਾਹਿਰਾ ਤੌਰ ਉੱਤੇ ਪੱਗ ਸਿੱਖੀ ਦਾ ਮੁੱਖ ਪ੍ਰਤੀਕ ਹੈ। ਵਰਲਡ ਸਿੱਖ ਆਰਗੇਨਾਈਜੇਸਨ ਦੇ ਪ੍ਰਧਾਲ ਮੁਖਬੀਰ ਸਿੰਘ ਨੇ ਆਖਿਆ ਕਿ ਕਿਊਬਿਕ ਦੇ ਲੋਕਾਂ ਤੇ ਖਾਸਕਰਕੇ ਕੈਨੇਡਾ ਲਈ ਇਹ ਬਹੁਤ ਹੀ ਮਾੜੀ ਖਬਰ ਹੈ। ਧਾਰਮਿਕ ਡਰੈੱਸ ਕੋਡ ਲਾਗੂ ਕਰਨ ਵਾਲਾ ਕਿਊਬਿਕ ਕੈਨੇਡਾ ਦਾ ਪਹਿਲਾ ਪ੍ਰੋਵਿੰਸ ਹੈ। ਇਸ ਬਿੱਲ ਨੂੰ ਪਾਸ ਕਰਕੇ ਕਿਊਬਿਕ ਸਰਕਾਰ ਨੇ ਦੁਨੀਆ ਨੂੰ ਇਹ ਸੁਨੇਹਾ ਦਿੱਤਾ ਹੈ ਕਿ ਵੰਨਸੁਵੰਨਤਾ ਲਈ ਉਨ੍ਹਾਂ ਆਪਣੇ ਦਰ ਬੰਦ ਕਰ ਲਏ ਹਨ। ਇਸ ਤੋਂ ਇਲਾਵਾ ਕਿਊਬਿਕ ਸਰਕਾਰ ਨੇ ਕੌਮਾਂਤਰੀ ਮਨੁੱਖੀ ਅਧਿਕਾਰਾਂ ਨੂੰ ਮੰਨਣ ਤੋਂ ਵੀ ਇਨਕਾਰ ਕਰ ਦਿੱਤਾ ਹੈ। ਇਹ ਫੈਸਲਾ ਬਹੁਤ ਹੀ ਮੰਦਭਾਗਾ ਹੈ। ਘੱਟ ਗਿਣਤੀਆਂ ਨੂੰ ਇੱਕ ਤਰ੍ਹਾਂ ਆਪਣੇ ਅਧਿਕਾਰਾਂ ਦੀ ਵਰਤੋਂ ਕਰਨ ਤੋਂ ਰੋਕਿਆ ਜਾ ਰਿਹਾ ਹੈ। ਉਨ੍ਹਾਂ ਆਖਿਆ ਕਿ ਡਬਲਿਊਐਸਓ ਇਸ ਦਾ ਸਖਤ ਵਿਰੋਧ ਕਰਦੀ ਹੈ।