ਓਟਵਾ, 8 ਅਕਤੂਬਰ (ਪੋਸਟ ਬਿਊਰੋ) : ਸੰਯੁਕਤ ਰਾਸ਼ਟਰ ਦੇ ਇੰਟਰਗਵਰਮੈਂਟਲ ਪੈਨਲ ਆਨ ਕਲਾਈਮੇਟ ਚੇਂਜ ਵੱਲੋਂ ਐਤਵਾਰ ਨੂੰ ਜਾਰੀ ਕੀਤੀ ਗਈ ਨਵੀਂ ਰਿਪੋਰਟ ਵਿੱਚ ਆਖਿਆ ਗਿਆ ਹੈ ਕਿ ਆਪਣੇ ਟੀਚੇ ਨੂੰ ਪੂਰਾ ਕਰਨ ਲਈ ਸਾਨੂੰ ਤੇਜ, ਦੂਰ ਤੱਕ ਮਾਰ ਕਰਨ ਵਾਲੀ ਤੇ ਸਮਾਜ ਦੇ ਕਈ ਖੇਤਰਾਂ ਵਿੱਚ ਤਬਦੀਲੀਆਂ ਵਾਲੀ ਪਹੁੰਚ ਅਪਨਾਉਣੀ ਹੋਵੇਗੀ ਨਹੀਂ ਤਾਂ ਗਲੋਬਲ ਵਾਰਮਿੰਗ ਖਿਲਾਫ ਜਾਰੀ ਜੰਗ ਅਸੀਂ ਹਾਰ ਜਾਵਾਂਗੇ। 
ਇਹ ਰਿਪੋਰਟ ਅਸਲ ਵਿੱਚ ਵਾਤਾਵਰਣ ਵਿੱਚ ਹੋ ਰਹੀਆਂ ਤਬਦੀਲੀਆਂ ਨੂੰ ਕਿਸ ਤਰ੍ਹਾਂ ਠੀਕ ਕੀਤਾ ਜਾਵੇ ਇਸ ਸਬੰਧੀ ਵਿਗਿਆਨਕ ਖਰੜਾ ਹੈ। ਇਸ ਵਿੱਚ ਦਰਸਾਇਆ ਗਿਆ ਹੈ ਕਿ ਇਸ ਸਮੇਂ ਸੰਸਾਰ 1.5 ਡਿਗਰੀ ਸੈਲਸੀਅਸ ਤੱਕ ਹੋਰ ਤਪਿਸ਼ ਵੱਲ ਵਧਣ ਦੇ ਰਾਹ ਉੱਤੇ ਚੱਲ ਰਿਹਾ ਹੈ ਤੇ 2040 ਤੱਕ ਅਜਿਹਾ ਹੋ ਜਾਵੇਗਾ। ਹਰ ਦਹਾਕੇ ਵਿੱਚ ਦੁਨੀਆਂ ਵਿੱਚ 0.2 ਸੈਲਸੀਅਸ ਦੇ ਹਿਸਾਬ ਨਾਲ ਤਪਿਸ਼ ਵੱਧਦੀ ਜਾ ਰਹੀ ਹੈ। 19ਵੀਂ ਸਦੀ ਦੇ ਮੱਧ ਤੋਂ ਲੈ ਕੇ ਹੁਣ ਤੱਕ ਇਹ ਤਪਿਸ 1 ਸੈਲਸੀਅਸ ਤੋਂ ਜਿ਼ਆਦਾ ਵੱਧ ਚੁੱਕੀ ਹੈ।
2015 ਵਿੱਚ ਪੈਰਿਸ ਕਲਾਈਮੇਟ ਚੇਂਜ ਅਗਰੀਮੈਂਟ ਵਿੱਚ ਇਸ ਸਦੀ ਦੇ ਅੰਤ ਤੱਕ ਇਹ ਰਿਸਾਅ ਘਟਾਉਣ ਦਾ ਟੀਚਾ ਤੈਅ ਕੀਤਾ ਗਿਆ। ਕਲਾਈਮੇਟ ਐਕਸ਼ਨ ਨੈੱਟਵਰਕ ਕੈਨੇਡਾ ਦੀ ਐਗਜ਼ੈਕਟਿਵ ਡਾਇਰੈਕਟਰ ਕੈਥਰੀਨ ਐਬਰਿਊ ਨੇ ਆਖਿਆ ਕਿ 1.5 ਸੈਲਸੀਅਸ ਤੇ 2 ਸੈਲਸੀਅਸ ਵਿੱਚ ਭਾਵੇਂ ਜਿ਼ਆਦਾ ਫਰਕ ਨਾ ਲੱਗਦਾ ਹੋਵੇ ਪਰ ਜਦੋਂ ਵਾਤਾਵਰਣ ਵਿੱਚ ਤਬਦੀਲੀ ਦਾ ਮਾਮਲਾ ਆਉਂਦਾ ਹੈ ਤਾਂ ਇਹ ਫਰਕ ਬਹੁਤ ਵੱਡਾ ਹੁੰਦਾ ਹੈ।
ਯੂਨਾਈਟਿਡ ਕਿੰਗਡਮ ਸਥਿਤ ਵੈੱਬਸਾਈਟ ਕਾਰਬਨ ਬ੍ਰੀਫ, ਜੋ ਕਿ ਕਲਾਈਮੇਟ ਸਾਇੰਸ ਤੇ ਪਾਲਿਸੀ ਉੱਤੇ ਕੇਂਦਰਿਤ ਹੈ, ਵੱਲੋਂ 70 ਪੀਅਰ ਰਵੀਊਡ ਕਲਾਈਮੇਟ ਸਟੱਡੀਜ਼ ਦਾ ਮੁਲਾਂਕਣ ਕੀਤਾ ਗਿਆ ਹੈ। ਇਸ ਉੱਤੇ ਆਧਾਰਿਤ ਅੰਦਾਜ਼ੇ ਮੁਤਾਬਕ ਜੇ 1.5 ਸੈਲਸੀਅਸ ਤਪਿਸ ਵੱਧਦੀ ਹੈ ਤਾਂ ਉਸ ਨਾਲ ਸਮੁੰਦਰ ਦਾ ਪੱਧਰ 48 ਸੈਂਟੀਮੀਟਰ ਤੱਕ ਵਧੇਗਾ ਪਰ 2 ਸੈਲਸੀਅਸ ਤਪਿਸ਼ ਵੱਧਣ ਨਾਲ ਸਮੁੰਦਰ ਦਾ ਪੱਧਰ 56 ਸੈਂਟੀਮੀਟਰ ਵਧੇਗਾ। ਇਸ ਤੋਂ ਇਲਾਵਾ ਆਰਕਟਿਕ ਵਿੱਚ ਗਰਮੀਆਂ ਬਰਫ ਮੁਕਤ ਹੋਣਗੀਆਂ ਤੇ ਪੂਰਬੀ ਕੈਨੇਡਾ ਵਿੱਚ ਹੱਦੋਂ ਵੱਧ ਮੀਂਹ ਪੈਣ ਦੀ ਸੰਭਾਵਨਾ 26 ਫੀ ਸਦੀ ਹੋ ਜਾਵੇਗੀ।
ਅਗਲੇ ਸਾਲ ਪੈਰਿਸ ਅਗਰੀਮੈਂਟ ਉੱਤੇ ਸਹੀ ਪਾਉਣ ਵਾਲੇ ਮੁਲਕ ਆਪਣੇ ਗ੍ਰੀਨ ਹਾਊਸ ਗੈਸਾਂ ਦੇ ਰਿਸਾਅ ਨੂੰ ਰੋਕਣ ਦੇ ਟੀਚਿਆਂ ਬਾਰੇ ਗੱਲ ਕਰਨਗੇ। ਕੈਨੇਡਾ 2030 ਤੱਕ ਇਸ ਰਿਸਾਅ ਨੂੰ 2005 ਦੇ ਮੁਕਾਬਲੇ 30 ਫੀ ਸਦੀ ਘਟਾਉਣਾ ਚਾਹੁੰਦਾ ਹੈ। ਇਸ ਦੌਰਾਨ ਇੱਕ ਇੰਟਰਵਿਊ ਵਿੱਚ ਵਾਤਾਵਰਣ ਮੰਤਰੀ ਕੈਥਰੀਨ ਮੈਕੇਨਾ ਨੇ ਆਖਿਆ ਕਿ ਅਸੀਂ ਆਈਪੀਸੀਸੀ ਦੀ ਰਿਪੋਰਟ ਬਾਰੇ ਜਾਣਦੇ ਹਾਂ। ਸਾਨੂੰ ਪਤਾ ਹੈ ਕਿ ਟੀਚੇ ਪੂਰੇ ਕਰਨ ਲਈ ਸਾਨੂੰ ਹੋਰ ਕਾਫੀ ਕੁੱਝ ਕਰਨ ਦੀ ਲੋੜ ਹੈ। ਪਰ ਇੱਥੇ ਦੱਸਣਾ ਬਣਦਾ ਹੈ ਕਿ ਕੈਨੇਡਾ ਕੋਲ ਅਜੇ ਇਸ ਸਬੰਧ ਵਿੱਚ ਕੋਈ ਹੋਰ ਪਲੈਨ ਨਹੀਂ ਹੈ।