ਬਰੈਂਪਟਨ, - ਬਰੈਂਪਟਨ ਨੌਰਥ ਦੀ ਮੈਂਬਰ ਪਾਰਲੀਮੈਂਟ ਰੂਬੀ ਸਹੋਤਾ ਔਰਤਾਂ ਵੱਲੋਂ ਕੈਨੇਡਾ ਦੇ ਅਰਥਚਾਰੇ ਵਿਚ ਪਾਏ ਜਾ ਰਹੇ ਯੋਗਦਾਨ 'ਤੇ ਫ਼ਖ਼ਰ ਮਹਿਸੂਸ ਕਰਦੀ ਹੈ। ਇਸ ਦੇ ਬਾਰੇ ਗੱਲ ਕਰਦਿਆਂ ਉਨ੍ਹਾਂ ਦੱਸਿਆ ਕਿ ਪਹਿਲੀ ਵਾਰ ਲਿਬਰਲ ਸਰਕਾਰ ਵੱਲੋਂ 'ਵੋਮੈੱਨ ਐਂਟਰਪ੍ਰੀਨੀਅਰ ਸਟਰੈਟਿਜੀ' ਅਧੀਨ 2 ਬਿਲੀਅਨ ਡਾਲਰ ਪੂੰਜੀ ਨਿਵੇਸ਼ ਕੀਤੀ ਜਾ ਰਹੀ ਹੈ ਜੋ ਔਰਤਾਂ ਦੁਆਰਾ ਚਲਾਏ ਜਾ ਰਹੇ ਕਾਰੋਬਾਰਾਂ ਲਈ ਸਾਲ 2025 ਵਿਚ ਇਸ ਤੋਂ ਦੁਗਣੀ ਹੋ ਜਾਏਗੀ। ਐੱਮ.ਪੀ. ਸਹੋਤਾ ਨੇ ਸਥਾਨਕ ਬਿਜ਼ਨੈੱਸ ਬੀ.ਐੱਮ.ਪੀ. ਮੈਟਲ ਇਨਕਾਰਪੋਰੇਸ਼ਨ ਜਿਹੜਾ ਕਿ ਔਰਤਾਂ ਵੱਲੋਂ ਚਲਾਇਆ ਜਾ ਰਿਹਾ ਹੈ ਅਤੇ ਇਹ ਇੰਡਸਟਰੀ ਦੇ ਖ਼ੇਤਰਾਂ ਆਟੋਮੇਟਡ ਫ਼ੌਰਮਿੰਗ, 3-ਡੀ ਪ੍ਰਿੰਟਿੰਗ, ਵੈੱਲਡਿੰਗ ਅਤੇ ਵੱਖ-ਵੱਖ ਪ੍ਰਕਾਰ ਦੇ ਪੁਰਜਿ਼ਆਂ ਦੀ ਬਿਜਲਈ-ਅਸੈਂਬਲਿੰਗ ਕਰਦਾ ਹੈ, ਦੇ ਲਈ 1,000,000 ਡਾਲਰ ਤੱਕ ਦੇ ਪੂੰਜੀ ਨਿਵੇਸ਼ ਦਾ ਐਲਾਨ ਕੀਤਾ। ਫ਼ੈੱਡਰਲ ਫ਼ੰਡਿੰਗ ਪ੍ਰਾਪਤ ਕਰਨ ਵਾਲਾ ਇਹ ਪ੍ਰਾਜੈੱਕਟ ਬਿਜ਼ਨੈੱਸ ਨੂੰ ਹੋਰ ਪ੍ਰਫੁੱਲਤ ਕਰਨ ਲਈ 'ਗਰੋਥ ਸਟਰੈਟਿਜੀ' ਨੂੰ ਲਾਗੂ ਕਰੇਗਾ ਜਿਸ ਨਾਲ ਇਸ ਇੰਡਸਟਰੀ ਦਾ ਵਾਧਾ 4.0 ਪੈਮਾਨੇ ਤੀਕ ਪਹੁੰਚ ਜਾਏਗਾ ਅਤੇ ਇਸ ਨਾਲ 25 ਹੋਰ ਨਵੀਆਂ ਨੌਕਰੀਆਂ ਪੈਦਾ ਹੋਣਗੀਆਂ।
ਇਸ ਮੌਕੇ ਆਪਣੇ ਵਿਚਾਰ ਪ੍ਰਗਟ ਕਰਦਿਆਂ ਹੋਇਆਂ ਰੂਬੀ ਸਹੋਤਾ ਨੇ ਕਿਹਾ,"ਔਰਤ ਐਟਰਪ੍ਰੀਨੀਅਰਜ਼ ਅਤੇ ਬਰੈਂਪਟਨ ਦੇ ਬਿਜ਼ਨੈੱਸ ਆਗੂ ਸਾਡੇ ਦੇਸ਼ ਦੇ ਅਰਥਚਾਰੇ ਵਿਚ ਅਤੇ ਕਮਿਊਨਿਟੀ ਦੇ ਵਿਕਾਸ ਲਈ ਬਹੁਤ ਵਧੀਆ ਯੋਗਦਾਨ ਪਾ ਰਹੇ ਹਨ। ਮੈਨੂੰ ਲਿਬਰਲ ਪਾਰਟੀ ਦਾ ਇਕ ਹਿੱਸਾ ਹੋਣ 'ਤੇ ਮਾਣ ਹੈ ਜਿਹੜੀ ਕਿ ਅਰਥਚਾਰੇ ਦੇ ਖ਼ੇਤਰ ਵਿਚ ਔਰਤਾਂ ਦੇ ਸ਼ਕਤੀਕਰਨ ਨੂੰ ਉਤਸ਼ਾਹਿਤ ਕਰਦੀ ਹੈ। ਇੱਕੋ ਜਿਹੇ ਕੰਮ ਲਈ ਔਰਤਾਂ ਤੇ ਮਰਦਾਂ ਦੀਆਂ ਇੱਕੋ ਜਿਹੀਆਂ ਤਨਖ਼ਾਹਾਂ ਤੋਂ ਲੈ ਕੇ ਪੇਰੈਂਟਲ ਛੁੱਟੀ ਤੱਕ ਇਹ ਸਰਕਾਰ ਲਿੰਗ- ਬਰਾਬਰੀ ਦੇ ਮਸਲੇ ਹੱਲ ਕਰ ਰਹੀ ਹੈ, ਕਿਉਂਕਿ ਜੇਕਰ ਦੇਸ਼ ਦੀਆਂ ਔਰਤਾਂ ਸਫ਼ਲ ਹੁੰਦੀਆਂ ਹਨ ਤਾਂ ਅਸੀਂ ਸਾਰੇ ਹੀ ਸਫ਼ਲ ਹੁੰਦੇ ਹਾਂ।"