ਟੋਰਾਂਟੋ, 3 ਅਕਤੂਬਰ (ਪੋਸਟ ਬਿਊਰੋ) : ਮੰਗਲਵਾਰ ਨੂੰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਆਖਿਆ ਕਿ ਅਗਲੇ ਸਾਲ ਹੋਣ ਵਾਲੀਆਂ ਫੈਡਰਲ ਚੋਣਾਂ ਬਹੁਤੀਆਂ ਵਧੀਆਂ ਨਹੀਂ ਰਹਿਣ ਵਾਲੀਆਂ।
ਉੱਤਰਪੱਛਮੀ ਟੋਰਾਂਟੋ ਵਿੱਚ ਲਿਬਰਲ ਫੰਡਰੇਜ਼ਰ ਈਵੈਂਟ ਉੱਤੇ ਗੱਲ ਕਰਦਿਆਂ ਟਰੂਡੋ ਨੇ ਆਖਿਆ ਕਿ ਉਹ ਆਸ ਕਰਦੇ ਹਨ ਕਿ ਉਨ੍ਹਾਂ ਦੀ ਲਿਬਰਲ ਪਾਰਟੀ ਕਿਸੇ ਤਰ੍ਹਾਂ ਵੀ ਕਿਸੇ ਉੱਤੇ ਚਿੱਕੜ ਨਹੀਂ ਉਛਾਲੇਗੀ। ਉਨ੍ਹਾਂ ਆਖਿਆ ਕਿ ਅਸੀਂ ਇਹ ਵੀ ਕੋਸਿ਼ਸ਼ ਕਰਾਂਗੇ ਕਿ ਅਸੀਂ ਸਕਾਰਾਤਮਕਤਾ ਦਾ ਪੱਲਾ ਫੜ੍ਹੀ ਰੱਖੀਏ।
ਟਰੂਡੋ ਨੇ ਆਖਿਆ ਕਿ ਅਸੀਂ ਸ਼ਾਇਦ ਅਗਲੇ ਸਾਲ ਕੈਨੇਡਾ ਦੇ ਇਤਿਹਾਸ ਵਿੱਚ ਸੱਭ ਤੋਂ ਨਕਾਰਾਤਮਕ ਤੇ ਗੰਧਲੀ ਸਿਆਸੀ ਕੈਂਪੇਨ ਵਾਲੀਆਂ ਚੋਣਾਂ ਵੇਖਾਂਗੇ। ਉਨ੍ਹਾਂ ਆਖਿਆ ਕਿ ਆਪਣੇ ਬਾਰੇ ਉਹ ਆਖ ਸਕਦੇ ਹਨ ਕਿ ਅਸੀਂ ਉਹੀ ਕਰਾਂਗੇ ਜੋ 2015 ਵਿੱਚ ਕੀਤਾ ਸੀ। ਅਸੀਂ ਕਿਸੇ ਉੱਤੇ ਨਿਜੀ ਹਮਲਾ ਨਹੀਂ ਕਰਾਂਗੇ।
ਟਰੂਡੋ ਨੇ ਆਖਿਆ ਕਿ ਸਕਾਰਾਤਮਕ ਤੇ ਅਜਿਹਾ ਸੁਨੇਹਾ ਜਿਹੜਾ ਲੋਕਾਂ ਨੂੰ ਇੱਕਜੁੱਟ ਕਰ ਸਕੇ, ਜਿਹੜਾ ਨਿਜੀ ਹਮਲਿਆਂ ਤੋਂ ਦੂਰ ਹੋਵੇ, ਜਿਹੜਾ ਹੱਥਕੰਢਿਆਂ ਵਾਲੀ ਸਿਆਸਤ ਤੋਂ ਪਾਸੇ ਹੋਵੇ, ਜਿਹੋ ਜਿਹੀ ਸਿਆਸਤ ਤਤਕਾਲੀ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਵੱਲੋਂ ਵਰਤੀ ਗਈ ਸੀ, ਅਸੀਂ ਉਸ ਤੋਂ ਦੂਰ ਰਹਾਂਗੇ। ਅਸੀਂ ਪਹਿਲਾਂ ਵੀ ਇਹ ਸਿੱਧ ਕਰ ਚੁੱਕੇ ਹਾਂ ਕਿ ਨਕਾਰਾਤਮਕਤਾ ਤੇ ਹਮਲੇ ਵਾਲੀ ਸਿਆਸਤ ਕੰਮ ਨਹੀਂ ਕਰਦੀ।