ਓਨਟਾਰੀਓ, 28 ਮਾਰਚ (ਪੋਸਟ ਬਿਊਰੋ) : ਫੋਰਡ ਸਰਕਾਰ ਦਾ ਕਹਿਣਾ ਹੈ ਕਿ ਉਹ ਪਹਿਲੀ ਅਕਤੂਬਰ, 2024 ਤੋਂ ਘੱਟ ਤੋਂ ਘੱਟ ਉਜਰਤਾਂ 17·20 ਡਾਲਰ ਪ੍ਰਤੀ ਘੰਟਾ ਕਰਨ ਜਾ ਰਹੀ ਹੈ।
ਇਸ ਨਾਲ ਮੌਜੂਦਾ 16·55 ਡਾਲਰ ਪ੍ਰਤੀ ਘੰਟੇ ਦੇ ਹਿਸਾਬ ਨਾਲ ਮਿਲਣ ਵਾਲੀਆਂ ਉਜਰਤਾਂ ਵਿੱਚ 65 ਸੈਂਟ (3·9 ਫੀ ਸਦੀ) ਦਾ ਵਾਧਾ ਹੋ ਜਾਵੇਗਾ।ਪ੍ਰੋਵਿੰਸ ਅਨੁਸਾਰ ਜਿਹੜਾ ਵਿਅਕਤੀ ਘੱਟ ਤੋਂ ਘੱਟ ਉਜਰਤ ਨਾਲ ਹਫਤੇ ਦੇ 40 ਘੰਟੇ ਕੰਮ ਕਰਦਾ ਹੈ ਉਸ ਦੀ ਤਨਖਾਹ ਵਿੱਚ ਸਾਲਾਨਾ 1,355 ਡਾਲਰ ਦਾ ਵਾਧਾ ਹੋਵੇਗਾ।ਘੱਟ ਤੋਂ ਘੱਟ ਉਜਰਤਾਂ ਵਿੱਚ ਇਹ ਵਾਧਾ ਸਰਕਾਰ ਦੇ ਵਰਕਿੰਗ ਫੌਰ ਵਰਕਰਜ਼ ਐਕਟ, 2024 ਦਾ ਹਿੱਸਾ ਹੈ।
ਲੇਬਰ ਮੰਤਰੀ ਡੇਵਿਡ ਪਿਚਿਨੀ ਨੇ ਇੱਕ ਰਲੀਜ਼ ਵਿੱਚ ਆਖਿਆ ਕਿ ਇਨ੍ਹਾਂ ਭੱਤਿਆਂ ਵਿੱਚ ਸਾਲਾਨਾ ਵਾਧਾ ਛੇ ਮਹੀਨੇ ਪਹਿਲਾਂ ਹੀ ਕਰਕੇ ਅਸੀਂ ਕਾਰੋਬਾਰੀਆਂ ਲਈ ਜਿੱਥੇ ਸਥਿਰਤਾ ਵਾਲਾ ਮਾਹੌਲ ਮੁਹੱਈਆ ਕਰਵਾ ਰਹੇ ਹਾਂ ਉੱਥੇ ਹੀ ਮਹਿੰਗਾਈ ਦੇ ਇਸ ਦੌਰ ਵਿੱਚ ਘੱਟ ਤੋਂ ਘੱਟ ਉਜਰਤਾਂ ਵਿੱਚ ਵਾਧਾ ਕਰਕੇ ਪਰਿਵਾਰਾਂ ਦੀ ਵੀ ਮਦਦ ਕਰ ਰਹੇ ਹਾਂ। ਇੱਥੇ ਦੱਸਣਾ ਬਣਦਾ ਹੈ ਕਿ ਓਨਟਾਰੀਓ ਲਿਵਿੰਗ ਵੇਜ ਨੈੱਟਵਰਕ ਦੇ ਅੰਦਾਜ਼ੇ ਮੁਤਾਬਕ ਜੀਟੀਏ ਵਿੱਚ ਰਹਿਣ ਲਈ ਘੱਟ ਤੋਂ ਘੱਟ ਉਜਰਤਾਂ 25 ਡਾਲਰ ਪ੍ਰਤੀ ਘੰਟਾ ਚਾਹੀਦੀਆਂ ਹਨ।