ਮਿਸੀਸਾਗਾ, 14 ਅਪਰੈਲ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਸੁੱ਼ਕਰਵਾਰ ਨੂੰ ਮਿਸੀਸਾਗਾ ਪਹੁੰਚ ਕੇ ਆਪਣੀ ਕੈਂਪੇਨ ਰਣਨੀਤੀ ਦੀ ਜਿੱਥੇ ਪਰਖ ਕਰਨ ਦੀ ਕੋਸਿ਼ਸ਼ ਕੀਤੀ ਉੱਥੇ ਹੀ ਵਿਰੋਧੀ ਧਿਰ ਦੇ ਆਗੂ ਐਂਡਰਿਊ ਸ਼ੀਅਰ ਤੇ ਪ੍ਰੋਵਿੰਸ਼ੀਅਲ ਫੋਰਡ ਸਰਕਾਰ ਦੀ ਨੁਕਤਾਚੀਨੀ ਵੀ ਕੀਤੀ।
ਮਿਸੀਸਾਗਾ ਵਿੱਚ 25 ਮਿੰਟ ਦੇ ਆਪਣੇ ਭਾਸ਼ਣ ਵਿੱਚ ਟਰੂਡੋ ਨੇ ਪਿੱਛੇ ਜਿਹੇ ਜਾਰੀ ਕੀਤੇ ਗਏ ਓਨਟਾਰੀਓ ਦੇ ਬਜਟ ਦੀ ਵੀ ਆਲੋਚਨਾ ਕੀਤੀ ਤੇ ਚੇਤਾਵਨੀ ਦਿੱਤੀ ਕਿ ਇਹ ਕਿਸ ਤਰ੍ਹਾਂ ਫੈਡਰਲ ਸਟੇਜ ਤੋਂ ਨਜ਼ਰ ਆ ਸਕਦਾ ਹੈ। ਜਿ਼ਕਰਯੋਗ ਹੈ ਕਿ ਫੋਰਡ ਨੇ ਆਪਣਾ ਪਹਿਲਾ ਬਜਟ ਹੀ ਕਟੌਤੀਆਂ ਵਾਲਾ ਪੇਸ਼ ਕੀਤਾ। ਇਨ੍ਹਾਂ ਕਟੌਤੀਆਂ ਵਿੱਚ ਕਿਸਾਨਾਂ ਲਈ ਸੇਵਾਵਾਂ ਵਿੱਚ ਕਟੌਤੀ, ਫਰੈਂਕੋ-ਓਨਟਾਰੀਓ ਵਾਸੀਆਂ ਲਈ ਸੇਵਾਵਾਂ ਵਿੱਚ ਕਟੌਤੀ, ਸੀਨੀਅਰਜ਼ ਲਈ ਕਟੌਤੀ, ਪੋਸਟ ਸੈਕੰਡਰੀ ਵਿਦਿਆਰਥੀਆਂ ਲਈ ਕਟੌਤੀ, ਮੂਲਵਾਸੀ ਲੋਕਾਂ ਲਈ ਕਟੌਤੀ, ਬੱਚਿਆਂ ਤੇ ਜੋ ਕੋਈ ਵੀ ਕਮਿਊਨਿਟੀ ਸੋਸ਼ਲ ਸਰਵਿਸਿਜ਼ ਉੱਤੇ ਨਿਰਭਰ ਕਰਦਾ ਹੈ, ਉਸ ਲਈ ਕਟੌਤੀ ਸ਼ਾਮਲ ਹਨ।
ਟਰੂਡੋ ਨੇ ਆਖਿਆ ਕਿ ਐਂਡਰਿਊ ਸ਼ੀਅਰ ਆਪਣਾ ਮਾਰਗ ਦਰਸ਼ਨ ਓਨਟਾਰੀਓ ਦੇ ਪ੍ਰੀਮੀਅਰ ਤੋਂ ਲੈਂਦੇ ਹਨ, ਇਸ ਲਈ ਕੈਨੇਡੀਅਨਾਂ ਨੂੰ ਇਸ ਗੱਲ ਨੂੰ ਧਿਆਨ ਵਿੱਚ ਰੱਖਣਾ ਚਾਹੀਦਾ ਹੈ ਕਿ ਜੇ ਉਹ ਕਦੇ ਭਵਿੱਖ ਵਿੱਚ ਪ੍ਰਧਾਨ ਮੰਤਰੀ ਚੁਣੇ ਜਾਂਦੇ ਹਨ ਤੇ ਓਨਟਾਰੀਓ ਵਰਗਾ ਹਾਲ ਹੀ ਸਮੁੱਚੇ ਕੈਨੇਡਾ ਦਾ ਹੋਵੇਗਾ। ਉਨ੍ਹਾਂ ਵੱਲੋਂ ਵੀ ਹਰੇਕ ਥਾਂ ਉੱਤੇ ਕਟੌਤੀ ਕੀਤੀ ਜਾਵੇਗੀ।
ਭਾਵੇਂ ਫੋਰਡ ਸਰਕਾਰ ਵੱਲੋਂ ਕਈ ਪ੍ਰੋਗਰਾਮਾਂ ਤੇ ਸੇਵਾਵਾਂ ਵਿੱਚ ਕਟੌਤੀਆਂ ਕੀਤੀਆਂ ਗਈਆਂ ਹਨ ਪਰ ਇਹ ਉਮੀਦ ਨਾਲੋਂ ਅਜੇ ਵੀ ਘੱਟ ਹਨ। ਪ੍ਰੋਵਿੰਸ਼ੀਅਲ ਸਰਕਾਰ ਅਜੇ ਵੀ 12 ਬਿਲੀਅਨ ਡਾਲਰ ਦੇ ਘਾਟੇ ਵਿੱਚ ਚੱਲ ਰਹੀ ਹੈ। ਟਰੂਡੋ ਨੇ ਫੋਰਡ ਦੇ ਵਾਤਾਵਰਣ ਸਬੰਧੀ ਰਿਕਾਰਡ ਦੀ ਵੀ ਆਲੋਚਨਾ ਕੀਤੀ। ਉਨ੍ਹਾਂ ਆਖਿਆ ਕਿ ਜੇ ਸ਼ੀਅਰ ਪ੍ਰਧਾਨ ਮੰਤਰੀ ਚੁਣੇ ਜਾਂਦੇ ਹਨ ਤਾਂ ਉਨ੍ਹਾਂ ਦਾ ਦਾਅਵਾ ਹੈ ਕਿ ਉਹ ਕੈਨੇਡਾ ਨੂੰ ਪ੍ਰਦੂਸ਼ਣ ਮੁਕਤ ਕਰ ਦੇਣਗੇ। ਉਹ ਸਾਨੂੰ ਸਟੀਫਨ ਹਾਰਪਰ ਦੇ ਦੌਰ ਵਿੱਚ ਲਿਜਾਣਾ ਚਾਹੁੰਦੇ ਹਨ ਜਦੋਂ ਇਸ ਪਾਸੇ ਕੋਈ ਕਾਰਵਾਈ ਨਹੀਂ ਸੀ ਕੀਤੀ ਗਈ।
ਟਰੂਡੋ ਨੇ ਆਪਣੀ ਸਿਫਤ ਕਰਦਿਆਂ ਆਖਿਆ ਕਿ 2015 ਵਿੱਚ ਉਨ੍ਹਾਂ ਦੀ ਸਰਕਾਰ ਬਣਨ ਉੱਤੇ ਸੱਭ ਤੋਂ ਪਹਿਲਾਂ ਉਨ੍ਹਾਂ ਅਮੀਰਾਂ ਉੱਤੇ ਟੈਕਸ ਲਾਏ ਸਨ ਤੇ ਮੱਧ ਵਰਗ ਲਈ ਟੈਕਸਾਂ ਵਿੱਚ ਕਟੌਤੀ ਕੀਤੀ ਸੀ। ਉਨ੍ਹਾਂ ਫੋਰਡ ਵੱਲੋਂ ਅਕਸਰ ਬੋਲੇ ਜਾਣ ਵਾਲੇ ਕਾਫੀਏ ਦਾ ਮਜ਼ਾਕ ਉਡਾਉਂਦਿਆਂ ਆਖਿਆ ਕਿ ਜੇ ਤੁਸੀਂ ਲੋਕਾਂ ਲਈ ਕੰਮ ਕਰਨਾ ਚਾਹੁੰਦੇ ਹੋਂ ਤਾਂ ਇਸ ਨੂੰ ਕਹਿੰਦੇ ਹਨ ਲੋਕਾਂ ਲਈ ਕੀਤਾ ਗਿਆ ਕੰਮ।