ਮਾਰਖਮ, 11 ਅਪਰੈਲ (ਪੋਸਟ ਬਿਊਰੋ) : ਟੂਰਿੰਗ ਫਿਊਜ਼ਨ ਲੈਬਜ਼ ਵੱਲੋਂ ਮਾਰਖਮ, ਓਨਟਾਰੀਓ ਦੇ ਪਿਏਰੇ ਐਲੀਅਟ ਟਰੂਡੋ ਸਕੂਲ ਵਿੱਚ ਪਹਿਲੀ ਵਾਰੀ ਹੈਕਾਥਨ ਕਰਵਾਈ ਗਈ। ਇਹ ਹੈਕਾਥਨ 10 ਤੋਂ 15 ਸਾਲ ਦੇ ਬੱਚਿਆਂ ਲਈ ਮਨੋਰੰਜਨ ਭਰਿਆ ਦਿਨ ਰਹੀ। ਇੱਥੇ ਉਨ੍ਹਾਂ ਵੈੱਬ ਐਪਲੀਕੇਸ਼ਨ ਤਿਆਰ ਕਰਨੀ ਸਿੱਖੀ ਤੇ ਜਿਸ ਦੀ ਵਰਤੋਂ ਉਹ ਆਪਣੇ ਦੋਸਤਾਂ ਨਾਲ ਚੀਜ਼ਾਂ ਸਾਂਝੀਆਂ ਕਰਨ ਲਈ ਕਰ ਸਕਦੇ ਸਨ।
ਇਸ ਹੈਕਾਥਨ ਵਿੱਚ ਹਿੱਸਾ ਲੈਣ ਵਾਲਿਆਂ ਨੇ ਅਤਿ ਆਧੁਨਿਕ ਵੈੱਬ ਟੈਕਨਾਲੋਜੀਜ਼ ਦੀ ਵਰਤੋਂ ਕਰਦਿਆਂ ਹੋਇਆਂ ਨਵੀਂ ਸਾਫਟਵੇਅਰ ਡਿਵੈਲਪਮੈਂਟ ਤਕਨੀਕਾਂ ਰਾਹੀਂ ਆਪਣੀ ਐਪਲੀਕੇਸ਼ਨ ਤਿਆਰ ਕੀਤੀ। ਪੰਜ ਸਪਰਿੰਟਸ ਦੀ ਇਸ ਸੀਰੀਜ਼ ਦਰਮਿਆਨ ਬੱਚਿਆਂ ਦੇ ਮਨੋਰੰਜਨ ਦਾ ਵੀ ਪੂਰਾ ਇੰਤਜ਼ਾਮ ਸੀ ਤਾਂ ਕਿ ਉਹ ਬਿਲਕੁਲ ਤਰੋਤਾਜ਼ਾ ਰਹਿ ਸਕਣ। ਇਸ ਦੌਰਾਨ ਬੱਚਿਆਂ ਨੂੰ ਮੈਡਲਜ਼ ਵੀ ਦਿੱਤੇ ਗਏ ਤੇ ਕਈ ਹੋਰ ਤਰ੍ਹਾਂ ਦੇ ਇਨਾਮ ਜਿਵੇਂ ਕਿ ਕੋਡ ਸਮੂਰਾਇ ਟੀ-ਸ਼ਰਟਸ, ਮੈਗਨੈੱਟਸ ਤੇ ਸਟਿੱਕਰ ਆਦਿ ਵੀ ਦਿੱਤੇ ਗਏ।
ਵਾਲੰਟੀਅਰ ਮੈਂਟਰਜ਼, ਜੋ ਕਿ ਪ੍ਰੋਫੈਸ਼ਨਲ ਸਾਫਟਵੇਅਰ ਇੰਜੀਨੀਅਰ ਸਨ, ਨੇ ਸਾਰਾ ਦਿਨ ਟੀਮ ਦੀ ਮਦਦ ਕੀਤੀ। ਟੀਐਫਐਲ ਦੇ ਰਿੱਕ ਤੇ ਸੌਰਭ ਨੇ ਆਖਿਆ ਕਿ ਅਸੀਂ ਇਸ ਤਰ੍ਹਾਂ ਦਾ ਈਵੈਂਟ ਕਰਵਾ ਕੇ ਕਾਫੀ ਖੁਸ ਹਾਂ। ਉਨ੍ਹਾਂ ਆਖਿਆ ਕਿ ਸਾਫਟਵੇਅਰ ਇੰਜੀਨੀਅਰ ਹੋਣ ਨਾਤੇ ਕੰਪਿਊਟਰ ਇੰਜੀਨੀਅਰਜ ਦੀ ਅਗਲੀ ਪੀੜ੍ਹੀ ਤਿਆਰ ਹੁੰਦੀ ਵੇਖਣ ਦਾ ਆਪਣਾ ਹੀ ਸਵਾਦ ਹੈ। ਉਨ੍ਹਾਂ ਆਖਿਆ ਕਿ ਇਸ ਈਵੈਂਟ ਦੌਰਾਨ ਬੱਚਿਆਂ ਵੱਲੋਂ ਸਿੱਖੀਆਂ ਗਈਆ ਤਕਨੀਕਾਂ ਉਨ੍ਹਾਂ ਦੇ ਭਵਿੱਖ ਵਿੱਚ ਕੰਮ ਆਉਣਗੀਆਂ।