ਓਟਵਾ, 2 ਅਪਰੈਲ (ਪੋਸਟ ਬਿਊਰੋ) : ਐਮਪੀ ਟੋਨੀ ਕਲੇਅਮੈਂਟ ਨੇ ਇਹ ਸਾਫ ਕਰ ਦਿੱਤਾ ਹੈ ਕਿ ਉਹ ਮੁੜ ਤੋਂ ਚੋਣਾਂ ਵਿੱਚ ਹਿੱਸਾ ਨਹੀਂ ਲੈਣਗੇ। ਉਨ੍ਹਾਂ ਇਹ ਵੀ ਆਖਿਆ ਕਿ ਉਨ੍ਹਾਂ ਦੀ ਜਿੰ਼ਦਗੀ ਬਿਹਤਰ ਢੰਗ ਨਾਲ ਬੀਤੀ ਹੈ ਤੇ ਅੱਗੇ ਵੀ ਉਹ ਇਹੋ ਜਿਹੀ ਬਿਹਤਰ ਜਿ਼ੰਦਗੀ ਹੀ ਜਿਊਣਾ ਚਾਹੁੰਦੇ ਹਨ।
ਇੱਕ ਨਾਲੋਂ ਜਿ਼ਆਦਾ ਮਹਿਲਾਵਾਂ ਨਾਲ ਅਢੁਕਵੇਂ ਆਨਲਾਈਨ ਸਬੰਧ ਰੱਖਣ ਦੀ ਗੱਲ ਜੱਗ ਜ਼ਾਹਿਰ ਹੋਣ ਤੇ ਇਸ ਨੂੰ ਸਵੀਕਾਰਨ ਤੋਂ ਬਾਅਦ ਕਲੇਅਮੈਂਟ ਨੂੰ ਕੰਜ਼ਰਵੇਟਿਵ ਕਾਕਸ ਵਿੱਚੋਂ ਕੱਢ ਦਿੱਤਾ ਗਿਆ ਸੀ। ਮੰਗਲਵਾਰ ਨੂੰ ਦਿੱਤੇ ਬਿਆਨ ਵਿੱਚ ਕਲੇਅਮੈਂਟ ਨੇ ਆਖਿਆ ਕਿ ਨਿਜੀ ਸੰਕਟ ਤੋਂ ਬਾਅਦ ਉਨ੍ਹਾਂ ਦੀ ਜਿੰ਼ਦਗੀ ਮੁੜ ਲੀਹ ਉੱਤੇ ਆ ਚੁੱਕੀ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਆਖਿਆ ਕਿ ਇਸ ਦੇ ਬਾਵਜੂਦ ਉਹ ਪੈਰੀ ਸਾਊਂਡ-ਮਸਕੋਕਾ ਤੋਂ ਚੋਣ ਨਹੀਂ ਲੜਨਗੇ।
ਆਪਣੀ ਵੈੱਬਸਾਈਟ ਉੱਤੇ ਪੋਸਟ ਕੀਤੇ ਬਿਆਨ ਵਿੱਚ ਕਲੇਅਮੈਂਟ ਨੇ ਆਖਿਆ ਕਿ ਹੁਣ ਅੱਗੇ ਵੱਧਣ ਦਾ ਸਮਾਂ ਆ ਗਿਆ ਹੈ। ਇਹ ਕੋਈ ਔਖਾ ਫੈਸਲਾ ਨਹੀਂ ਹੈ ਸਗੋਂ ਇਹ ਸਹੀ ਫੈਸਲਾ ਹੈ। ਉਨ੍ਹਾਂ ਆਖਿਆ ਕਿ ਇਸ ਫੈਸਲੇ ਦੀ ਉਨ੍ਹਾਂ ਨੂੰ ਤੇ ਉਨ੍ਹਾਂ ਦੇ ਪਰਿਵਾਰ ਨੂੰ ਤਸੱਲੀ ਹੈ। ਹੁਣ ਆਜ਼ਾਦ ਐਮਪੀ ਬਣ ਚੁੱਕੇ ਕਲੇਅਮੈਂਟ ਨੇ ਆਖਿਆ ਕਿ ਉਹ ਆਪਣਾ ਕਾਰਜਕਾਲ ਜ਼ਰੂਰ ਪੂਰਾ ਕਰਨਗੇ। ਕਲੇਅਮੈਂਟ ਨੇ ਇਹ ਵੀ ਆਖਿਆ ਕਿ ਅਕਤੂਬਰ ਵਿੱਚ ਹੋਣ ਵਾਲੀਆਂ ਫੈਡਰਲ ਚੋਣਾਂ ਵਿੱਚ ਉਹ ਐਂਡਰਿਊ ਸ਼ੀਅਰ ਤੇ ਕੰਜ਼ਰਵੇਟਿਵ ਪਾਰਟੀ ਦਾ ਹੀ ਸਮਰਥਨ ਕਰਨਗੇ।