ਬਰੈਂਪਟਨ ਪੋਸਟ ਬਿਉਰੋ: ਕੈਨੇਡੀਅਨ ਪੰਜਾਬੀ ਪੋਸਟ ਦੇ ਮਾਰਕੀਟਿੰਗ ਐਗਜ਼ੈਕਟਿਵ ਸਰਦਾਰ ਹਰਬੇਲ ਸਿੰਘ ਨਾਗਪਾਲ ਕੱਲ ਐਤਵਾਰ ਨੂੰ ਸਵੇਰੇ 8 ਵਜੇ ਦੇ ਕਰੀਬ ਦਿਲ ਦਾ ਦੌਰਾ ਪੈਣ ਕਾਰਣ ਅਕਾਲ ਚਲਾਣਾ ਕਰ ਗਏ ਹਨ। ਨੇਕ-ਦਿਲ ਇਨਸਾਨ, ਮਿਲਾਪੜੇ ਸੁਭਾਅ ਦੇ ਮਾਲਕ, ਅਤੇ ਪਰਿਵਾਰ ਦੀ ਸੁਖ ਸਲਾਮਤੀ ਲਈ ਸਖ਼ਤ ਮਿਹਨਤ ਨੂੰ ਪ੍ਰਣਾਏ ਹੋਏ ਹਰਬੇਲ ਸਿੰਘ ਨਾਗਪਾਲ ਦਾ ਅਚਾਨਕ ਚਲਿਆ ਜਾਣਾ ਉਹਨਾਂ ਦੇ ਪਰਿਵਾਰ ਦੇ ਨਾਲ 2 ਸਮੁੱਚੇ ਕੈਨੇਡੀਅਨ ਪੰਜਾਬੀ ਪੋਸਟ ਅਦਾਰੇ ਅਤੇ ਬਰੈਂਪਟਨ/ਮਿਸੀਸਾਗਾ ਦੇ ਬਿਜਸਨ ਹਲਕਿਆਂ ਲਈ ਵੱਡਾ ਘਾਟਾ ਹੈ।
ਸਵਰਗੀ ਨਾਗਪਾਲ ਦੇ ਬੇਟੇ ਸਤਿੰਦਰਪਾਲ (ਐਸ ਪੀ) ਸਿੰਘ ਨਾਗਪਾਲ ਨੇ ਦੱਸਿਆ ਕਿ ਹਮੇਸ਼ਾ ਦੀ ਤਰਾਂ ਆਪਣੇ ਅਕੀਦੇ ਮੁਤਾਬਕ ਪੰਜ ਇਸ਼ਨਾਨ ਕਰਕੇ ਉਹਨਾਂ ਉੱਠ ਕੇ ਰੱਬ ਦਾ ਪਾਠ ਕੀਤਾ। ਉਪਰੰਤ ਥੋੜੀ ਦੇਰ ਸੁਸਤਾਉਣ ਤੋਂ ਬਾਅਦ ਜਦੋਂ ਇਸ਼ਨਾਨ ਲਈ ਜਾਣ ਲੱਗੇ ਤਾਂ ਉਹਨਾਂ ਛਾਤੀ ਵਿੱਚ ਥੋੜਾ ਦਰਦ ਹੋਣ ਬਾਰੇ ਕਿਹਾ। ਪਰਿਵਾਰ ਦੇ ਮੈਂਬਰਾਂ ਨੇ ਡਾਕਟਰੀ ਸਲਾਹ ਜਾਂ 911 ਕਾਲ ਕਰਨ ਲਈ ਪੁੱਛਿਆ ਪਰ ਦਰਦ ਨੂੰ ਮਾਮੂਲੀ ਜਾਣ ਕੇ ਸ੍ਰੀ ਨਾਗਪਾਲ ਇਸ਼ਨਾਨ ਕਰਨ ਚਲੇ ਗਏ। ਸ਼ਾਵਰ ਵਿੱਚੋਂ ਬਾਹਰ ਆ ਕੇ ਉਹ ਅਚਾਨਕ ਨਿਢਾਲ ਹੋ ਗਏ। 911 ਕਾਲ ਤੋਂ ਬਾਅਦ ਉਹਨਾਂ ਨੂੰ ਜਾਰਜ ਟਾਊਨ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਹ ਇਸ ਫਾਨੀ ਸੰਸਾਰ ਨੂੰ ਸਦਾ ਲਈ ਅਲਵਿਦਾ ਆਖ ਗਏ।
ਸ੍ਰੀ ਨਾਗਪਾਲ 2010 ਵਿੱਚ ਆਪਣੇ ਬੇਟੇ ਐਸ ਡੀ ਨਾਗਪਾਲ ਵੱਲੋਂ ਸਪਾਂਪਰ ਹੋ ਕੇ ਕੈਨੇਡਾ ਆਏ ਸਨ ਅਤੇ ਉਸ ਵੇਲੇ ਤੋਂ ਹੀ ਪੰਜਾਬੀ ਪੋਸਟ ਟੀਮ ਦਾ ਅਨਿੱਖੜਵਾਂ ਅੰਗ ਬਣੇ ਰਹੇ ਸਨ। ਉਹ ਆਪਣੇ ਪਿੱਛੇ ਪਤਨੀ ਬੀਬੀ ਜੁਗਿੰਦਰ ਕੌਰ ਨਾਗਪਾਲ, ਬੇਟਾ ਐਸ ਪੀ ਨਾਗਪਾਲ ਅਤੇ ਬੇਟੀ ਗੁਰਪ੍ਰੀਤ ਕੌਰ (ਮੁਹਾਲੀ, ਪੰਜਾਬ ਵਾਸੀ) ਛੱਡ ਗਏ ਹਨ।
ਸ੍ਰੀ ਨਾਗਪਾਲ ਦੇ ਅੰਤਮ ਸੰਸਕਾਰ ਦੀਆਂ ਰਸਮਾਂ 24 ਮਾਰਚ ਦਿਨ ਐਤਵਾਰ ਨੂੰ ਬਰੈਮਵਿਨ ਕੋਰਟ ਉੱਤੇ ਸਥਿਤ ਬਰੈਂਪਟਨ ਫਿਊਨਰਲ ਅਤੇ ਕਰੈਮੇਟੋਰੀਅਮ ਵਿਖੇ ਦੁਪਿਹਰ 12 ਵਜੇ ਤੋਂ ਬਾਅਦ ਦੁਪਹਿਰ 2 ਵਜੇ ਤੱਕ ਹੋਣਗੀਆਂ। ਇਸ ਉਪਰੰਤ ਉਹਨਾਂ ਨਮਿੱਤ ਪਾਠ ਦਾ ਭੋਗ ਅਤੇ ਅਰਦਾਸ ਬਰੈਂਪਟਨ ਵਿੱਚ ਸਨਪੈਕ ਬੂਲੇਬਵਾਰਡ ਉੱਤੇ ਸਥਿਤ ਗੁਰਦੁਆਰਾ ਜੋਤ ਪ੍ਰਕਾਸ਼ ਵਿਖੇ ਬਾਅਦ ਦੁਪਹਿਰ 3 ਵਜੇ ਤੋਂ ਸ਼ਾਮੀ ਸਾਢੇ ਪੰਜ ਵਜੇ ਤੱਕ ਹੋਵਗੀ।
ਪਰਿਵਾਰ ਨਾਲ ਦੁੱਖ ਸਾਂਝਾ ਕਰਨ ਲਈ ਸਤਿੰਦਰਪਾਲ (ਐਸ ਪੀ) ਨਾਗਪਾਲ 416-709-4525 ਜਾਂ ਕਰਨਜੀਤ ਸਿੰਘ ਹੁੰਦਲ 647-401-7866 ਉੱਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।