ਓਟਵਾ, 13 ਮਾਰਚ (ਪੋਸਟ ਬਿਊਰੋ) : ਟਰਾਂਸਪੋਰਟ ਮੰਤਰੀ ਮਾਰਕ ਗਾਰਨਿਊ ਇਸ ਬਾਰੇ ਸਪਸ਼ਟ ਕਰਨਗੇ ਕਿ ਬੋਇੰਗ 737 ਮੈਕਸ 8 ਬਾਰੇ ਓਟਵਾ ਦੀ ਸਥਿਤੀ ਕੀ ਹੈ। ਇਹ ਉਹ ਜਹਾਜ਼ ਹੈ ਜਿਹੜਾ ਇਥੋਪੀਆ ਵਿੱਚ ਹਾਦਸੇ ਦਾ ਸਿ਼ਕਾਰ ਹੋਇਆ। ਇਥੋਪੀਅਨ ਏਅਰਲਾਈਨਜ਼ ਦੇ ਹਾਦਸੇ ਦਾ ਸਿ਼ਕਾਰ ਹੋਏ ਇਸ ਲੜੀ ਦੇ ਜਹਾਜ਼ ਤੋਂ ਬਾਅਦ ਕਈ ਮੁਲਕਾਂ ਵੱਲੋਂ ਇਸ ਮਾਡਲ ਦੇ ਜਹਾਜ਼ਾਂ ਉੱਤੇ ਪਾਬੰਦੀ ਲਾਏ ਜਾਣ ਮਗਰੋਂ ਹੁਣ ਸਾਰਿਆਂ ਦੀਆਂ ਨਜ਼ਰਾਂ ਕੈਨੇਡਾ ਉੱਤੇ ਲੱਗੀਆਂ ਹਨ ਕਿ ਉਹ ਇਸ ਬਾਰੇ ਕੀ ਫੈਸਲਾ ਲੈਂਦਾ ਹੈ।
ਗਾਰਨਿਊ ਵੱਲੋਂ ਕੈਨੇਡਾ ਦੀ ਯੋਜਨਾ ਤੇ ਸੇਫਟੀ ਸਬੰਧੀ ਮੈਕਸ 8 ਬਾਰੇ ਕੈਨੇਡਾ ਕੀ ਫੈਸਲਾ ਲਵੇਗਾ ਇਸ ਬਾਰੇ ਅਜੇ ਕੁੱਝ ਸਪਸ਼ਟ ਨਹੀਂ ਹੋਇਆ ਹੈ। ਗਾਰਨਿਊ ਵੱਲੋਂ ਹੀ ਇਸ ਮੁੱਦੇ ਉੱਤੇ ਕੈਨੇਡਾ ਦੀ ਯੋਜਨਾ ਬਾਰੇ ਦੱਸਿਆ ਜਾਣਾ ਹੈ। ਇਸ ਬਾਰੇ ਅੱਪਡੇਟ ਉਦੋਂ ਹੋਇਆ ਜਦੋਂ ਟੋਰਾਂਟੋ ਸਥਿਤ ਸਨਵਿੰਗ ਏਅਰਲਾਈਨਜ਼ ਨੇ ਮੰਗਲਵਾਰ ਨੂੰ ਇਹ ਐਲਾਨ ਕੀਤਾ ਕਿ ਉਹ ਆਰਜ਼ੀ ਤੌਰ ਉੱਤੇ ਆਪਣੇ ਚਾਰ ਬੋਇੰਗ 737 ਮੈਕਸ 8 ਜਹਾਜ਼ਾਂ ਨੂੰ ਕੰਮ ਵਿੱਚ ਨਾ ਲਿਆਉਣ ਦਾ ਫੈਸਲਾ ਕਰ ਰਹੀ ਹੈ। ਜਿ਼ਕਰਯੋਗ ਹੈ ਕਿ ਏਅਰਲਾਈਨਜ਼ ਵੱਲੋਂ ਐਡਿਸ ਅਬਾਬਾ ਵਿੱਚ ਇਥੋਪੀਅਨ ਏਅਰਲਾਈਜ਼ ਦੇ ਇਸੇ ਮਾਡਲ ਦੇ ਜਹਾਜ਼ ਨੂੰ ਪੇਸ਼ ਆਏ ਹਾਦਸੇ ਤੋਂ ਬਾਅਦ ਇਹ ਫੈਸਲਾ ਲਿਆ ਗਿਆ। ਇਸ ਹਾਦਸੇ ਵਿੱਚ 157 ਲੋਕ ਮਾਰੇ ਗਏ, ਜਿਨ੍ਹਾਂ ਵਿੱਚੋਂ 18 ਕੈਨੇਡੀਅਨ ਸਨ।
ਸਨਵਿੰਗ ਦਾ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਕਮਰਸ਼ੀਅਲ ਕਾਰਨਾਂ ਕਰਕੇ ਇਹ ਫੈਸਲਾ ਲਿਆ ਗਿਆ ਹੈ। ਇਸ ਦਾ ਸੇਫਟੀ ਨਾਲ ਕੋਈ ਲੈਣਾ ਦੇਣਾ ਨਹੀਂ ਹੈ। ਗਾਰਨਿਊ ਇਸ ਮਾਮਲੇ ਨੂੰ ਲੈ ਕੇ ਅਜੀਬ ਦੁਚਿੱਤੀ ਵਿੱਚ ਹਨ। ਇਸ ਏਅਰਕ੍ਰਾਫਟ ਨੂੰ ਕਈ ਦੇਸਾਂ ਵੱਲੋਂ ਛੱਡਣ ਦਾ ਫੈਸਲਾ ਕੀਤਾ ਗਿਆ ਹੈ ਜਾਂ ਇਸ ਹਾਦਸੇ ਤੋਂ ਬਾਅਦ ਇਸ ਉੱਤੇ ਪਾਬੰਦੀ ਲਾਉਣ ਦਾ ਫੈਸਲਾ ਕੀਤਾ ਗਿਆ ਹੈ। ਇਸ ਮਾਡਲ ਦੇ ਜਹਾਜ, ਜੋ ਕਿ ਲਾਇਨ ਏਅਰਲਾਈਨ ਕੋਲ ਸੀ, ਨਾਲ ਪਿਛਲੇ ਸਾਲ ਅਕਤੂਬਰ ਵਿੱਚ ਹਾਦਸਾ ਪੇਸ ਆਇਆ ਸੀ ਤੇ ਉਸ ਸਮੇਂ 189 ਲੋਕ ਮਾਰੇ ਗਏ ਸਨ। ਇਸ ਤੋਂ ਪਹਿਲਾਂ ਗਾਰਨਿਊ ਨੇ ਮੰਗਲਵਾਰ ਨੂੰ ਇਹ ਆਖਿਆ ਸੀ ਕਿ ਮੈਕਸ 8 ਨੂੰ ਕੈਨੇਡਾ ਦੇ ਫਲੀਟ ਵਿੱਚੋਂ ਕੱਢਣ ਦੀ ਉਨ੍ਹਾਂ ਦੀ ਕੋਈ ਯੋਜਨਾ ਨਹੀਂ ਹੈ।