ਮਿਸੀਸਾਗਾ, 11 ਮਾਰਚ (ਪੋਸਟ ਬਿਊਰੋ) : ਸੁੱ਼ਕਰਵਾਰ ਦੇਰ ਰਾਤ ਮਿਸੀਸਾਗਾ ਵਿੱਚ ਛੁਰੇਬਾਜ਼ੀ ਦੀ ਵਾਪਰੀ ਘਟਨਾ ਵਿੱਚ 54 ਸਾਲਾ ਵਿਅਕਤੀ ਮਾਰਿਆ ਗਿਆ ਤੇ ਉਸ ਦੀ ਲਿਵ-ਇਨ ਪਾਰਟਨਰ ਉੱਤੇ ਪੁਲਿਸ ਵੱਲੋਂ ਸੈਕਿੰਡ ਡਿਗਰੀ ਮਰਡਰ ਦੇ ਦੋਸ ਲਾਏ ਗਏ ਹਨ।
ਇਹ ਘਟਨਾ ਹੁਰੌਨਤਾਰੀਓ ਸਟਰੀਟ ਤੇ ਲੇਕਸੋਰ ਰੋਡ ਦੇ ਗੁਆਂਢ ਵਿੱਚ ਐਲ ਸਟਰੀਟ ਉੱਤੇ ਸਥਿਤ ਰਿਹਾਇਸੀ ਇਮਾਰਤ ਦੀ ਇੱਕ ਯੂਨਿਟ ਵਿੱਚ ਵਾਪਰੀ। ਗੁਆਂਢੀਆਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਹਿਸਾਬ ਨਾਲ ਛੁਰੇਬਾਜੀ ਦੀ ਇਹ ਘਟਨਾ 14ਵੀਂ ਮੰਜਿਲ ਉੱਤੇ ਵਾਪਰੀ। ਪਰ ਪੁਲਿਸ ਵੱਲੋਂ ਇਸ ਦੀ ਪੁਸਟੀ ਨਹੀਂ ਕੀਤੀ ਗਈ।
ਮ੍ਰਿਤਕ ਦੀ ਪਛਾਣ ਪੁਲਿਸ ਵੱਲੋਂ ਮਾਈਕਲ ਜੌਹਨਸਟਨ ਵਜੋਂ ਕੀਤੀ ਗਈ। ਪਹਿਲਾਂ ਉਸ ਨੂੰ ਗੰਭੀਰ ਜਖਮੀ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ ਪਰ ਬਾਅਦ ਵਿੱਚ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਪੁਲਿਸ ਨੇ ਦੱਸਿਆ ਕਿ 48 ਸਾਲਾ ਮੈਰੀ ਜੁਬਾਨੋਵਿੱਚ ਨੂੰ ਇਸ ਮਾਮਲੇ ਵਿੱਚ ਚਾਰਜ ਕੀਤਾ ਗਿਆ ਹੈ।