ਓਨਟਾਰੀਓ, 7 ਮਾਰਚ (ਪੋਸਟ ਬਿਊਰੋ) : ਦੱਖਣ ਪੱਛਮੀ ਓਨਟਾਰੀਓ ਵਿੱਚ ਇੱਕ ਚੋਰੀ ਕੀਤੇ ਹੋਏ ਪਿੱਕਅੱਪ ਟਰੱਕ ਵਿੱਚ ਤਿੰਨ ਵਿਅਕਤੀਆਂ ਦੀਆਂ ਲਾਸ਼ਾਂ ਮਿਲਣ ਤੋਂ ਚਾਰ ਮਹੀਨੇ ਬਾਅਦ ਪੁਲਿਸ ਨੇ ਇਸ ਸਬੰਧ ਵਿੱਚ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤੇ ਜਾਣ ਦਾ ਦਾਅਵਾ ਕੀਤਾ ਹੈ।
ਪ੍ਰੋਵਿੰਸ਼ੀਅਲ ਪੁਲਿਸ ਤੇ ਕਮਿਊਨਿਟੀ ਆਫ ਸਿਕਸ ਨੇਸ਼ਨਜ਼, ਓਨਟਾਰੀਓ, ਜਿੱਥੇ ਮਾਰੇ ਗਏ ਤਿੰਨੇ ਵਿਅਕਤੀ ਰਹਿੰਦੇ ਸਨ, ਦੀ ਪੁਲਿਸ ਨੇ ਵੀਰਵਾਰ ਦੁਪਹਿਰ ਨੂੰ ਇਸ ਸਬੰਧ ਵਿੱਚ ਪ੍ਰੈੱਸ ਕਾਨਫਰੰਸ ਵਿੱਚ ਐਲਾਨ ਕੀਤਾ। ਮਾਈਕਲ ਜੈਮੀਸਨ, ਮੈਲੀਸਾ ਮਿੱਲਰ ਤੇ ਐਲਨ ਪੌਰਟਰ ਦੀਆਂ ਲਾਸ਼ਾਂ 4 ਨਵੰਬਰ, 2018 ਨੂੰ ਲੰਡਨ, ਓਨਟਾਰੀਓ ਦੇ ਦੱਖਣ ਪੱਛਮ ਵੱਲ ਮਿਲੀਆਂ ਸਨ। ਜਿਸ ਟਰੱਕ ਵਿੱਚ ਇਹ ਲਾਸ਼ਾਂ ਪਾਈਆਂ ਗਈਆਂ ਸਨ ਉਸ ਦੇ ਚੋਰੀ ਹੋਣ ਦੀ ਵੀ ਖਬਰ ਪਹਿਲਾਂ ਲਿਖਾਈ ਜਾ ਚੁੱਕੀ ਸੀ।
ਆਪਣੀ ਮੌਤ ਸਮੇਂ ਮਿੱਲਰ ਸੱਤ ਮਹੀਨਿਆਂ ਦੀ ਗਰਭਵਤੀ ਸੀ। ਮ੍ਰਿਤਕਾਂ ਦੇ ਦੋਸਤਾਂ ਨੇ ਦੱਸਿਆ ਕਿ ਮਿੱਲਰ, ਜੈਮੀਸਨ ਤੇ ਪੌਰਟਰ ਤਿੰਨੇ ਬਹੁਤ ਹੀ ਗੂੜ੍ਹੇ ਦੋਸਤ ਸਨ ਤੇ ਤਿੰਨਾਂ ਦੇ ਹੀ ਬੱਚੇ ਵੀ ਸਨ। ਗ੍ਰਿਫਤਾਰ ਕੀਤੇ ਗਏ ਵਿਅਕਤੀਆਂ ਵਿੱਚ ਸਿਕਸ ਨੇਸ਼ਨਜ਼ ਦੇ ਤਿੰਨ ਵਾਸੀ ਜਿਨ੍ਹਾਂ ਵਿੱਚ 36 ਸਾਲਾ ਨਿਕੋਲਸ ਸਿ਼ਪਮੈਨ, 30 ਸਾਲਾ ਥੌਮਸ ਬੌਮਬੈਰੀ ਤੇ 32 ਸਾਲਾ ਜੇਮੀ ਬੀਵਰ ਸ਼ਾਮਲ ਹਨ। ਸਿ਼ਪਮੈਨ ਨੂੰ ਸੈਕਿੰਡ ਡਿਗਰੀ ਮਰਡਰ ਦੇ ਤਿੰਨ ਮਾਮਲਿਆਂ ਵਿੱਚ ਚਾਰਜ ਕੀਤਾ ਗਿਆ ਹੈ ਤੇ ਬੌਮਬੇਰੀ ਨੂੰ ਦੋ ਤੇ ਬੀਵਰ ਨੂੰ ਇੱਕ ਮਾਮਲੇ ਵਿੱਚ ਚਾਰਜ ਕੀਤਾ ਗਿਆ ਹੈ।
ਅਦਾਲਤ ਵਿੱਚ ਪੇਸ਼ ਦਸਤਾਵੇਜ਼ਾਂ ਅਨੁਸਾਰ ਜੈਮੀਸਨ, ਮਿੱਲਰ ਤੇ ਪੌਰਟਰ 30 ਅਕਤੂਬਰ, 2018 ਨੂੰ ਜਾਂ ਉਸ ਦੇ ਨੇੜੇ ਤੇੜੇ ਮਾਰੇ ਗਏ ਸਨ ਜਦਕਿ ਉਨ੍ਹਾਂ ਦੀਆਂ ਲਾਸ਼ਾਂ ਇੱਕ ਹਫਤੇ ਬਾਅਦ ਮਿਲੀਆਂ ਸਨ।