ਓਨਟਾਰੀਓ, 5 ਮਾਰਚ (ਪੋਸਟ ਬਿਊਰੋ) : ਮੰਗਲਵਾਰ ਨੂੰ ਹਾਈਵੇਅ 27 ਉੱਤੇ ਇੱਕ ਐਸਯੂਵੀ (ਸਪੋਰਟ ਯੂਟੀਲਿਟੀ ਵਹੀਕਲ) ਦੇ ਦੋ ਟੀਟੀਸੀ ਬੱਸਾਂ ਨਾਲ ਟਕਰਾ ਜਾਣ ਕਾਰਨ ਇੱਕ ਵਿਅਕਤੀ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਿਆ। ਉਸ ਨੂੰ ਬਾਅਦ ਵਿੱਚ ਹਸਪਤਾਲ ਲਿਜਾਇਆ ਗਿਆ।
ਟੀਟੀਸੀ ਅਨੁਸਾਰ ਇੱਕ ਚਿੱਟੇ ਰੰਗ ਦੀ ਐਸਯੂਵੀ ਹੰਬਰ ਕਾਲਜ ਬੋਲੀਵੀਆਰਡ ਨੇੜੇ ਹਾਈਵੇਅ 27 ਉੱਤੇ ਸਵੇਰੇ 5:45 ਵਜੇ ਦੋ ਬੱਸਾਂ ਨਾਲ ਟਕਰਾ ਗਈ। ਮੌਕੇ ਉੱਤੇ ਪੁਲਿਸ ਨੇ ਦੱਸਿਆ ਕਿ ਐਸਯੂਵੀ ਦੀ ਪਹਿਲੀ ਟੱਕਰ ਇੱਕ ਬੱਸ ਦੇ ਪਾਸੇ ਨਾਲ ਹੋਈ ਤੇ ਫਿਰ ਉਸ ਦੀ ਦੂਜੀ ਟੱਕਰ ਟੀਟੀਸੀ ਦੀ ਦੂਜੀ ਬੱਸ ਨਾਲ ਆਹਮੋ ਸਾਹਮਣੇ ਹੋਈ। ਪੁਲਿਸ, ਫਾਇਰਫਾਈਟਰਜ਼ ਤੇ ਪੈਰਾਮੈਡਿਕਸ ਤੁਰੰਤ ਮੌਕੇ ਉੱਤੇ ਪਹੁੰਚੇ।
ਟੋਰਾਂਟੋ ਪੈਰਾਮੈਡਿਕਸ ਸਰਵਿਸਿਜ ਨੇ ਦੱਸਿਆ ਕਿ ਐਸਯੂਵੀ ਦੇ ਡਰਾਈਵਰ ਨੂੰ ਗੰਭੀਰ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ ਪਰ ਉਸ ਦੀ ਹਾਲਤ ਹੁਣ ਖਤਰੇ ਤੋਂ ਬਾਹਰ ਦੱਸੀ ਜਾਂਦੀ ਹੈ। ਇਨ੍ਹਾਂ ਹਾਦਸਿਆਂ ਵਿੱਚ ਕੋਈ ਵੀ ਡਰਾਈਵਰ ਜਖਮੀ ਨਹੀਂ ਹੋਇਆ ਤੇ ਹਾਦਸੇ ਸਮੇਂ ਦੋਵਾਂ ਬੱਸਾਂ ਵਿੱਚ ਵੀ ਕੋਈ ਮੁਸਾਫਰ ਨਹੀਂ ਸੀ।