ਓਨਟਾਰੀਓ, 19 ਫਰਵਰੀ (ਪੋਸਟ ਬਿਊਰੋ) : ਹਾਇਤੀ ਵਿੱਚ ਕੰਮ ਕਰ ਰਹੀਆਂ ਕੈਨੇਡੀਅਨ ਨਰਸਾਂ ਦੇ ਗਰੁੱਪ ਨੂੰ ਸੁਰੱਖਿਅਤ ਢੰਗ ਨਾਲ ਕੈਨੇਡਾ ਵਾਪਿਸ ਲਿਆਂਦਾ ਜਾ ਚੁੱਕਿਆ ਹੈ। ਹਾਇਤੀ ਵਿੱਚ ਚੱਲ ਰਹੇ ਦੰਗਿਆਂ ਕਾਰਨ ਇਹ ਨਰਸਾਂ ਵੀ ਕਈ ਦਿਨਾਂ ਤੋਂ ਉੱਥੇ ਹੀ ਫਸੀਆਂ ਹੋਈਆਂ ਸਨ।
ਓਨਟਾਰੀਓ ਸਥਿਤ ਚੈਰਿਟੀ ਹੋਪ ਗ੍ਰੋਜ਼ ਲਈ ਕੰਮ ਕਰਨ ਵਾਲੀਆਂ ਅੱਠ ਨਰਸਾਂ ਰਾਜਧਾਨੀ ਤੋਂ 60 ਕਿਲੋਮੀਟਰ ਦੀ ਦੂਰੀ ਉੱਤੇ ਸਥਿਤ ਇਲਾਕੇ ਗ੍ਰੈਂਡ ਗੋਵ ਵਿੱਚ ਆਪਣਾ ਫਰਜ਼ ਨਿਭਾਅ ਰਹੀਆਂ ਸਨ। ਹਾਇਤੀ ਵਿੱਚ ਫੈਲੀ ਹਿੰਸਾ ਕਾਰਨ ਸੜਕਾਂ ਉੱਤੇ ਖਤਰਾ ਵੱਧ ਜਾਣ ਕਾਰਨ ਇਨ੍ਹਾਂ ਨਰਸਾਂ ਦੇ ਪਰਿਵਾਰਕ ਮੈਂਬਰਾਂ ਤੇ ਦੋਸਤਾਂ ਨੇ ਹਜ਼ਾਰਾਂ ਡਾਲਰ ਖਰਚ ਕੇ ਇਨ੍ਹਾਂ ਨੂੰ ਪੋਰਟ-ਆ-ਪ੍ਰਿੰਸ ਦੇ ਕੌਮਾਂਤਰੀ ਏਅਰਪੋਰਟ ਤੋਂ ਵਾਪਿਸ ਲਿਆਉਣ ਲਈ ਇੱਕ ਹੈਲੀਕਾਪਟਰ ਕਿਰਾਏ ਉੱਤੇ ਲਿਆ।
ਉੱਥੋਂ ਉਨ੍ਹਾਂ ਪਹਿਲਾਂ ਮਾਂਟਰੀਅਲ ਲਈ ਏਅਰ ਕੈਨੇਡਾ ਦੀ ਉਡਾਨ ਲਈ ਤੇ ਫਿਰ ਟੋਰਾਂਟੋ ਲਈ ਜਹਾਜ਼ ਲਿਆ। ਇਨ੍ਹਾਂ ਨਰਸਾਂ ਵਿੱਚੋਂ ਇੱਕ ਕੈਥਰੀਨ ਫਿਟਜ਼ ਓਨੀਲ ਨੇ ਆਖਿਆ ਕਿ ਉਹ ਆਪਣੇ ਦੇਸ਼ ਪਹੁੰਚ ਕੇ ਕਾਫੀ ਖੁਸ਼ ਹਨ। ਇਹ ਉਨ੍ਹਾਂ ਲਈ ਕਾਫੀ ਲੰਮਾਂ ਹਫਤਾ ਰਿਹਾ। ਇਨ੍ਹਾਂ ਨਰਸਾਂ ਵਿੱਚੋਂ ਓਨੀਲ ਤੇ ਟਰੇਸੀ ਹੌਟਾ ਸਣੇ ਕਈ ਹੋਰਨਾਂ ਦਾ ਕਹਿਣਾ ਹੈ ਕਿ ਉਹ ਇੱਕ ਵਾਰੀ ਮੁੜ ਹਾਇਤੀ ਦੇ ਲੋਕਾਂ ਦੀ ਸੇਵਾ ਕਰਨ ਲਈ ਵਾਪਿਸ ਜਾਣਾ ਚਾਹੁਣਗੀਆਂ।
ਹੁਣ ਤੱਕ 100 ਤੋਂ ਕਿਊਬਿਕ ਸੈਲਾਨੀ ਤੇ ਅਲਬਰਟਾ ਤੋਂ ਦੋ ਦਰਜਨ ਮਿਸ਼ਨਰੀਜ਼ ਨੂੰ ਹਾਇਤੀ ਤੋਂ ਸੁਰੱਖਿਅਤ ਢੰਗ ਨਾਲ ਕੱਢ ਲਿਆ ਗਿਆ ਹੈ। ਵਿਦੇਸ਼ ਮੰਤਰੀ ਕ੍ਰਿਸਟੀਆ ਫਰੀਲੈਂਡ ਨੇ ਵੀ ਹਾਇਤੀ ਵਿੱਚ ਫਸੇ ਹੋਏ ਹੋਰਨਾਂ ਕੈਨੇਡੀਅਨਾਂ ਨੂੰ ਜਲਦ ਤੋਂ ਜਲਦ ਉੱਥੋਂ ਬਾਹਰ ਨਿਕਲਣ ਦੀ ਅਪੀਲ ਕੀਤੀ ਹੈ।