ਮਿਸੀਸਾਗਾ, 15 ਫਰਵਰੀ (ਪੋਸਟ ਬਿਊਰੋ) : 11 ਸਾਲਾ ਲੜਕੀ, ਜਿਸ ਨੂੰ ਕਥਿਤ ਤੌਰ ਉੱਤੇ ਉਸ ਦੇ ਪਿਤਾ ਵੱਲੋਂ ਅਗਵਾਹ ਕਰ ਲਿਆ ਗਿਆ ਸੀ, ਦੀ ਲਾਸ ਵੀਰਵਾਰ ਰਾਤ ਨੂੰ ਟੋਰਾਂਟੋ ਦੇ ਪੱਛਮ ਸਥਿਤ ਇੱਕ ਘਰ ਵਿੱਚੋਂ ਮਿਲੀ। ਇਹ ਜਾਣਕਾਰੀ ਪੁਲਿਸ ਨੇ ਦਿੱਤੀ।
ਪੀਲ ਰੀਜਨਲ ਪੁਲਿਸ ਵੱਲੋਂ ਵੀਰਵਾਰ ਨੂੰ ਰਾਤੀਂ 11:00 ਵਜੇ ਐਲਰਟ ਜਾਰੀ ਕੀਤਾ ਗਿਆ ਸੀ। 41 ਸਾਲਾ ਰੂਪੇਸ਼ ਰਾਜਕੁਮਾਰ ਆਪਣੀ ਧੀ ਰੀਆ ਨੂੰ ਉਸ ਦੀ ਮਾਂ ਨੂੰ ਵਾਪਿਸ ਸੌਂਪਣ ਵਿੱਚ ਨਾਕਾਮਯਾਬ ਰਿਹਾ ਸੀ। ਬਰੈਂਪਟਨ, ਓਨਟਾਰੀਓ ਵਿੱਚ ਲੜਕੀ ਦੀ ਲਾਸ਼ ਮਿਲਣ ਤੋਂ ਪਹਿਲਾਂ ਪੁਲਿਸ ਨੇ ਦੱਸਿਆ ਕਿ ਰੂਪੇਸ਼ ਨੇ ਆਪਣੀਆਂ ਟਿੱਪਣੀਆਂ ਵਿੱਚ ਇਹ ਸੰਕੇਤ ਦਿੱਤੇ ਹਨ ਕਿ ਉਹ ਖੁਦ ਨੂੰ ਤੇ ਆਪਣੀ ਧੀ ਨੂੰ ਨੁਕਸਾਨ ਪਹੁੰਚਾ ਸਕਦਾ ਹੈ।
ਪੁਲਿਸ ਨੇ ਦੱਸਿਆ ਕਿ ਲੜਕੀ ਸਾਰਾ ਸਮਾਂ ਆਪਣੇ ਪਿਤਾ ਨਾਲ ਨਹੀਂ ਸੀ ਰਹਿੰਦੀ। ਸਗੋਂ ਮਿਸੀਸਾਗਾ,ਓਨਟਾਰੀਓ ਦੇ ਗੈਸ ਸਟੇਸ਼ਨ ਉੱਤੇ ਦੁਪਹਿਰੇ 3:00 ਵਜੇ ਉਸ ਨੂੰ ਛੱਡਿਆ ਗਿਆ ਸੀ ਤਾਂ ਕਿ ਉਹ ਉਸ ਨੂੰ ਉਸ ਦੇ ਜਨਮਦਿਨ ਉੱਤੇ ਬਾਹਰ ਲਿਜਾ ਸਕੇ। ਕਾਂਸਟੇਬਲ ਟੈਰਿਨ ਹਿੱਲ, ਪੀਲ ਪੁਲਿਸ ਦੀ ਤਰਜ਼ਮਾਨ, ਨੇ ਆਖਿਆ ਕਿ ਰੀਆ ਦੀ ਮਾਂ ਨੇ ਸ਼ਾਮੀਂ 6:30 ਵਜੇ ਉਸ ਸਮੇਂ ਪੁਲਿਸ ਨੂੰ ਫੋਨ ਕੀਤਾ ਜਦੋਂ ਦੋਂਵੇਂ ਪਰਤੇ ਨਹੀਂ।
ਸ਼ੁੱਕਰਵਾਰ ਨੂੰ ਇੱਕ ਇੰਟਰਵਿਊ ਵਿੱਚ ਹਿੱਲ ਨੇ ਆਖਿਆ ਕਿ ਇਸ ਮਾਮਲੇ ਦੀ ਗੰਭੀਰਤਾ ਨੂੰ ਵੇਖਦਿਆਂ ਹੋਇਆਂ ਅਸੀਂ ਤੁਰੰਤ ਜਾਂਚਕਾਰਾਂ ਨੂੰ ਮਾਮਲੇ ਦੀ ਜਾਂਚ ਕਰਨ ਲਈ ਆਖਿਆ। ਇਸ ਤੋਂ ਬਾਅਦ ਹੀ ਐਲਰਟ ਜਾਰੀ ਕੀਤਾ ਗਿਆ। ਹਿੱਲ ਨੇ ਦੱਸਿਆ ਕਿ ਰੀਆ ਦੀ ਲਾਸ਼ ਅੱਧੀ ਰਾਤ ਨੂੰ ਮਿਲੀ। ਉਨ੍ਹਾਂ ਦੱਸਿਆ ਕਿ ਪ੍ਰੋਵਿੰਸ਼ੀਅਲ ਪੁਲਿਸ ਵੱਲੋਂ ਉਸ ਦੇ ਪਿਤਾ ਨੂੰ 130 ਕਿਲੋਮੀਟਰ ਦੀ ਦੂਰੀ ਉੱਤੇ ਉੱਤਰ ਵੱਲ ਓਰਿਲਾ, ਓਨਟਾਰੀਓ ਨੇੜੇ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
ਪੁਲਿਸ ਨੇ ਇਹ ਨਹੀਂ ਦੱਸਿਆ ਕਿ ਬਰੈਂਪਟਨ ਦਾ ਘਰ ਰਾਜਕੁਮਾਰ ਤੇ ਉਸ ਦੇ ਪਰਿਵਾਰ ਨਾਲ ਕਿਸ ਤਰ੍ਹਾਂ ਸਬੰਧਤ ਹੈ। ਉਨ੍ਹਾਂ ਦੱਸਿਆ ਕਿ ਮਾਮਲੇ ਦੀ ਜਾਂਚ ਪੁਲਿਸ ਦੀ ਹੋਮੀਸਾਈਡ ਤੇ ਮਿਸਿੰਗ ਪਰਸਨ ਯੂਨਿਟ ਕਰ ਰਹੀ ਹੈ।