ਓਟਵਾ, 29 ਜਨਵਰੀ (ਪੋਸਟ ਬਿਊਰੋ) : ਕੈਨੇਡਾ ਦੇ ਕਈ ਵੱਡੇ ਸ਼ਹਿਰਾਂ ਦੇ ਮੇਅਰਜ਼ ਨੇ ਚੋਣਾਂ ਦੇ ਸਾਲ ਦੌਰਾਨ ਫੈਡਰਲ ਸਰਕਾਰ ਨਾਲ ਆਪਣੇ ਸਬੰਧਾਂ ਨੂੰ ਨਵੇਂ ਸਿਰੇ ਤੋਂ ਸੁਧਾਰਨ ਲਈ ਅਪੀਲ ਕੀਤੀ ਹੈ। ਅਜਿਹਾ ਕੁੱਝ ਪ੍ਰੋਵਿੰਸਾਂ ਤੇ ਫੈਡਰਲ ਸਰਕਾਰ ਦਰਮਿਆਨ ਵਧ ਰਹੇ ਤਣਾਅ ਕਾਰਨ ਕੀਤਾ ਗਿਆ ਹੈ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਵੀ ਇਹ ਸਵੀਕਾਰ ਕੀਤਾ ਹੈ ਕਿ ਇਸ ਤਰ੍ਹਾਂ ਦੇ ਹਾਲਾਤ ਕਾਰਨ ਉਨ੍ਹਾਂ ਦੀਆਂ ਚੁਣੌਤੀਆਂ ਵੱਧ ਰਹੀਆਂ ਹਨ।
ਫੈਡਰੇਸ਼ਨ ਆਫ ਕੈਨੇਡੀਅਨ ਮਿਉਂਸਪੈਲਿਟੀਜ਼ ਦੇ ਮੇਅਰ ਦੇ ਕਾਕਸ ਨੇ ਓਟਵਾ ਵਿੱਚ ਟਰੂਡੋ ਤੇ ਕੈਬਨਿਟ ਦੇ ਤਿੰਨ ਹੋਰਨਾਂ ਮੰਤਰੀਆਂ ਨਾਲ ਮੁਲਾਕਾਤ ਕੀਤੀ ਤਾਂ ਕਿ ਅਗਲੇ ਫੈਡਰਲ ਬਜਟ ਲਈ ਬੇਨਤੀ ਕੀਤੀ ਜਾ ਸਕੇ। ਜਿ਼ਕਰਯੋਗ ਹੈ ਕਿ ਟਰੂਡੋ ਦੀ ਲਿਬਰਲ ਪਾਰਟੀ ਦੇੇ ਕਈ ਪ੍ਰੋਵਿੰਸਾਂ, ਜਿਨ੍ਹਾਂ ਵਿੱਚ ਓਨਟਾਰੀਓ ਵੀ ਸ਼ਾਮਲ ਹੈ, ਨਾਲ ਕਈ ਮੁੱਦਿਆਂ ਜਿਵੇਂ ਕਿ ਵਾਤਾਵਰਣ ਵਿੱਚ ਹੋਣ ਵਾਲੀਆਂ ਤਬਦੀਲੀਆਂ ਸਬੰਧੀ ਰਣਨੀਤੀ ਬਾਰੇ ਮਤਭੇਦ ਹਨ। ਮਿਉਂਸਪਲ ਆਗੂਆਂ ਨੂੰ ਇਹ ਡਰ ਹੈ ਕਿ ਇਸ ਤਰ੍ਹਾਂ ਦੇ ਤਣਾਅ ਕਾਰਨ ਰਫਿਊਜੀ ਸੈਟਲਮੈਂਟ ਆਦਿ ਵਰਗੀਆਂ ਕਈ ਪਹਿਲਕਦਮੀਆਂ ਨੂੰ ਢਾਹ ਲੱਗ ਸਕਦੀ ਹੈ। ਇਸ ਤਰ੍ਹਾਂ ਦੇ ਮੁੱਦਿਆਂ ਉੱਤੇ ਸਰਕਾਰ ਦੇ ਤਿੰਨਾਂ ਪੱਧਰਾਂ ਵਿਚਾਲੇ ਗੱਲਬਾਤ ਹੋਣੀ ਜ਼ਰੂਰੀ ਹੈ।
ਮੇਅਰਜ਼ ਦੇ ਕਾਕਸ ਦੇ ਚੇਅਰ ਐਡਮੰਟਨ ਦੇ ਮੇਅਰ ਡੌਨ ਆਈਵਸਨ ਨੇ ਆਖਿਆ ਕਿ ਸਾਨੂੰ ਉਨ੍ਹਾਂ ਪ੍ਰੋਵਿੰਸਾਂ ਬਾਰੇ ਵੀ ਸੋਚ ਵਿਚਾਰ ਕਰਨਾ ਚਾਹੀਦਾ ਹੈ ਜਿਹੜੀਆਂ ਸਹਿਯੋਗ ਨਹੀਂ ਦੇ ਰਹੀਆਂ। ਮੰਦਭਾਗੀ ਗੱਲ ਇਹ ਹੈ ਕਿ ਇਸ ਤਰ੍ਹਾਂ ਦੀਆਂ ਪ੍ਰੋਵਿੰਸਿਜ਼ ਦੀ ਗਿਣਤੀ ਜਿ਼ਆਦਾ ਹੈ। ਇਸ ਦੌਰਾਨ ਮੇਅਰਜ਼ ਨੇ ਆਖਿਆ ਕਿ ਫੋਰਮ ਦਾ ਮੰਨਣਾ ਹੈ ਕਿ ਸਿਟੀਜ਼ ਨੂੰ ਦਰਪੇਸ਼ ਮੁੱਦਿਆਂ ਵਿੱਚ ਰਫਿਊਜੀਆਂ, ਨਸਿ਼ਆਂ ਦੀ ਲਤ ਆਦਿ ਕਾਫੀ ਗੁੰਝਲਦਾਰ ਹਨ।