ਇੱਕ ਚੈਟ ਸ਼ੋਅ ਵਿੱਚ ਕੈਟਰੀਨਾ ਕੈਫ ਨਾਲ ਵਿਆਹੁਤਾ ਜ਼ਿੰਦਗੀ ਦੇ ਬਾਰੇ ਗੱਲ ਕਰਨ ਤੋਂ ਇਲਾਵਾ ਵਿੱਕੀ ਨੇ ਆਪਣੀਆਂ ਦੋ ਵੱਡੇ ਬਜਟ ਦੀਆਂ ਫਿਲਮਾਂ ਦੇ ਬੰਦ ਹੋਣਬਾਰੇ ਖੁੱਲ੍ਹੀ ਗੱਲ ਕੀਤੀ। ਜ਼ਿਕਰਯੋਗ ਹੈ ਕਿ ਵਿੱਕੀ ਨੂੰ ਲੈ ਕੇ ਦੋ ਵੱਡੀਆਂ ਫਿਲਮਾਂ ਦਾ ਐਲਾਨ ਲਗਭਗ ਚਾਰ ਸਾਲ ਪਹਿਲਾਂ ਹੋਇਆ ਸੀ, ਜਿਨ੍ਹਾਂ ਵਿੱਚੋਂ ਇੱਕ ਕਰਣ ਜੌਹਰ ਦੀ ਆਪਣੀ ‘ਤਖਤ’ ਸੀ, ਜਿਸ ਨਾਲ ਕਰਣ ਨਿਰਦੇਸ਼ਨ ਵਿੱਚ ਵਾਪਸੀ ਕਰਨ ਵਾਲਾ ਸੀ, ਪਰ ਇਹ ਫਿਲਮ ਓਵਰ ਬਜਟ ਕਾਰਨ ਬੰਦ ਹੋ ਗਈ। ਦੂਸਰੀ ਫਿਲਮ ‘ਅਸ਼ਵਥਾਮਾ’ ਸੀ। ‘ਉੜੀ’ ਦੀ ਇੱਕ ਸਾਲ ਦੀ ਵਰ੍ਹੇਗੰਢ ਉੱਤੇ ਇਸ ਦਾ ਐਲਾਨ ਹੋਇਆ ਸੀ। ਇੱਕ ਸੁਪਰਹੀਰੋ ਐਕਸ਼ਨ ਫਿਲਮ ਵਜੋਂ ਐਲਾਨੀ ਇਸ ਫਿਲਮ ਦਾ ਨਿਰਦੇਸ਼ਨ ਆਦਿਤਿਆ ਧਰ ਕਰ ਰਹੇ ਸਨ।
ਵਿੱਕੀ ਨੇ ਇਨ੍ਹਾਂ ਦੇ ਬੰਦ ਹੋਣ ਬਾਰੇ ਕਿਹਾ, ‘‘ਦੋਵਾਂ ਦੇ ਬੰਦ ਹੋਣ ਦਾ ਕਾਰਨ ਸਿਰਫ ਕੋਵਿਡ ਹੈ। ਫਿਲਮ ਬੰਦ ਹੋਣ ਕਾਰਨ ਇਮੋਸ਼ਨਲ ਤੌਰ ਉੱਤੇ ਮੈਂ ਕਾਫੀ ਨਿਰਾਸ਼ ਹੋਇਆ ਸੀ। ਦੋਵੇਂ ਫਿਲਮਾਂ ਬਹੁਤ ਚੰਗੀਆਂ ਸਨ, ਪਰ ਦੋਵਾਂ ਦੇ ਫਲੋਰ ਉੱਤੇ ਜਾਣ ਦਾ ਸਮਾਂ ਵੱਖਰਾ ਸੀ। ਮੈਨੂੰ ਯਾਦ ਹੈ ਕਿ ਜਦੋਂ ‘ਅਸ਼ਵਥਾਮਾ' ਬੰਦ ਹੋਈ ਤਾਂ ਮੈਂ ਸ਼ਸ਼ਾਂਕ ਨਾਲ ‘ਗੋਵਿੰਦਾ ਨਾਮ ਮੇਰਾ’ ਦੀ ਸ਼ੂਟਿੰਗ ਕਰ ਰਿਹਾ ਸੀ। ਮੈਨੂੰ ਫੋਨ ਆਇਆ ਕਿ ਫਿਲਹਾਲ ਫਿਲਮ ਨੂੰ ਠੰਢੇ ਬਸਤੇ ਵਿੱਚ ਪਾ ਰਹੇ ਹਾਂ। ਉਸ ਸਮੇਂ ਮੇਰੇ ਕੋਲ ਮੇਰਾ ਟ੍ਰੇਨਰ ਸੀ ਅਤੇ ਮੈਂ ਉਸ ਨੂੰ ਇਹ ਸਭ ਦੱਸਿਆ। ਟ੍ਰੇਨਰ ਨੇ ਕਿਹਾ ਕਿ ਚਲੋ ਜਿੰਮ ਚੱਲਦੇ ਹਾਂ ਅਤੇ ਉਸ ਦਿਨ ਮੈਂ ਸਭ ਤੋਂ ਵੱਧ ਹਾਰਡ ਐਕਸਰਸਾਈਜ਼ ਕੀਤੀ। ਇਹੀ ਉਹ ਫਿਲਮ ਸੀ, ਜਿਸ ਦੇ ਲਈ ਮੈਂ ਲਗਭਗ ਦੋ ਸਾਲਾਂ ਤੱਕ ਤਿਆਰੀ ਕੀਤੀ ਸੀ। ਅਸੀਂ ਜਲਦੀ ਹੀ ਫਿਲਮ ਦੀ ਸ਼ੂਟਿੰਗ ਕਰਨ ਵਾਲੇ ਸੀ।”ਉਸ ਨੇ ਅੱਗੇ ਕਿਹਾ, ‘ਨਿਰਾਸ਼ਾ ਮੇਰੇ ਨਾਲ ਸਿਰਫ ਇੱਕੇ ਦਿਨ ਲਈ ਰਹਿੰਦੀ ਹੈ, ਜੋ ਹੁੰਦਾ ਹੈ, ਚੰਗੇ ਲਈ ਹੀ ਹੁੰਦਾ ਹੈ।”