ਡਿਟਰੌਇਟ, 14 ਜਨਵਰੀ (ਪੋੋਸਟ ਬਿਊਰੋ) : ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦੀ ਤਰਜ਼ਮਾਨ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਡਿਟਰੌਇਟ ਵਿੱਚ ਹੋਣ ਵਾਲੇ ਆਟੋ ਸੋਅ ਲਈ ਕੀਤੇ ਜਾਣ ਵਾਲੇ ਦੌਰੇ ਦੌਰਾਨ ਪ੍ਰੀਮੀਅਰ ਜਨਰਲ ਮੋਟਰਜ਼ ਤੇ ਕਈ ਹੋਰਨਾਂ ਆਟੋਨਿਰਮਾਤਾਵਾਂ ਨਾਲ ਵੀ ਮੁਲਾਕਾਤ ਕਰਨਗੇ।
ਇਵਾਨਾ ਯੈਲਿਚ ਨੇ ਦੱਸਿਆ ਕਿ ਫੋਰਡ ਜਦੋਂ ਨੌਰਥ ਅਮੈਰੀਕਨ ਇੰਟਰਨੈਸ਼ਨਲ ਆਟੋ ਸੋ਼ਅ ਵਿੱਚ ਜੀਐਮ ਦੇ ਅਧਿਕਾਰੀਆਂ ਨਾਲ ਮੁਲਾਕਾਤ ਕਰਨਗੇ ਤਾਂ ਉਹ ਉਨ੍ਹਾਂ ਨੂੰ ਇਸ ਸਾਲ ਦੇ ਅੰਤ ਵਿੱਚ ਓਸ਼ਵਾ ਵਾਲੇ ਪਲਾਂਟ ਨੂੰ ਬੰਦ ਕਰਨ ਦੀ ਯੋਜਨਾ ਉੱਤੇ ਮੁੜ ਵਿਚਾਰ ਕਰਨ ਲਈ ਨਹੀਂ ਆਖਣਗੇ ਤੇ ਨਾ ਹੀ ਇਸ ਲਈ ਉਨ੍ਹਾਂ ਉੱਤੇ ਕੋਈ ਦਬਾਅ ਹੀ ਪਾਉਣਗੇ। ਉਨ੍ਹਾਂ ਦੱਸਿਆ ਕਿ ਕੰਪਨੀ ਪ੍ਰੀਮੀਅਰ ਨੂੰ ਪਹਿਲਾਂ ਹੀ ਇਹ ਸਪਸ਼ਟ ਕਰ ਚੁੱਕੀ ਹੈ ਕਿ ਉਨ੍ਹਾਂ ਦਾ ਇਸ ਸਬੰਧੀ ਫੈਸਲਾ ਅਟਲ ਹੈ। ਇਸ ਲਈ ਇਸ ਪਲਾਂਟ ਦੇ ਬੰਦ ਹੋ ਜਾਣ ਕਾਰਨ ਵਿਹਲੇ ਹੋਣ ਵਾਲੇ ਵਰਕਰਜ਼ ਦੀ ਮਦਦ ਲਈ ਨਵੇਂ ਮੌਕੇ ਤਲਾਸ਼ਣ ਲਈ ਫੋਰਡ ਉੱਥੇ ਗੱਲਬਾਤ ਜ਼ਰੂਰ ਕਰਨਗੇ।
ਜਿ਼ਕਰਯੋਗ ਹੈ ਕਿ ਦਸੰਬਰ ਵਿੱਚ ਜੀਐਮ ਨੇ ਇਹ ਐਲਾਨ ਕੀਤਾ ਸੀ ਕਿ ਉਹ 2019 ਦੇ ਅੰਤ ਤੱਕ ਆਪਣੇ ਓਸ਼ਵਾ ਵਾਲੇ ਪਲਾਂਟ ਨੂੰ ੁਬੰਦ ਕਰ ਦੇਵੇਗੀ। ਇਸ ਨਾਲ ਉੱਥੇ ਕੰਮ ਕਰਨ ਵਾਲੇ 2600 ਕਾਮੇ ਵਿਹਲੇ ਹੋ ਜਾਣਗੇ। ਇੱਕ ਸਰੋਤ ਦਾ ਕਹਿਣਾ ਹੈ ਕਿ ਪ੍ਰੀਮੀਅਰ ਵਰਕਰਜ਼ ਯੂਨੀਅਨ ਯੂਨੀਫੌਰ ਦੇ ਪ੍ਰੈਜ਼ੀਡੈਂਟ ਨਾਲ ਅੱਜ ਵੀ ਮੁਲਾਕਾਤ ਕਰਨਗੇ।