ਓਟਵਾ, 10 ਜਨਵਰੀ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਸੋਮਵਾਰ ਨੂੰ ਆਪਣੇ ਮੰਤਰੀ ਮੰਡਲ ਵਿੱਚ ਫੇਰਬਦਲ ਕਰਨਗੇ। ਇਹ ਫੇਰਬਦਲ ਫੈਡਰਲ ਕੈਬਨਿਟ ਰਟਰੀਟ ਤੋਂ ਪਹਿਲਾਂ ਅਤੇ ਲਿਬਰਲ ਐਮਪੀ ਸਕੌਟ ਬ੍ਰਿਸਨ ਵੱਲੋਂ ਅਸਤੀਫਾ ਦੇਣ ਦੇ ਕੀਤੇ ਗਏ ਐਲਾਨ ਦੇ ਮੱਦੇਨਜ਼ਰ ਕੀਤੀ ਜਾਵੇਗੀ।
ਕੈਮਾਲੂਪਸ, ਬੀਸੀ ਵਿੱਚ ਮੀਡੀਆ ਦੇ ਸਵਾਲਾਂ ਦੇ ਜਵਾਬ ਦਿੰਦਿਆਂ ਟਰੂਡੋ ਨੇ ਆਖਿਆ ਕਿ ਇਸ ਸੱਭ ਕਾਸੇ ਕਾਰਨ ਸਾਨੂੰ ਆਪਣੇ ਮੰਤਰੀ ਮੰਡਲ ਵਿੱਚ ਥੋੜ੍ਹੀ ਫੇਰਬਦਲ ਕਰਨੀ ਹੋਵੇਗੀ ਤੇ ਇਸ ਸਬੰਧੀ ਐਲਾਨ ਅਸੀਂ ਸੋਮਵਾਰ ਨੂੰ ਕਰਾਂਗੇ। ਇਸ ਫੇਰਬਦਲ ਦੇ ਸਬੰਧ ਵਿੱਚ ਹੋਰ ਜਾਣਕਾਰੀ ਦੇਣ ਤੋਂ ਟਰੂਡੋ ਨੇ ਇਨਕਾਰ ਕਰ ਦਿੱਤਾ। ਇਹ ਵੀ ਕਿਆਫੇ ਲਾਏ ਜਾ ਰਹੇ ਹਨ ਕਿ ਟਰੂਡੋ ਵੱਲੋਂ ਕੈਬਨਿਟ ਵਿੱਚ ਮਾਮੂਲੀ ਫੇਰਬਦਲ ਜਾਂ ਵੱਡੀ ਪੱਧਰ ਉੱਤੇ ਤਬਦੀਲੀਆਂ ਕੀਤੀਆਂ ਜਾ ਸਕਦੀਆਂ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਟਰੂਡੋ ਕੋਲ ਮੌਕਾ ਹੈ ਕਿ ਉਹ ਇਸ ਸਮੇਂ ਉਹ ਟੀਮ ਤਿਆਰ ਕਰ ਸਕਦੇ ਹਨ ਜਿਸਨੂੰ ਉਹ 2019 ਦੀਆਂ ਚੋਣਾਂ ਵਿੱਚ ਲਿਜਾਣਾ ਚਾਹੁੰਦੇ ਹੋਣ।
ਜਿ਼ਕਰਯੋਗ ਹੈ ਕਿ ਬ੍ਰਿਸਨ ਨੇ ਵੀਰਵਾਰ ਨੂੰ ਇਹ ਐਲਾਨ ਕੀਤਾ ਸੀ ਕਿ ਉਹ ਦੁਬਾਰਾ ਚੋਣਾਂ ਵਿੱਚ ਹਿੱਸਾ ਨਹੀਂ ਲੈਣਾ ਚਾਹੁੰਦੇ ਤੇ ਇਸ ਲਈ ਖਜ਼ਾਨਾ ਬੋਰਡ ਦੇ ਪ੍ਰੈਜ਼ੀਡੈਂਟ ਦੀ ਭੂਮਿਕਾ ਤੋਂ ਅਸਤੀਫਾ ਦੇ ਰਹੇ ਹਨ। ਇੱਥੇ ਦੱਸਣਾ ਬਣਦਾ ਹੈ ਕਿ ਟਰੂਡੋ ਨੇ ਸੱਤਾ ਵਿੱਚ ਆਉਣ ਤੋਂ ਬਾਅਦ ਲੱਗਭਗ ਹਰ ਸਾਲ ਆਪਣੇ ਫਰੰਟ ਬੈਂਚ ਨੂੰ ਤਰਤੀਬ ਦਿੱਤੀ ਹੈ। ਪਿਛਲੀ ਵਾਰੀ ਉਨ੍ਹਾਂ ਜੁਲਾਈ ਵਿੱਚ ਅਜਿਹਾ ਕੀਤਾ ਸੀ ਜਦੋਂ ਉਨ੍ਹਾਂ ਆਪਣੇ ਮੰਤਰੀ ਮੰਡਲ ਦਾ ਪਸਾਰ ਕੀਤਾ ਸੀ ਤੇ ਪੰਜ ਐਮਪੀਜ਼ ਨੂੰ ਪ੍ਰਮੋਟ ਕਰਕੇ ਛੇ ਹੋਰਨਾਂ ਦੇ ਅਹੁਦੇ ਬਦਲੇ ਸਨ।