ਕਿਊਬਿਕ, 11 ਜਨਵਰੀ (ਪੋਸਟ ਬਿਊਰੋ) : ਕੋਵਿਡ-19 ਵੈਕਸੀਨ ਦੀ ਡੋਜ਼ ਹਾਸਲ ਕਰਨ ਤੋਂ ਇਨਕਾਰ ਕਰਨ ਵਾਲੇ ਗੈਰਵੈਕਸੀਨੇਟਿਡ ਕਿਊਬਿਕ ਵਾਸੀਆਂ ਤੋਂ ਹੁਣ ਫੀਸ ਵਸੂਲੀ ਜਾਵੇਗੀ।
ਕਿਊਬਿਕ ਦੇ ਪ੍ਰੀਮੀਅਰ ਫਰੈਂਕੌਇਸ ਲੀਗਾਲਟ ਦਾ ਕਹਿਣਾ ਹੈ ਕਿ ਹੈਲਥ ਕੇਅਰ ਦੀ ਲਾਗਤ ਨੂੰ ਪੂਰਾ ਕਰਨ ਵਿੱਚ ਮਦਦ ਕਰਨ ਲਈ ਗੈਰਵੈਕਸੀਨੇਟਿਡ ਬਾਲਗਾਂ ਤੋਂ ਹੁਣ ਪ੍ਰੋਵਿੰਸ ਵੱਲੋਂ ਵਾਧੂ ਫੀਸ ਲਈ ਜਾਵੇਗੀ। ਇਹ ਫੀਸ ਉਨ੍ਹਾਂ ਨਾਗਰਿਕਾਂ ਉੱਤੇ ਅਪਲਾਈ ਨਹੀਂ ਹੋਵੇਗੀ ਜਿਨ੍ਹਾਂ ਕੋਲ ਜਾਇਜ਼ ਮੈਡੀਕਲ ਕਾਰਨ ਹੈ। ਲੀਗਾਲਟ ਦਾ ਕਹਿਣਾ ਹੈ ਕਿ ਅਜੇ ਤੱਕ ਇਹ ਫੀਸ ਤੈਅ ਨਹੀਂ ਕੀਤੀ ਗਈ ਹੈ ਪਰ ਇਹ ਰਕਮ ਐਨੀ ਜ਼ਰੂਰ ਹੋਵੇਗੀ ਕਿ ਗੈਰਵੈਕਸੀਨੇਟਿਫ ਲੋਕਾਂ ਨੂੰ ਸ਼ੌਟ ਲੈਣ ਲਈ ਰਾਜ਼ੀ ਕੀਤਾ ਜਾ ਸਕੇ।
ਅਜਿਹਾ ਪਹਿਲੀ ਵਾਰੀ ਹੋਇਆ ਹੈ ਕਿ ਕੈਨੇਡਾ ਵਿੱਚ ਕਿਸੇ ਸਰਕਾਰ ਨੇ ਕੋਵਿਡ-19 ਵੈਕਸੀਨ ਦਾ ਸ਼ੌਟ ਨਾ ਲਵਾਉਣ ਵਾਲਿਆਂ ਲਈ ਫੀਸ ਐਲਾਨੀ ਹੈ। ਉਨ੍ਹਾਂ ਆਖਿਆ ਕਿ ਅਸੀਂ ਵੈਕਸੀਨ ਪਾਸਪੋਰਟ ਵੀ ਜਲਦ ਹੀ ਲਿਆਂਵਾਂਗੇ। ਉਨ੍ਹਾਂ ਦੱਸਿਆ ਕਿ ਪ੍ਰੋਵਿੰਸ ਵਿੱਚ 10 ਫੀ ਸਦੀ ਅਜਿਹੇ ਲੋਕ ਹਨ ਜਿਨ੍ਹਾਂ ਨੇ ਅਜੇ ਆਪਣੀ ਪਹਿਲੀ ਡੋਜ਼ ਲੈਣੀ ਹੈ। ਇੱਥੇ ਦੱਸਣਾ ਬਣਦਾ ਹੈ ਕਿ ਆਈਸੀਯੂ ਵਿੱਚ 50 ਫੀ ਸਦੀ ਬੈੱਡ ਗੈਰਵੈਕਸੀਨੇਟਿਡ ਲੋਕਾਂ ਕੋਲ ਹੀ ਹਨ।
ਮੰਗਲਵਾਰ ਨੂੰ ਕਿਊਬਿਕ ਵਿੱਚ ਨੋਵਲ ਕਰੋਨਾਵਾਇਰਸ ਕਾਰਨ ਹੋਈਆਂ 62 ਮੌਤਾਂ ਰਿਪੋਰਟ ਕੀਤੀਆਂ ਗਈਆਂ ਤੇ ਇਸ ਦੇ ਨਾਲ ਹੀ ਪ੍ਰੋਵਿੰਸ ਵਿੱਚ ਕੋਵਿਡ-19 ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ 12,028 ਤੱਕ ਪਹੁੰਚ ਗਈ ਹੈ ਜੋ ਕਿ ਕੈਨੇਡਾ ਵਿੱਚ ਸੱਭ ਤੋਂ ਵੱਧ ਹੈ।