ਓਨਟਾਰੀਓ, 28 ਜੁਲਾਈ (ਪੋਸਟ ਬਿਊਰੋ) : ਓਨਟਾਰੀਓ ਸਰਕਾਰ ਸਰਜੀਕਲ ਉਡੀਕ ਸਮੇਂ ਦੀ ਦਿੱਕਤ ਦੂਰ ਕਰਨ ਤੇ ਹੈਲਥਕੇਅਰ ਤੱਕ ਲੋਕਾਂ ਦੀ ਪਹੁੰਚ ਵਿੱਚ ਸੁਧਾਰ ਕਰਨ ਲਈ 300 ਮਿਲੀਅਨ ਡਾਲਰ ਨਿਵੇਸ਼ ਕਰਨ ਜਾ ਰਹੀ ਹੈ। ਇਸ ਦੇ ਨਾਲ ਹੀ ਹਸਪਤਾਲਾਂ ਨੂੰ ਆਪਰੇਟ ਕਰਨ ਲਈ 110 ਤੋਂ 115 ਫੀ ਸਦੀ ਵਧੇਰੇ ਯੋਗ ਬਣਾਇਆ ਜਾਵੇਗਾ।
ਬੁੱਧਵਾਰ ਨੂੰ ਪ੍ਰੋਵਿੰਸ ਨੇ ਆਖਿਆ ਕਿ ਮਹਾਂਮਾਰੀ ਕਾਰਨ ਓਨਟਾਰੀਓ ਵਾਸੀਆਂ ਨੂੰ ਲੋੜੀਂਦੀ ਹੈਲਥਕੇਅਰ ਨਹੀਂ ਮਿਲ ਪਾ ਰਹੀ। ਇਸ ਸਮੇਂ ਸਰਜਰੀਜ਼ ਤੇ ਹੋਰ ਪ੍ਰੋਸੀਜਰਜ਼ ਨੂੰ ਲੀਹ ਉੱਤੇ ਲੈ ਕੇ ਆਉਣਾ ਸਮੇਂ ਦੀ ਮੁੱਖ ਮੰਗ ਹੈ। ਜੂਨ ਦੇ ਸ਼ੁਰੂ ਵਿੱਚ ਪ੍ਰੋਵਿੰਸ ਨੇ ਗੈਰ-ਐਮਰਜੰਸੀ ਸੇਵਾਵਾਂ ਸ਼ੁਰੂ ਕਰ ਦਿੱਤੀਆਂ ਸਨ। ਅਜਿਹੀਆਂ ਸੇਵਾਵਾਂ ਵੀ ਦਿੱਤੀਆਂ ਜਾਣ ਲੱਗੀਆਂ ਸਨ ਜਿਨ੍ਹਾਂ ਵਿੱਚ ਮਰੀਜ਼ਾਂ ਨੂੰ ਹਸਪਤਾਲ ਰੱਖੇ ਜਾਣ ਦੀ ਲੋੜ ਪੈਂਦੀ ਹੈ।
ਇਹ ਤਬਦੀਲੀਆਂ ਉਸ ਸਮੇਂ ਹੋਈਆਂ ਜਦੋਂ ਓਨਟਾਰੀਓ ਕੋਵਿਡ-19 ਦੇ ਖਾਤਮੇ ਲਈ ਸਹੀ ਦਿਸ਼ਾ ਵੱਲ ਚੁੱਕੇ ਗਏ ਕਦਮਾਂ ਕਾਰਨ ਵੱਧ ਤੋਂ ਵੱਧ ਲੋਕਾਂ ਦਾ ਟੀਕਾਕਰਣ ਸੰਭਵ ਹੋ ਸਕਿਆ ਤੇ ਕੋਵਿਡ-19 ਮਾਮਲਿਆਂ ਵਿੱਚ ਕਮੀ ਦਰਜ ਕੀਤੀ ਗਈ। ਫੋਰਡ ਸਰਕਾਰ ਦਾ ਕਹਿਣਾ ਹੈ ਕਿ ਹੈਲਥਕੇਅਰ ਵਰਕਰਜ਼ ਨੇ ਇਹ ਯਕੀਨੀ ਬਣਾਇਆ ਕਿ ਕੁੱਝ ਮਰੀਜ਼ਾਂ ਨੂੰ ਤਰਜੀਹ ਦਿੱਤੀ ਜਾਵੇ ਤੇ ਕੁੱਝ ਦੇ ਜ਼ਰੂਰੀ ਆਪਰੇਸ਼ਨ ਵੀ ਕਰਵਾਏ ਗਏ। ਪਹਿਲੀ ਮਾਰਚ, 2020 ਤੋਂ ਪਹਿਲੀ ਮਾਰਚ, 2021 ਦਰਮਿਆਨ ਪ੍ਰੋਵਿੰਸ ਵਿੱਚ 76 ਫੀ ਸਦੀ ਮਰੀਜ਼ਾਂ ਦੀ ਸਰਜਰੀ ਕੀਤੀ ਗਈ।
ਇਸ ਤੋਂ ਇਲਾਵਾ ਅਪਰੈਲ 2020 ਤੋਂ ਮਾਰਚ 2021 ਦਰਮਿਆਨ ਓਨਟਾਰੀਓ ਦੇ ਹਸਪਤਾਲਾਂ ਵਿੱਚ 465000 ਸਰਜਰੀਜ਼ ਕੀਤੀਆਂ ਗਈਆਂ।