ਓਟਵਾ, 6 ਜੂਨ (ਪੋਸਟ ਬਿਊਰੋ) : ਸਟੈਨਲੇ ਕੱਪ ਦੇ ਦੋ ਫਾਈਨਲ ਰਾਊਂਡਜ਼ ਲਈ ਨੈਸ਼ਨਲ ਹਾਕੀ ਲੀਗ (ਐਨ ਐਚ ਐਲ) ਟੀਮਾਂ ਨੂੰ ਕੈਨੇਡਾ-ਅਮਰੀਕਾ ਸਰਹੱਦ ਪਾਰ ਕਰਨ ਦੀ ਯੋਜਨਾ ਨੂੰ ਫੈਡਰਲ ਸਰਕਾਰ ਵੱਲੋਂ ਮਨਜ਼ੂਰੀ ਦੇ ਦਿੱਤੀ ਗਈ ਹੈ।ਟੀਮਾਂ ਕੁਆਰਨਟੀਨ ਹੋਏ ਬਿਨਾਂ ਮੈਚਾਂ ਵਿੱਚ ਹਿੱਸਾ ਲੈ ਸਕਣਗੀਆਂ।
ਟੀਮ ਮੈਂਬਰ ਦੇਸ਼ ਤੋਂ ਬਾਹਰ ਜਾ ਵੀ ਸਕਣਗੇ ਤੇ ਆ ਵੀ ਸਕਣਗੇੇ। ਇਸ ਲਈ ਉਹ ਆਪਣੇ ਪ੍ਰਾਈਵੇਟ ਜਹਾਜ਼ਾਂ ਦੀ ਵਰਤੋਂ ਕਰ ਸਕਦੇ ਹਨ। ਇਸ ਦੇ ਨਾਲ ਹੀ ਰੋਜ਼ਾਨਾਂ ਕੋਵਿਡ-19 ਟੈਸਟਿੰਗ ਦੇ ਨਾਲ ਨਾਲ ਖਿਡਾਰੀਆਂ ਤੇ ਹੋਰ ਟੀਮ ਮੈਂਬਰਾਂ ਨੂੰ ਕੈਨੇਡਾ ਤੋਂ ਜਾਣ ਤੋਂ ਪਹਿਲਾਂ ਤੇ ਵਾਪਿਸ ਇੱਥੇ ਪਹੁੰਚਣ ਤੋਂ ਬਾਅਦ ਵਿੱਚ ਕੋਵਿਡ-19 ਟੈਸਟ ਕਰਵਾਉਣਾ ਹੋਵੇਗਾ।
ਮੈਚਾਂ ਦੌਰਾਨ ਸਰਹੱਦੋਂ ਪਾਰ ਟਰੈਵਲ ਕਰਨ ਸਮੇਂ ਖਿਡਾਰੀਆਂ ਨੂੰ ਕੁਆਰਨਟੀਨ ਦਾਇਰੇ ਵਿੱਚ ਰੱਖਿਆ ਜਾਵੇਗਾ, ਜਿਵੇਂ ਕਿ ਟੀਮ ਦੇ ਹੋਟਲ ਆਦਿ ਵਾਲੀ ਥਾਂ ਬਿਲਕੁਲ ਅਲੱਗ ਥਲੱਗ ਹੋਵੇਗੀ। ਇਹ ਵੀ ਧਿਆਨ ਰੱਖਿਆ ਜਾਵੇਗਾ ਕਿ ਖਿਡਾਰੀ ਤੇ ਆਮ ਜਨਤਾ ਕੋਈ ਵੀ ਫੈਸਿਲਿਟੀ ਸਾਂਝੀ ਨਾ ਕਰਨ ਤੇ ਖਿਡਾਰੀਆਂ ਦਾ ਕੈਨੇਡਾ ਤੇ ਅਮਰੀਕਾ ਵਿੱਚ ਆਮ ਜਨਤਾ ਨਾਲ ਵਾਹ ਨਾ ਪਵੇ।