ਓਟਵਾ, 28 ਮਈ (ਪੋਸਟ ਬਿਊਰੋ) : ਕੈਨੇਡਾ ਰੈਵਨਿਊ ਏਜੰਸੀ ਦਾ ਕਹਿਣਾ ਹੈ ਕਿ ਪਿਛਲੇ ਸਾਲ ਐਮਰਜੰਸੀ ਬੈਨੇਫਿਟਸ ਹਾਸਲ ਕਰਨ ਵਾਲੇ ਹਜ਼ਾਰਾਂ ਸੈਲਫ ਇੰਪਲੌਈਡ ਵਰਕਰਜ਼ ਨੂੰ ਇਹ ਰਕਮ ਉਤਾਰਨ ਦੀ ਲੋੜ ਨਹੀਂ ਹੈ। ਪਰ ਇਸ ਲਈ ਉਨ੍ਹਾਂ ਦਾ ਕੁੱਝ ਸ਼ਰਤਾਂ ਪੂਰੀਆਂ ਕਰਨਾ ਜ਼ਰੂਰੀ ਹੈ।
ਜਿਸ ਕਿਸੇ ਦੀ ਵੀ ਸੈਲਫ ਇੰਪਲੌਇਮੈਂਟ ਦੀ ਆਮਦਨ 5000 ਡਾਲਰ ਤੋਂ ਘੱਟ ਸੀ, ਉਨ੍ਹਾਂ ਲਈ ਸ਼ਰਤਾਂ ਵਿੱਚ ਇਹ ਵੀ ਸ਼ਾਮਲ ਹੈ ਕਿ ਉਨ੍ਹਾਂ 2019 ਤੇ 2020 ਦੀ ਆਪਣੀ ਟੈਕਸ ਰਿਟਰਨ ਭਰੀ ਹੋਵੇ ਤੇ ਬੈਨੇਫਿਟਸ ਲਈ ਆਪਣੀ ਅਰਜ਼ੀ ਤੋਂ 12 ਮਹੀਨੇ ਪਹਿਲਾਂ ਉਸ ਕੋਲ 5000 ਡਾਲਰ ਜਾਂ ਇਸ ਤੋਂ ਵੱਧ ਦੀ ਸੈਲਫ ਇੰਪਲੌਇਮੈਂਟ ਆਮਦਨ ਹੋਵੇ।ਇਸ ਤੋਂ ਇਲਾਵਾ ਸਬੰਧਤ ਵਰਕਰ ਨੇ ਕੈਨੇਡਾ ਐਮਰਜੰਸੀ ਰਿਸਪਾਂਸ ਬੈਨੇਫਿਟ ਲਈ ਸਰਕਾਰ ਵੱਲੋਂ ਉਲੀਕੇ ਗਏ ਸਾਰੇ ਮਾਪਦੰਡ ਵੀ ਪੂਰੇ ਕੀਤੇ ਹੋਣ।
ਏਜੰਸੀ ਦੇ ਅੰਦਾਜੇ਼ ਮੁਤਾਬਕ 30,000 ਦੇ ਨੇੜੇ ਤੇੜੇ ਲੋਕਾਂ ਨੂੰ ਸੀ ਈ ਆਰ ਬੀ ਪੇਅਮੈਂਟਸ ਰੀਫੰਡ ਕਰਨ ਦੀ ਲੋੜ ਨਹੀਂ।ਇਸ ਤੋਂ ਇਲਾਵਾ ਸਰਕਾਰ ਦੇ ਅੰਦਾਜ਼ੇ ਮੁਤਾਬਕ ਏਜੰਸੀ ਨੂੰ 6500 ਲੋਕਾਂ ਨੂੰ ਰੀਫੰਡ ਕੀਤੇ ਜਾਣ ਦੀ ਉਮੀਦ ਹੈ ਜਿਨ੍ਹਾਂ ਨੇ ਅਸਮਰੱਥ ਠਹਿਰਾਏ ਜਾਣ ਤੋਂ ਬਾਅਦ ਕੁੱਝ ਬੈਨੇਫਿਟ ਮੋੜ ਦਿੱਤੇ ਸਨ।