ਟੋਰਾਂਟੋ ਪੋਸਟ ਬਿਉਰੋ: ਕਰਤਾਰਪੁਰ ਸਾਹਿਬ ਦਾ ਲਾਂਘਾ ਖੁੱਲਣ ਦੇ ਐਲਾਨ ਲਈ ਸ਼ੁਕਰਾਨਾ ਕਰਨ ਲਈ ਸਿੱਖ ਸਪਿਰਿਚੁਅਲ ਸੈਂਟਰ ਰੈਕਸਡੇਲ ਵਿਖੇ ਐਤਵਾਰ ਵਾਲੇ ਦਿਨ ਹੋਏ ਸਮਾਗਮ ਵਿੱਚ ਵੱਡੀ ਗਿਣਤੀ ਵਿੱਚ ਸੰਗਤਾਂ ਨੇ ਹਿੱਸਾ ਲਿਆ। ਅਖੰਡ ਸਾਹਿਬ ਦੇ ਭੋਗ ਉਪਰੰਤ ਕੀਰਤਨ ਦਰਬਾਰ ਸਜਿਆ, ਢਾਡੀ ਵਾਰਾਂ ਹੋਈਆਂ ਅਤੇ ਇਸਤੋਂ ਬਾਅਦ ਉਂਟੇਰੀਓ ਗੁਰਦੁਆਰਾਜ਼ ਕਮੇਟੀ ਦੇ ਬੁਲਾਰੇ ਅਮਰਜੀਤ ਸਿੰਘ ਮਾਨ ਨੇ ਆਈਆਂ ਸੰਗਤਾਂ ਦਾ ਧੰਨਵਾਦ ਕੀਤਾ। ਉਹਨਾਂ ਨੇ ਸੰਗਤ ਵਿੱਚ ਪੁੱਜੇ ਟੋਰਾਂਟੋ ਵਿਖੇ ਪਾਕਿਸਤਾਨ ਦੇ ਕਾਨਸੁਲੇਟ ਜਨਰਲ ਇਮਰਾਨ ਸੱਦੀਕੀ ਅਤੇ ਪਾਕਿਸਤਾਨੀ ਭਾਈਚਾਰੇ ਦੇ ਹੋਰ ਮੈਂਬਰਾਂ ਦਾ ਸੁਆਗਤ ਕੀਤਾ। ਇਸ ਮੌਕੇ ਪਾਕਿਸਤਾਨੀ ਭਾਈਚਾਰੇ ਦੇ ਆਗੂ ਚੌਧਰੀ ਜਫ਼ਰ ਅਤੇ ਇਮਰਾਨ ਸੱਦੀਕੀ ਨੇ ਵੀ ਸੰਬੋਧਨ ਕੀਤਾ। ਸ੍ਰੀ ਸੱਦੀਕੀ ਨੇ ਕਿਹਾ ਕਿ ਸ੍ਰੀ ਗੁਰੂ ਨਾਨਕ ਦੇਵ ਜੀ ਸੱਭਨਾਂ ਦੇ ਸਾਂਝੇ ਰਹਿਬਰ ਹਨ। ਇਸ ਮੌਕੇ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਅਤੇ ਆਰਮੀ ਚੀਫ਼ ਜਾਵੇਦ ਬਾਜਵਾ ਲਈ ਸਨਮਾਨ ਚਿੰਨ ਵੀ ਭੇਟ ਕੀਤੇ ਗਏ ਜੋ ਸ੍ਰੀ ਸੱਦੀਕੀ ਨੇ ਹਾਸਲ ਕੀਤੇ।

ਚੌਧਰੀ ਜਫ਼ਰ ਨੇ ਇਸ ਮੌਕੇ ਆਖਿਆ ਕਿ ਉਹ 100 ਏਕੜ ਜ਼ਮੀਨ ਦੇ ਕੇ ਕਰਤਾਰਪੁਰ ਵਿਖੇ ਇੱਕ ਪੀਸ ਕੰਪਲੈਕਸ ਦੀ ਤਾਮੀਰ ਕਰਨਗੇ ਜਿਸ ਵਿੱਚ ਕੈਨੇਡੀਅਨ ਸਿੱਖਾਂ ਵੱਲੋਂ 100 ਕਮਰੇ ਬਣਾਉਣ ਲਈ ਸਹਿਯੋਗ ਦਿੱਤਾ ਜਾਵੇਗਾ। ਉਂਟਾਰੀਓ ਗੁਰਦੁਆਰਾਜ਼ ਕਮੇਟੀ ਦੇ ਪਰੈੱਸ ਰੀਲੀਜ਼ ਵਿੱਚ ਕਿਹਾ ਗਿਆ ਹੈ ਕਿ ਉਂਟਾਰੀਓ ਗੁਰਦੁਆਰਜ਼ ਕਮੇਟੀ ਵੀ ਇਸ ਵਿੱਚ ਹਿੱਸਾ ਪਾਵੇਗੀ। ਪਰੈੱਸ ਰੀਲੀਜ਼ ਵਿੱਚ ਪਾਕਿਸਤਾਨ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅਤੇ ਇਸਦੇ ਪ੍ਰਧਾਨ ਤਾਰਾ ਸਿੰਘ ਦਾ ਵੀ ਧੰਨਵਾਦ ਕੀਤਾ ਗਿਆ ਹੈ। ਭਗਤ ਸਿੰਘ ਬਰਾੜ ਨੇ ਸਟੇਜ ਦੀ ਜਿ਼ੰਮੇਵਾਰੀ ਬਖੂਬੀ ਨਿਭਾਈ। ਹੈਮਿਲਟਨ ਤੋਂ ਤਜਿੰਦਰ ਸਿੰਘ ਤੇ ਮੌਂਟਰੀਅਲ ਗੁਰੂ ਘਰ ਦੇ ਸੇਵਾਦਾਰਾਂ ਨੇ ਵੀ ਇਸ ਸਮਾਗਮ ਵਿਚ ਸਿ਼ਰਕਤ ਕੀਤੀ।