ਬਰੈਂਪਟਨ, 10 ਦਸੰਬਰ (ਪੋਸਟ ਬਿਊਰੋ) : ਬਰੈਂਪਟਨ ਨੌਰਥ ਤੋਂ ਮੈਂਬਰ ਪਾਰਲੀਆਮੈਂਟ ਰੂਬੀ ਸਹੋਤਾ ਤੇ ਐਮਪੀ ਸੋਨੀਆ ਸਿੱਧੂ ਵੱਲੋਂ ਕੈਨੇਡਾ ਦੇ ਸੀਨੀਅਰਜ਼ ਸਿਟੀਜ਼ਨਜ਼ ਦੀਆਂ ਲੋੜਾਂ ਨੂੰ ਚੰਗੀ ਤਰ੍ਹਾਂ ਸਮਝਣ ਤੇ ਉਨ੍ਹਾਂ ਮੁਤਾਬਕ ਸੇਵਾਵਾਂ ਵਿਕਸਤ ਕਰਨ ਲਈ ਮਦਦ ਹਾਸਲ ਕਰਨ ਵਾਸਤੇ ਬਜ਼ੁਰਗਾਂ ਲਈ ਮੰਤਰੀ ਫਿਲੋਮੇਨਾ ਟੈਸੀ ਨੂੰ ਬਰੈਂਪਟਨ ਆਉਣ ਦਾ ਸੱਦਾ ਦਿੱਤਾ ਗਿਆ ਸੀ।
ਇਸ ਉਪਰੰਤ ਟੈਸੀ ਵੱਲੋਂ ਬੀਤੇ ਦਿਨੀਂ ਸੀਨੀਅਰਜ਼ ਟਾਊਨਹਾਲ ਲਈ ਬਰੈਂਪਟਨ ਦਾ ਦੌਰਾ ਕੀਤਾ ਗਿਆ। ਜਿੱਥੇ ਉਨ੍ਹਾਂ ਨਾ ਸਿਰਫ ਸਰਕਾਰ ਵੱਲੋਂ ਬਜ਼ੁਰਗਾਂ ਦੀ ਮਦਦ ਲਈ ਚਲਾਏ ਜਾ ਰਹੇ ਪ੍ਰੋਗਰਾਮਾਂ ਵਿੱਚ ਕੀਤੇ ਜਾਣ ਵਾਲੇ ਨਿਵੇਸ਼ ਬਾਰੇ ਦੱਸਿਆ ਸਗੋਂ ਸੀਨੀਅਰਜ਼ ਦੀਆਂ ਲੋੜਾਂ ਨੂੰ ਵੀ ਸੁਣਿਆ ਤੇ ਆਡੀਐਂਸ ਦੇ ਸਵਾਲਾਂ ਦੇ ਜਵਾਬ ਵੀ ਦਿੱਤੇ। ਉੱਥੇ ਮੌਜੂਦ ਸੀਨੀਅਰਜ਼ ਨੂੰ ਟੈਸੀ ਨੇ ਦੱਸਿਆ ਕਿ ਲਿਬਰਲ ਸਰਕਾਰ ਕਿਸ ਤਰ੍ਹਾਂ ਉਨ੍ਹਾਂ ਦੀ ਆਮਦਨ ਵਿੱਚ ਸੁਧਾਰ ਲਈ ਸਕਿਊਰਿਟੀ, ਹੈਲਥ, ਕਿਫਾਇਤੀ ਹਾਊਸਿੰਗ ਤੇ ਸੀਨੀਅਰਜ਼ ਲਈ ਚਲਾਏ ਜਾਣ ਵਾਲੇ ਪ੍ਰੋਗਰਾਮਾਂ ਦਾ ਪਸਾਰ ਕਰ ਰਹੀ ਹੈ। ਟੈਸੀ ਨੇ ਆਖਿਆ ਕਿ ਸੀਨੀਅਰਜ਼ ਨਾਲ ਜੁੜੇ ਮੁੱਦੇ ਸਰਕਾਰ ਲਈ ਮੁੱਖ ਤਰਜੀਹ ਹਨ।
ਇਸ ਟਾਊਨਹਾਲ ਵਿੱਚ ਸੈਂਕੜੇ ਸੀਨੀਅਰਜ਼ ਨੇ ਹਿੱਸਾ ਲਿਆ। ਕਈਆਂ ਨੇ ਮੰਤਰੀ ਨਾਲ ਸਿੱਧੇ ਕਈ ਮੁੱਦਿਆਂ ਜਿਵੇਂ ਕਿ ਫਾਇਨਾਂਸਿੰਗ ਸਕਿਊਰਿਟੀ, ਸੀਨੀਅਰਜ਼ ਹਾਊਸਿੰਗ, ਹੈਲਥਕੇਅਰ ਨਾਲ ਜੁੜੀਆਂ ਲੋੜਾਂ, ਕੰਜਿ਼ਊਮਰ ਪ੍ਰੋਟੇਕਸ਼ਨ, ਸੀਨੀਅਰਜ਼ ਪ੍ਰੋਗਰਾਮਿੰਗ, ਗਰੀਬੀ, ਵਰਕਪਲੇਸ ਪੈਨਸ਼ਨ ਦੀ ਪ੍ਰੋਟੈਕਸ਼ਨ, ਤੇ ਨੈਸ਼ਨਲ ਫਾਰਮਾਕੇਅਰ ਬਾਰੇ ਵੀ ਗੱਲ ਕੀਤੀ।
ਐਮਪੀ ਸਹੋਤਾ ਨੇ ਆਖਿਆ ਕਿ ਕੈਨੇਡਾ ਸਰਕਾਰ ਕਈ ਸਾਲਾਂ ਤੋਂ ਸਾਡੇ ਸਮਾਜ ਤੇ ਅਰਥਚਾਰੇ ਵਿੱਚ ਕੈਨੇਡਾ ਦੇ ਸੀਨੀਅਰਜ਼ ਵੱਲੋਂ ਪਾਏ ਯੋਗਦਾਨ ਨੂੰ ਪਛਾਣਦੀ ਹੈ। ਅਸੀਂ ਇਸ ਗੱਲ ਦਾ ਖਾਸ ਖਿਆਲ ਰੱਖਾਂਗੇ ਕਿ ਭਰਪੂਰ ਜਿ਼ੰਦਗੀ ਜਿਊਣ ਲਈ ਸਾਡੇ ਸੀਨੀਅਰਜ਼ ਦੀ ਹਰ ਇੱਛਾ ਦਾ ਧਿਆਨ ਰੱਖਿਆ ਜਾਵੇ। ਸੀਨੀਅਰਜ਼ ਸਾਡੀ ਸਰਕਾਰ ਦੀ ਮੁੱਖ ਤਰਜੀਹ ਹਨ ਤੇ ਉਨ੍ਹਾਂ ਨਾਲ ਸਬੰਧਤ ਪ੍ਰੋਗਰਾਮਾਂ ਦਾ ਸਮਰਥਨ ਕਰਨ ਵਿੱਚ ਸਾਨੂੰ ਮਾਣ ਮਹਿਸੂਸ ਹੁੰਦਾ ਹੈ। ਅਸੀਂ ਚਾਹੁੰਦੇ ਹਾਂ ਕਿ ਉਹ ਪੂਰੀ ਤਰ੍ਹਾਂ ਸਰਗਰਮ ਰਹਿਣ ਤੇ ਆਪਣੀਆਂ ਕਮਿਊਨਿਟੀਜ਼ ਵਿੱਚ ਪੂਰਾ ਯੋਗਦਾਨ ਪਾਉਣ।