ਬਰੈਂਪਟਨ, 10 ਦਸੰਬਰ (ਪੋਸਟ ਬਿਊਰੋ) : ਬਰੈਂਪਟਨ ਕਾਉਂਸਲ ਉਸ ਰਿਪੋਰਟ ਉੱਤੇ ਵਿਚਾਰ ਕਰ ਰਹੀ ਹੈ ਜਿਸ ਵਿੱਚ 2019 ਦੇ ਬਜਟ ਵਿੱਚ ਬਹੁਤੀਆਂ ਸਿਟੀ ਸੇਵਾਵਾਂ ਲਈ ਯੂਜ਼ਰ ਫੀਸ ਵਿੱਚ ਵਾਧਾ ਕੀਤੇ ਜਾਣ ਦੀ ਸਿਫਾਰਿਸ਼ ਕੀਤੀ ਗਈ ਹੈ। 

ਰਿਪੋਰਟ ਅਨੁਸਾਰ ਹੁਣ ਇਹ ਫੈਸਲਾ ਕਾਉਂਸਲ ਨੂੰ ਲੈਣਾ ਹੋਵੇਗਾ ਕਿ ਮਨੋਰੰਜਨ ਤੋਂ ਲੈ ਕੇ ਜਾਨਵਰਾਂ ਸਬੰਧੀ ਸੇਵਾਵਾਂ ਦੇਣ ਲਈ ਉਹ ਫੀਸ ਵਿੱਚ ਵਾਧਾ ਕਰਦੀ ਹੈ ਜਾਂ ਫਿਰ ਪ੍ਰਾਪਰਟੀ ਟੈਕਸ ਵਿੱਚ 0.25 ਫੀ ਸਦੀ ਦਾ ਵਾਧਾ ਕਰਦੀ ਹੈ। ਸਿਟੀ ਸਟਾਫ ਵੱਲੋਂ 5 ਦਸੰਬਰ ਨੂੰ ਕਮੇਟੀ ਦੀ ਕਾਉੁਂਸਲ ਮੀਟਿੰਗ ਵਿੱਚ ਇਹ ਰਿਪੋਰਟ ਪੇਸ਼ ਕੀਤੀ ਗਈ ਸੀ। ਕਾਉਂਸਲ ਇਨ੍ਹਾਂ ਸਿਫਾਰਿਸ਼ਾਂ ਉੱਤੇ 12 ਦਸੰਬਰ ਦਿਨ ਬੁੱਧਵਾਰ ਨੂੰ ਹੋਣ ਵਾਲੀ ਨਿਯਮਿਤ ਮੀਟਿੰਗ ਵਿੱਚ ਵੋਟ ਕਰੇਗੀ।
ਖਜ਼ਾਨਚੀ ਡੇਵਿਡ ਸੁਟੌਨ ਨੇ ਕਾਉਂਸਲ ਨੂੰ ਦੱਸਿਆ ਕਿ ਜੇ ਕਾਉਂਸਲ ਚਾਹੁੰਦੀ ਹੈ ਕਿ ਯੂਜ਼ਰ ਫੀਸ ਵਿੱਚ ਵਾਧਾ ਨਾ ਕੀਤਾ ਜਾਵੇ ਤਾਂ ਉਨ੍ਹਾਂ ਕੋਲ ਆਮਦਨ ਦਾ ਇੱਕੋ ਜ਼ਰੀਆ ਪ੍ਰੌਪਰਟੀ ਟੈਕਸ ਦੇ ਰੂਪ ਵਿੱਚ ਬਚਦਾ ਹੈ। ਉਨ੍ਹਾਂ ਆਖਿਆ ਕਿ ਯੂਜ਼ਰਜ਼ ਫੀਸ ਵਿੱਚ ਵਾਧੇ ਨਾਲ ਸਿਟੀ ਦੀ ਆਮਦਨ ਵਿੱਚ 1.25 ਮਿਲੀਅਨ ਡਾਲਰ ਦਾ ਵਾਧਾ ਹੋਵੇਗਾ।
ਜੇ ਕਾਉਂਸਲ ਸਟਾਫ ਦੀਆਂ ਸਿਫਾਰਿਸ਼ਾਂ ਮੰਨਦੀ ਹੈ ਤਾਂ ਸਥਾਨਕ ਵਾਸੀਆਂ ਨੂੰ ਮਨੋਰੰਜਨ ਨਾਲ ਜੁੜੀ ਹਰ ਤਰ੍ਹਾਂ ਦੀ ਯੂਜ਼ਰ ਫੀਸ ਲਈ ਪੰਜ ਫੀ ਸਦੀ ਦਾ ਵਾਧਾ ਜਰਨਾ ਹੋਵੇਗਾ। ਜਿਹੜੇ ਹੋਰ ਪ੍ਰੋਗਰਾਮ ਪ੍ਰਭਾਵਿਤ ਹੋਣਗੇ ਉਨ੍ਹਾਂ ਵਿੱਚ ਜਾਨਵਰਾਂ ਨਾਲ ਜੁੜੀਆਂ ਸੇਵਾਵਾਂ ਸ਼ਾਮਲ ਹਨ, ਜਿਨ੍ਹਾਂ ਵਿੱਚ 2.5 ਫੀ ਸਦੀ ਵਾਧਾ ਹੋ ਸਕਦਾ ਹੈ ਜਦਕਿ ਕਿਰਾਏ ਆਦਿ ਵਿੱਚ 2.4 ਫੀ ਸਦੀ ਵਾਧਾ ਵੇਖਣ ਨੂੰ ਮਿਲ ਸਕਦਾ ਹੈ।
ਮੇਅਰ ਪੈਟ੍ਰਿਕ ਬ੍ਰਾਊਨ ਤੇ ਕੁੱਝ ਹੋਰਨਾ ਕਾਉਂਸਲਰਜ਼ ਵੱਲੋਂ ਇਹ ਚਿੰਤਾ ਪ੍ਰਗਟਾਈ ਜਾ ਰਹੀ ਹੈ ਕਿ ਇਸ ਤਰ੍ਹਾਂ ਫੀਸਾਂ ਵਿੱਚ ਵਾਧਾ ਕੀਤੇ ਜਾਣ ਦਾ ਅਸਰ ਸਿਟੀ ਦੀਆਂ ਹੋਰਨਾਂ ਪਹਿਲਕਦਮੀਆਂ ਜਿਵੇਂ ਕਿ ਸਿਹਤ ਵਿੱਚ ਸੁਧਾਰ ਲਿਆਉਣ, ਫਿੱਟਨੈੱਸ ਤੇ ਨੌਜਵਾਨਾਂ ਨੂੰ ਨਸਿ਼ਆਂ ਤੋਂ ਦੂਰ ਰੱਖਣ ਲਈ ਕੀਤੀਆਂ ਜਾ ਰਹੀਆਂ ਕੋਸਿ਼ਸ਼ਾਂ ਉੱਤੇ ਵੀ ਪੈ ਸਕਦਾ ਹੈ।