ਓਟਵਾ, 19 ਅਪਰੈਲ (ਪੋਸਟ ਬਿਊਰੋ) : ਵਾਅਦੇ ਮੁਤਾਬਕ ਕੋਵਿਡ-19 ਵੈਕਸੀਨਜ਼ ਵੱਡੀ ਗਿਣਤੀ ਵਿੱਚ ਹਾਸਲ ਕਰਨ ਲਈ ਅਜੇ ਕੈਨੇਡਾ ਨੂੰ ਥੋੜ੍ਹਾ ਸਮਾਂ ਹੋਰ ਉਡੀਕ ਕਰਨੀ ਪੈ ਸਕਦੀ ਹੈ।
ਫੈਡਰਲ ਸਰਕਾਰ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਉਮੀਦ ਹੈ ਕਿ ਇਸ ਹਫਤੇ ਫਾਈਜ਼ਰ-ਬਾਇਓਐਨਟੈਕ ਦੇ 1 ਮਿਲੀਅਨ ਸ਼ੌਟਜ਼ ਹਾਸਲ ਹੋ ਜਾਣਗੇ। ਦੋ ਫਾਰਮਾਸਿਊਟੀਕਲ ਫਰਮਾਂ ਵੱਲੋਂ ਨਿਰਧਾਰਤ ਸ਼ਡਿਊਲ ਉੱਤੇ ਡੋਜ਼ਾਂ ਮੁਹੱਈਆ ਕਰਵਾਈਆਂ ਜਾਣਗੀਆਂ। ਓਟਵਾ ਨੂੰ ਮੌਡਰਨਾ ਤੋਂ ਵੀ 1·2 ਮਿਲੀਅਨ ਡੋਜ਼ਾਂ ਹਾਸਲ ਹੋਣ ਦੀ ਉਮੀਦ ਸੀ ਪਰ ਅਜਿਹਾ ਪਿਛਲੇ ਹਫਤੇ ਉਦੋਂ ਤੱਕ ਸੀ ਜਦੋਂ ਸਰਕਾਰੀ ਅਧਿਕਾਰੀਆਂ ਨੇ ਇਹ ਖੁਲਾਸਾ ਕੀਤਾ ਕਿ ਇਸ ਖੇਪ ਵਿੱਚ ਦੇਰ ਹੋ ਸਕਦੀ ਹੈ।
ਸਰਕਾਰ ਵੱਲੋਂ ਇਹ ਦੋਸ਼ ਲਾਇਆ ਗਿਆ ਹੈ ਕਿ ਕੁਆਲਿਟੀ ਐਸਿ਼ਓਰੈਂਸ ਟੈਸਟਿੰਗ ਕਾਰਨ ਇਹ ਕਮੀ ਆਈ ਹੈ ਤੇ ਇਸ ਕਾਰਨ ਕੈਨੇਡਾ ਨੂੰ ਹਾਸਲ ਹੋਣ ਵਾਲੀਆਂ ਡੋਜ਼ਾਂ ਇਸ ਮਹੀਨੇ ਅੱਧੀਆਂ ਰਹਿ ਜਾਂਣਗੀਆਂ ਤੇ ਇਨ੍ਹਾਂ ਦੀ ਡਲਿਵਰੀ ਵਿੱਚ ਵੀ ਘੱਟੋ ਘੱਟ ਇੱਕ ਹਫਤੇ ਦੀ ਦੇਰ ਹੋ ਜਾਵੇਗੀ। ਅਗਲੇ ਸੱਤ ਦਿਨਾਂ ਤੱਕ ਓਟਵਾ ਨੂੰ ਆਕਸਫੋਰਡ-ਐਸਟ੍ਰਾਜ਼ੈਨੇਕਾ ਜਾਂ ਜੌਹਨਸਨ ਐਂਡ ਜੌਹਨਸਨ ਵੈਕਸੀਨਜ਼ ਦੀ ਕੋਈ ਖੇਪ ਹਾਸਲ ਨਹੀਂ ਹੋਣ ਵਾਲੀ।ਫਿਰ ਵੀ ਫੈਡਰਲ ਸਰਕਾਰ ਨੂੰ ਇਹ ਪੂਰੀ ਆਸ ਹੈ ਕਿ ਸਤੰਬਰ ਦੇ ਅੰਤ ਤੱਕ ਸਾਰੇ ਬਾਲਗਾਂ ਦਾ ਟੀਕਾਕਰਣ ਪੂਰਾ ਹੋ ਜਾਵੇਗਾ।