ਓਨਟਾਰੀਓ, 4 ਮਾਰਚ (ਪੋਸਟ ਬਿਊਰੋ) : ਫੋਰਡ ਸਰਕਾਰ ਵੱਲੋਂ ਕੋਵਿਡ-19 ਮਹਾਂਮਾਰੀ ਕਾਰਨ ਪਏ ਤੇ ਅਜੇ ਵੀ ਪੈ ਰਹੇ ਵਿੱਤੀ ਪ੍ਰਭਾਵ ਨਾਲ ਸੰੰਘਰਸ਼ ਕਰ ਰਹੀਆਂ ਮਿਊਂਸਪੈਲਿਟੀਜ਼ ਲਈ 500 ਮਿਲੀਅਨ ਡਾਲਰ ਦੇ ਫੰਡ ਜਾਰੀ ਕੀਤੇ ਗਏ ਹਨ।
ਇਹ ਰਕਮ 19 ਬਿਲੀਅਨ ਡਾਲਰ ਦੇ ਫੈਡਰਲ ਸੇਫ ਰੀਸਟਾਰਟ ਪ੍ਰੋਗਰਾਮ ਦੇ ਦੂਜੇ ਪੜਾਅ ਤਹਿਤ ਫੋਰਡ ਸਰਕਾਰ ਵੱਲੋਂ ਮਿਊਂਸਪੈਲਿਟੀਜ਼ ਨੂੰ ਜਾਰੀ ਕੀਤੇ ਗਏ 695 ਮਿਲੀਅਨ ਡਾਲਰ ਤੋਂ ਵੱਖਰੀ ਹੈ। ਇਹ ਰਕਮ ਮੇਅਰ ਜੌਹਨ ਟੋਰੀ ਵੱਲੋਂ ਸੇਫ ਰੀਸਟਾਰਟ 2·0 ਦੇ ਪੱਖ ਵਿੱਚ ਕੀਤੀ ਗਈ ਲਾਬਿੰਗ ਦਾ ਹਿੱਸਾ ਹੈ।ਵੀਰਵਾਰ ਸਵੇਰੇ ਕੁਈਨਜ਼ ਪਾਰਕ ਵਿਖੇ ਇਹ ਐਲਾਨ ਕਰਨ ਸਮੇਂ ਮਿਊਂਸਪਲ ਅਫੇਅਰਜ਼ ਮੰਤਰੀ ਸਟੀਵ ਕਲਾਰਕ ਨੇ ਆਖਿਆ ਕਿ ਮਿਊਂਸਪੈਲਿਟੀਜ਼ ਵੱਲੋਂ ਇਹ ਸਪਸ਼ਟ ਕੀਤਾ ਜਾ ਚੁੱਕਿਆ ਹੈ ਕਿ ਉਨ੍ਹਾਂ ਨੂੰ ਬਿਹਤਰ ਸੇਵਾਵਾਂ ਦੇਣ ਲਈ ਹੋਰ ਸਥਿਰਤਾ ਦੀ ਲੋੜ ਹੈ ਇਸੇ ਲਈ ਸਾਡੀ ਸਰਕਾਰ ਵੀ ਆਰਥਿਕ ਮਦਦ ਕਰਨ ਤੋਂ ਬਿਲਕੁਲ ਨਹੀਂ ਹਿਚਕਚਾਈ।
ਇਨ੍ਹਾਂ ਵਾਧੂ ਫੰਡਾਂ ਨਾਲ ਮਿਊਂਸਪੈਲਿਟੀਜ਼ ਨੂੰ ਅਗਲੇ ਸਾਲ ਲਈ ਬਿਹਤਰ ਢੰਗ ਨਾਲ ਕੰਮ ਕਰਨ ਦਾ ਮੌਕਾ ਮਿਲੇਗਾ ਤੇ ਉਹ ਸਮਾਂ ਰਹਿੰਦਿਆਂ ਹੀ ਆਪਣਾ 2021 ਦਾ ਬਜਟ ਵੀ ਪਲੈਨ ਕਰ ਸਕਣਗੀਆਂ। ਅਜੇ ਵੀ ਟੋਰਾਂਟ ਿਦੇ 2021 ਬਜਟ ਵਿੱਚ 649 ਮਿਲੀਅਨ ਡਾਲਰ ਦਾ ਘਾਟਾ ਪਿਆ ਹੋਇਆ ਹੈ ਜਿਸ ਨੂੰ ਪੂਰਾ ਕਰਨ ਲਈ ਅਜੇ ਹੋਰ ਫੰਡਿੰਗ ਦੀ ਲੋੜ ਹੋਵੇਗੀ।ਵੀਰਵਾਰ ਨੂੰ ਜਾਰੀ ਕੀਤੀ ਰਲੀਜ਼ ਵਿੱਚ ਮੇਅਰ ਜੌਹਨ ਟੋਰੀ ਨੇ ਆਖਿਆ ਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਤਾਜ਼ਾ ਵੰਡੇ ਗਏ ਫੰਡਾਂ ਵਿੱਚੋਂ ਸਿਟੀ ਨੂੰ 164 ਮਿਲੀਅਨ ਡਾਲਰ ਹਾਸਲ ਹੋ ਜਾਣਗੇ।