ਓਨਟਾਰੀਓ, 18 ਫਰਵਰੀ (ਪੋਸਟ ਬਿਊਰੋ) : 17 ਫਰਵਰੀ, 2021 ਨੂੰ ਇੱਕ 18 ਸਾਲਾ ਲੜਕੀ ਸਾਹਮਣੇ ਆਈ ਤੇ ਉਸਨੇ ਦੱਸਿਆ ਕਿ ਇੱਕ ਵਿਅਕਤੀ ਨੇ ਉਸ ਨੂੰ ਜ਼ਬਰਦਸਤੀ ਜਿਸਮ ਫਰੋਸ਼ੀ ਦੇ ਕੰਮ ਵਿੱਚ ਧੱਕਿਆ। ਉਸ ਲੜਕੀ ਨੇ ਦੱਸਿਆ ਕਿ ਮਸ਼ਕੂਕ ਨਾਲ ਉਸ ਦੀ ਮੁਲਾਕਾਤ ਆਨਲਾਈਨ ਕਲਾਸੀਫਾਈਡਜ਼ ਐਡ ਰਾਹੀਂ ਹੋਈ। ਮਸ਼ਕੂਕ ਨੇ ਕਥਿਤ ਤੌਰ ਉੱਤੇ ਇਸ ਲੜਕੀ ਦਾ ਪੂਰੇ ਜੀਟੀਏ ਵਿੱਚ ਸ਼ੋਸ਼ਣ ਕੀਤਾ।
ਇਸ ਸਬੰਧ ਵਿੱਚ ਓਸ਼ਵਾ ਦੇ 29 ਸਾਲਾ ਸਟੀਵਨ ਪੌਂਸ ਨੂੰ ਹਮਲੇ, 5000 ਡਾਲਰ ਤੋਂ ਘੱਟ ਦੀ ਸ਼ਰਾਰਤ ਕਰਨਾ, ਜਿਨਸੀ ਸੇਵਾਵਾਂ ਰਾਹੀਂ ਲਾਹਾ ਲੈਣ, 18 ਸਾਲ ਤੋਂ ਵੱਧ ਉਮਰ ਦੇ ਵਿਅਕਤੀ ਦੀ ਸਮਗਲਿੰਗ ਤੋਂ ਫਾਇਦਾ ਲੈਣਾ, ਕਿਸੇ ਤੋਂ ਜ਼ਬਰਦਸਤੀ ਦੇਹ ਵਪਾਰ ਕਰਵਾਉਣ, ਕਿਸੇ ਨਾਲ ਜਬਰ ਜਿਨਾਹ ਕਰਨ ਸਮੇਤ ਕਈ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਉਸ ਨੂੰ ਅੱਜ ਜ਼ਮਾਨਤ ਦੀ ਸੁਣਵਾਈ ਲਈ ਪੇਸ਼ ਕੀਤਾ ਜਾਵੇਗਾ। ਪੁਲਿਸ ਵੱਲੋਂ ਉਸ ਦੀ ਇੱਕ ਤਸਵੀਰ ਜਾਰੀ ਕੀਤੀ ਗਈ ਹੈ ਤਾਂ ਕਿ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਕਿਸੇ ਹੋਰ ਵਿਅਕਤੀ ਨੂੰ ਉਸ ਨੇ ਆਪਣਾ ਸਿ਼ਕਾਰ ਤਾਂ ਨਹੀਂ ਬਣਾਇਆ।