ਟੋਰਾਂਟੋ, 17 ਫਰਵਰੀ (ਪੋਸਟ ਬਿਊਰੋ) : ਟੋਰਾਂਟੋ ਤੇ ਪੀਲ ਰੀਜਨ ਵੱਲੋਂ ਮੌਜੂਦਾ ਸਖ਼ਤ ਲਾਕਡਾਊਨ ਸਬੰਧੀ ਮਾਪਦੰਡਾਂ ਨੂੰ ਦੋ ਹਫਤਿਆਂ ਲਈ ਹੋਰ ਵਧਾਉਣ ਦੀ ਸਿਫਾਰਿਸ਼ ਕੀਤੀ ਜਾ ਰਹੀ ਹੈ।
ਬੁੱਧਵਾਰ ਦੁਪਹਿਰ ਨੂੰ ਮੇਅਰ ਜੌਹਨ ਟੋਰੀ ਵੱਲੋਂ ਸਿਟੀ ਹਾਲ ਵਿੱਚ ਇਹ ਐਲਾਨ ਕੀਤਾ ਗਿਆ। ਉਨ੍ਹਾਂ ਆਖਿਆ ਕਿ ਇਹ ਸਿਫਾਰਿਸ਼ ਸਿਟੀ ਵਿੱਚ ਕੋਵਿਡ-19 ਦੀ ਤੀਜੀ ਵੇਵ ਨੂੰ ਰੋਕਣ ਲਈ ਕੀਤੀਆਂ ਗਈਆਂ ਹਨ।ਜੇ ਇਨ੍ਹਾਂ ਸਿਫਾਰਿਸ਼ਾਂ ਨੂੰ ਪ੍ਰੋਵਿੰਸ ਵੱਲੋਂ ਮਨਜ਼ੂਰੀ ਦੇ ਦਿੱਤੀ ਜਾਂਦੀ ਹੈ ਤਾਂ ਟੋਰਾਂਟੋ ਤੇ ਪੀਲ ਰੀਜਨ 22 ਫਰਵਰੀ ਨੂੰ ਕਲਰ ਕੋਡ ਵਾਲੇ ਫਰੇਮਵਰਕ ਵਿੱਚ ਦਾਖਲ ਨਹੀਂ ਹੋਣਗੇ ਤੇ 9 ਮਾਰਚ ਤੱਕ ਪੂਰੀ ਤਰ੍ਹਾਂ ਲਾਕਡਾਊਨ ਵਿੱਚ ਰਹਿਣਗੇ।
ਟੋਰੀ ਨੇ ਆਖਿਆ ਕਿ ਇਹ ਸਿਫਾਰਿਸ਼ਾਂ ਸਿਟੀ ਦੇ ਉੱਘੇ ਡਾਕਟਰ ਦੀ ਸਲਾਹ ਉੱਤੇ ਹੀ ਕੀਤੀਆਂ ਗਈਆਂ ਹਨ। ਟੋਰਾਂਟੋ ਦੀ ਮੈਡੀਕਲ ਆਫੀਸਰ ਆਫ ਹੈਲਥ ਡਾ·ਐਲੀਨ ਡੀ ਵਿੱਲਾ ਨੇ ਬੁੱਧਵਾਰ ਦੁਪਹਿਰ ਨੂੰ ਆਖਿਆ ਕਿ ਭਵਿੱਖ ਨੂੰ ਲੈ ਕੇ ਜਿੰਨੀ ਚਿੰਤਤ ਉਹ ਅੱਜ ਹੈ ਓਨੀ ਕਦੇ ਨਹੀਂ ਰਹੀ।ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਕੋਵਿਡ-19 ਦੇ ਨਵੇਂ ਵੇਰੀਐਂਟਸ ਪ੍ਰੋਵਿੰਸ ਭਰ ਵਿੱਚ ਫੈਲਣ ਕਾਰਨ ਜੇ ਸਿਟੀ ਨੂੰ ਐਨੀ ਜਲਦੀ ਰੀਓਪਨ ਕੀਤਾ ਜਾਂਦਾ ਹੈ ਤਾਂ ਇਨਫੈਕਸ਼ਨ ਦੇ ਤੇਜ਼ੀ ਨਾਲ ਫੈਲਣ ਦਾ ਡਰ ਹੈ।
ਇਹ ਮਾਮਲੇ ਹੋਰ ਨਾ ਵਧਣ ਇਸ ਲਈ ਸਾਨੂੰ ਹੁਣੇ ਅਹਿਤਿਆਤ ਵਰਤਣ ਦੀ ਲੋੜ ਹੈ। ਟੋਰੀ ਨੇ ਆਖਿਆ ਕਿ ਦੋ ਹੋਰ ਹਫਤਿਆਂ ਲਈ ਟੋਰਾਂਟੋ ਨੂੰ ਬੰਦ ਰੱਖਣ ਨਾਲ ਇਹ ਉਮੀਦ ਕੀਤੀ ਜਾ ਸਕਦੀ ਹੈ ਕਿ ਅਸੀਂ ਭਵਿੱਖ ਦੇ ਹੋਰ ਲਾਕਡਾਊਨ ਤੋਂ ਬਚ ਜਾਵਾਂਗੇ।