ਓਟਵਾ, 4 ਦਸੰਬਰ (ਪੋਸਟ ਬਿਊਰੋ) : ਸ਼ਰਾਬ ਪੀਣ ਤੋਂ ਬਾਅਦ ਡਰਾਈਵਿੰਗ ਕਰਦੇ ਹੋਏ ਫੜ੍ਹੇ ਜਾਣ ਉੱਤੇ ਤੁਹਾਨੂੰ ਨਵੇਂ ਫੈਡਰਲ ਨਿਯਮਾਂ ਤਹਿਤ ਜੁਰਮਾਨਾਂ ਜਾਂ ਸਜ਼ਾ ਹੋਵੇਗੀ। ਛੁੱਟੀਆਂ ਵਾਲੇ ਸੀਜ਼ਨ ਨੂੰ ਧਿਆਨ ਵਿੱਚ ਰੱਖਕੇ ਬਣਾਏ ਗਏ ਇਹ ਨਿਯਮ ਅਗਲੇ ਦੋ ਹਫਤਿਆਂ ਵਿੱਚ ਲਾਗੂ ਹੋ ਜਾਣਗੇ।
ਬਾਰਡਰ ਸਕਿਊਰਿਟੀ ਐਂਡ ਆਰਗੇਨਾਈਜ਼ਡ ਕ੍ਰਾਈਮ ਰਿਡਕਸ਼ਨ ਮੰਤਰੀ ਬਿੱਲ ਬਲੇਅਰ ਨੇ ਮੰਗਲਵਾਰ ਨੂੰ ਪਾਰਲੀਆਮੈਂਟ ਹਿੱਲ ਉੱਤੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਆਖਿਆ ਕਿ ਹੁਣ ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਦੀ ਸੰਭਾਵਨਾ ਪਹਿਲਾਂ ਨਾਲੋਂ ਕਿਤੇ ਜਿ਼ਆਦਾ ਵੱਧ ਜਾਵੇਗੀ। ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਵਾਲੇ ਨਿਯਮਾਂ ਵਿੱਚ ਤਬਦੀਲੀਆਂ ਜੂਨ ਵਿੱਚ ਬਿੱਲ ਸੀ-46 ਦੇ ਹਿੱਸੇ ਵਜੋਂ ਪਾਸ ਕੀਤੀਆਂ ਗਈਆਂ। ਇਹ ਨਸਿ਼ਆਂ ਦੇ ਪ੍ਰਭਾਵ ਵਿੱਚ ਗੱਡੀ ਚਲਾਉਣ ਸਬੰਧੀ ਬਿੱਲ ਸੀ ਜਿਹੜਾ ਇਤਫਾਕਨ ਮੈਰੀਜੁਆਨਾ ਦੇ ਕਾਨੂੰਨੀਕਰਨ ਤੋਂ ਬਾਅਦ ਲਿਆਂਦੇ ਕਾਨੂੰਨ ਦੌਰਾਨ ਆਇਆ।
ਕੈਨੇਡਾ ਦੇ ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਵਾਲੇ ਕਾਨੂੰਨ ਵਿੱਚ ਕੀਤੀ ਗਈ ਸੋਧ ਮੁਤਾਬਕ ਪੁਲਿਸ ਅਧਿਕਾਰੀਆਂ ਨੂੰ ਇਹ ਅਧਿਕਾਰ ਹੋਵੇਗਾ ਕਿ ਉਹ ਜਿਹੜੇ ਡਰਾਈਵਰਾਂ ਨੂੰ ਰੋਕਣਗੇ ਬਿਨਾਂ ਕਿਸੇ ਸ਼ੱਕ ਦੇ ਉਨ੍ਹਾਂ ਦੇ ਸਾਹ ਦੀ ਜਾਂਚ ਮੌਕੇ ਉੱਤੇ ਹੀ ਲਾਜ਼ਮੀ ਤੌਰ ਉੱਤੇ ਕਰ ਸਕਣਗੇ। ਹਾਲਾਂਕਿ ਕਿਸੇ ਨੂੰ ਰੋਕਣ ਤੇ ਗੱਡੀ ਤੋਂ ਬਾਹਰ ਕੱਢਣ ਲਈ ਪੁਲਿਸ ਕੋਲ ਅਜਿਹਾ ਕਰਨ ਦਾ ਠੋਸ ਕਾਰਨ ਹੋਣਾ ਜ਼ਰੂਰੀ ਹੋਵੇਗਾ। ਜੇ ਸਬੰਧਤ ਡਰਾਈਵਰ ਸਕਰੀਨਿੰਗ ਵਿੱਚ ਅਸਫਲ ਰਹਿੰਦਾ ਹੈ ਤੇ ਕਾਨੂੰਨੀ ਤੌਰ ਉੱਤੇ ਮਿਥੀ ਗਈ ਹੱਦ ਤੋਂ ਵੱਧ ਸ਼ਰਾਬ ਪੀ ਕੇ ਗੱਡੀ ਚਲਾਉਂਦਾ ਫੜ੍ਹਿਆ ਜਾਂਦਾ ਹੈ ਤਾਂ ਉਸ ਦੇ ਖੂਨ ਵਿੱਚ ਸ਼ਰਾਬ ਦੀ ਮਾਤਰਾ ਦਾ ਪਤਾ ਲਾਉਣ ਲਈ ਦੂਜਾ ਟੈਸਟ ਪੁਲਿਸ ਸਟੇਸ਼ਨ ਵਿੱਚ ਕੀਤਾ ਜਾਵੇਗਾ। ਇਨ੍ਹਾਂ ਤਬਦੀਲੀਆਂ ਤੋਂ ਬਾਅਦ ਕਾਨੂੰਨ ਵਿੱਚ ਮਿਥੀ ਹੱਦ ਨਾਲੋਂ ਵੱਧ ਸ਼ਰਾਬ ਪੀਣ ਦੇ ਦੋ ਘੰਟਿਆਂ ਦੇ ਅੰਦਰ ਅੰਦਰ ਗੱਡੀ ਚਲਾਉਣਾ ਵੀ ਗੈਰਕਾਨੂੰਨੀ ਹੋਵੇਗਾ। ਅਜਿਹਾ ਕਰਨ ਵਾਲੇ ਨੂੰ ਸਖਤ ਜੁਰਮਾਨੇ ਜਾਂ ਸਜ਼ਾ ਦਾ ਸਾਹਮਣਾ ਕਰਨਾ ਹੋਵੇਗਾ।
ਇਹ ਤਬਦੀਲੀਆਂ ਭਾਵੇਂ ਜੂਨ ਵਿੱਚ ਪਾਸ ਹੋ ਗਈਆਂ ਸਨ ਪਰ ਕਾਨੂੰਨ ਦਾ ਇਹ ਹਿੱਸਾ 18 ਦਸੰਬਰ ਤੋਂ ਲਾਗੂ ਹੋਵੇਗਾ। ਉਸ ਸਮੇਂ ਪਾਰਟੀ ਸੀਜ਼ਨ ਵੀ ਪੂਰੀ ਤਰ੍ਹਾਂ ਭਖਿਆ ਹੋਵੇਗਾ ਤੇ ਕੈਨੇਡਾ ਭਰ ਵਿੱਚ ਰਾਈਡ ਪ੍ਰੋਗਰਾਮ ਪੂਰੀ ਤਰ੍ਹਾਂ ਲਾਗੂ ਹੋਣਗੇ। ਇਸ ਨਾਲ ਜਿੱਥੇ ਸੜਕਾਂ ਪੂਰੀ ਤਰ੍ਹਾਂ ਸੁਰੱਖਿਅਤ ਹੋਣ ਦੀ ਸੰਭਾਵਨਾ ਹੈ ਉੱਥੇ ਹੀ ਸਾਲ ਦੇ ਇਸ ਹਿੱਸੇ ਦੌਰਾਨ ਹੋਣ ਵਾਲੇ ਹਾਦਸਿਆਂ ਦੀ ਗਿਣਤੀ ਘਟਣ ਦੀ ਵੀ ਪੂਰੀ ਉਮੀਦ ਹੈ।