ਗਿਊਲੇਫ, 4 ਦਸੰਬਰ (ਪੋਸਟ ਬਿਊਰੋ) : ਸਾਲਾਨਾ ਫੂਡ ਪ੍ਰਾਈਸ ਰਿਪੋਰਟ ਵਿੱਚ ਕੀਤੀ ਗਈ ਪੇਸ਼ੀਨਿਗੋਈ ਅਨੁਸਾਰ ਔਸਤਨ ਕੈਨੇਡੀਅਨ ਪਰਿਵਾਰ ਨੂੰ ਅਗਲੇ ਸਾਲ ਗਰੌਸਰੀ ਲਈ 400 ਡਾਲਰ ਤੇ ਬਾਹਰ ਖਾਣਾ ਖਾਣ ਲਈ 150 ਡਾਲਰ ਹੋਰ ਦੇਣੇ ਪਿਆ ਕਰਨਗੇ।
ਯੂਨੀਵਰਸਿਟੀ ਆਫ ਗਿਊਲੇਫ ਤੇ ਡਲਹਾਊਜ਼ੀ ਯੂਨੀਵਰਸਿਟੀ ਦੇ ਖੋਜਕਾਰੀਆਂ ਦੀ ਇਸ ਰਿਪੋਰਟ ਅਨੁਸਾਰ 2019 ਵਿੱਚ ਖਾਣੇ ਦੀਆਂ ਕੀਮਤਾਂ ਵਿੱਚ 1.5 ਤੋਂ 3.5 ਫੀ ਸਦੀ ਦਰਮਿਆਨ ਵਾਧਾ ਹੋਵੇਗਾ। ਇਸ ਤੋਂ ਭਾਵ ਹੈ ਕਿ ਚਾਰ ਜੀਆਂ ਦੇ ਔਸਤਨ ਪਰਿਵਾਰ ਨੂੰ ਅਗਲੇ ਸਾਲ 12,157 ਡਾਲਰ ਖਰਚਣੇ ਹੋਣਗੇ ਜੋ ਕਿ 2018 ਨਾਲੋਂ 411 ਡਾਲਰ ਵੱਧ ਹੋਣਗੇ।
ਰਿਪੋਰਟ ਅਨੁਸਾਰ ਸਬਜ਼ੀਆਂ ਵਿੱਚ ਸੱਭ ਤੋਂ ਵੱਧ ਉਛਾਲ ਆਵੇਗਾ। ਇਨ੍ਹਾਂ ਵਿੱਚ ਚਾਰ ਤੇ ਛੇ ਫੀ ਸਦੀ ਵਾਧਾ ਹੋਣ ਦੀ ਸੰਭਾਵਨਾ ਹੈ। ਇਸ ਦੌਰਾਨ ਮੀਟ ਤੇ ਸੀਫੂਡ ਦੀਆਂ ਕੀਮਤਾਂ ਵਿੱਚ ਕਮੀ ਆਉਣ ਦੀ ਸੰਭਾਵਨਾ ਹੈ। ਮੀਟ ਵਾਲੀਆਂ ਵਸਤਾਂ ਇੱਕ ਤੋਂ ਤਿੰਨ ਫੀ ਸਦੀ ਤੱਕ ਘੱਟ ਸਕਦੀਆਂ ਹਨ ਤੇ ਸੀਫੂਡ ਦੀਆਂ ਕੀਮਤਾਂ ਜਾਂ ਤਾਂ ਪਹਿਲਾਂ ਵਾਂਗ ਹੀ ਬਣੀਆਂ ਰਹਿਣਗੀਆਂ ਤੇ ਜਾਂ ਫਿਰ ਇਨ੍ਹਾਂ ਵਿੱਚ ਦੋ ਫੀ ਸਦੀ ਤੱਕ ਕਮੀ ਆਵੇਗੀ।
2015 ਤੋਂ ਹੀ ਇਹ ਟੀਮ ਇਨ੍ਹਾਂ ਦੋ ਵੰਨਗੀਆਂ ਵਿੱਚ ਪੇਸ਼ੀਨਿਗੋਈ ਕਰਦੀ ਆ ਰਹੀ ਹੈ ਤੇ ਇਸ ਟੀਮ ਮੁਤਾਬਕ ਹਰ ਸਾਲ ਇਨ੍ਹਾਂ ਕੀਮਤਾਂ ਵਿੱਚ ਛੇ ਫੀ ਸਦੀ ਤੱਕ ਵਾਧਾ ਹੁੰਦਾ ਹੈ। ਇਸ ਵਿੱਚ ਕਮੀ ਆਉਣ ਦੀ ਗੱਲ ਕਰਦਿਆਂ ਖੋਜਕਾਰੀਆਂ ਵਿੱਚੋਂ ਇੱਕ ਤੇ ਡਲਹਾਊਜ਼ੀ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਸਿਲਵੇਨ ਚਾਰਲੇਬੌਇਸ ਨੇ ਆਖਿਆ ਕਿ ਸਾਡੇ ਲਈ ਇਹ ਥੋੜ੍ਹੀ ਖਤਰੇ ਵਾਲੀ ਗੱਲ ਹੈ ਤੇ ਅਸੀਂ ਕਦੇ ਅਜਿਹਾ ਕੀਤਾ ਵੀ ਨਹੀਂ ਹੈ। ਪਰ ਟੀਮ ਨੂੰ ਆਪਣੀਆਂ ਪੇਸ਼ੀਨਿਗੋਈਆਂ ਉੱਤੇ ਪੂਰਾ ਭਰੋਸਾ ਹੈ।