ਓਟਵਾ, 27 ਨਵੰਬਰ (ਪੋਸਟ ਬਿਊਰੋ) : ਓਸ਼ਵਾ, ਓਨਟਾਰੀਓ ਸਥਿਤ ਜਨਰਲ ਮੋਟਰਜ਼ ਦੇ ਵਰਕਰਜ਼ ਦੀ ਅਗਵਾਈ ਕਰਨ ਵਾਲੀ ਯੂਨੀਅਨ ਦੇ ਪ੍ਰਧਾਨ ਨੇ ਮੰਗਲਵਾਰ ਨੂੰ ਆਖਿਆ ਕਿ ਕੰਪਨੀ ਦਾ ਫੈਸਲਾ ਕੈਨੇਡਾ ਵਿੱਚ ਆਟੋ ਪਾਰਟਸ ਇੰਡਸਟਰੀ ਦੇ ਪਤਨ ਦਾ ਕਾਰਨ ਬਣ ਸਕਦਾ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਟਰੂਡੋ ਦੀ ਅਗਵਾਈ ਵਾਲੇ ਲਿਬਰਲਾਂ ਤੋਂ ਇਸ ਬਾਬਤ ਤਿੱਖੀ ਪ੍ਰਤੀਕਿਰਿਆ ਦੀ ਵੀ ਮੰਗ ਕੀਤੀ।
ਯੂਨੀਫੋਰ ਦੇ ਪ੍ਰੈਜ਼ੀਡੈਂਟ ਜੈਰੀ ਡਾਇਸ ਨੇ ਆਖਿਆ ਕਿ ਜਨਰਲ ਮੋਟਰਜ਼ ਨੇ ਅਮਰੀਕਾ ਦੇ ਰਾਸ਼ਟਰਪਤੀ ਤੇ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਨੂੰ ਟਿੱਚ ਸਮਝਦਿਆਂ ਹੋਇਆਂ ਕੈਨੇਡਾ ਤੇ ਅਮਰੀਕਾ ਤੋਂ ਪ੍ਰੋਡਕਸ਼ਨ ਬਾਹਰ ਲਿਜਾਣ ਦਾ ਫੈਸਲਾ ਕੀਤਾ ਹੈ। ਇਸ ਤੋਂ ਇਲਾਵਾ ਓਸ਼ਵਾ ਦੇ ਜਿਸ ਪਲਾਂਟ ਦੀ ਉਹ ਨੁਮਾਇੰਦਗੀ ਕਰਦੇ ਹਨ ਉੱਥੋਂ ਦੇ 2500 ਕਾਮਿਆਂ ਨੂੰ ਵੀ ਕੰਪਨੀ ਵਿਹਲਾ ਕਰਨ ਉੱਤੇ ਤੁਲੀ ਹੋਈ ਹੈ। ਪਾਰਲੀਆਮੈਂਟ ਹਿੱਲ ਉੱਤੇ ਟਰੂਡੋ ਨਾਲ ਮੁਲਾਕਾਤ ਕਰਨ ਤੋਂ ਬਾਅਦ ਡਾਇਸ ਨੇ ਆਖਿਆ ਕਿ ਸਾਡੇ ਨਾਲ ਉਸ ਕਾਰਪੋਰੇਸ਼ਨ ਵੱਲੋਂ ਖਿਲਵਾੜ ਕੀਤਾ ਜਾ ਰਿਹਾ ਹੈ ਜਿਹੜੀ ਆਪਣੇ ਹੀ ਨਿਯਮਾਂ ਨਾਲ ਖੇਡ ਰਹੀ ਹੈ। ਇਸ ਲਈ ਸਾਨੂੰ ਅਜਿਹੀਆਂ ਸਰਕਾਰਾਂ ਦੀ ਲੋੜ ਹੈ ਜਿਹੜੀਆਂ ਸਖਤ ਨਿਯਮਾਂ ਦੀ ਪਾਲਣਾ ਕਰਦੀਆਂ ਹੋਣ। ਜਿਹੜੀ ਕੰਪਨੀ ਸਰਕਾਰ ਨੂੰ ਟਿੱਚ ਜਾਣ ਰਹੀ ਹੈ ਸਰਕਾਰ ਨੂੰ ਵੀ ਉਸ ਨਾਲ ਉਹੋ ਜਿਹਾ ਹੀ ਵਿਵਹਾਰ ਕਰਨਾ ਚਾਹੀਦਾ ਹੈ।
ਡਾਇਸ ਨੇ ਆਖਿਆ ਕਿ ਜੀਐਮ ਨੇ ਪਿਛਲੇ ਕੁੱਝ ਸਾਲਾਂ ਵਿੱਚ ਪੰਜ ਮਾਡਲਾਂ ਦੀਆਂ ਗੱਡੀਆਂ ਦਾ ਉਤਪਾਦਨ ਮੈਕਸਿਕੋ ਤੇ ਅਮਰੀਕਾ ਸਿ਼ਫਟ ਕਰ ਦਿੱਤਾ ਹੈ ਤੇ ਜੇ ਓਸ਼ਵਾ ਵਾਲਾ ਪਲਾਂਟ ਵੀ ਬੰਦ ਹੋ ਜਾਂਦਾ ਹੈ ਤਾਂ ਕੰਪਨੀ ਦਾ ਇੱਥੇ ਇੱਕ ਹੀ ਪਲਾਂਟ ਰਹਿ ਜਾਵੇਗਾ। ਇਸ ਲਈ ਉਨ੍ਹਾਂ ਟਰੂਡੋ ਨੂੰ ਅਪੀਲ ਕੀਤੀ ਕਿ ਉਹ ਟਰੰਪ ਨਾਲ ਰਲ ਕੇ ਕੰਪਨੀ ਨੂੰ ਆਪਣਾ ਕਾਰੋਬਾਰ ਦੱਖਣ ਵੱਲ ਸਿ਼ਫਟ ਕਰਨ ਤੋਂ ਰੋਕਣ। ਪਰ ਜਨਰਲ ਮੋਟਰਜ਼ ਕੈਨੇਡਾ ਦੇ ਐਗਜੈ਼ਕਟਿਵ ਡੇਵਿਡ ਪੈਟਰਸਨ ਨੇ ਆਖਿਆ ਕਿ ਕੰਪਨੀ ਕੈਨੇਡਾ ਤੋਂ ਬਾਹਰ ਨਹੀਂ ਜਾ ਰਹੀ ਹੈ। ਸਗੋਂ ਕੰਪਨੀ ਵੱਲੋਂ ਟੋਰਾਂਟੋ ਦੇ ਉੱਤਰ ਵਿੱਚ ਸਥਿਤ ਮਾਰਖਮ ਵਿੱਚ ਆਪਣੇ ਟੈਕਨੀਕਲ ਸੈਂਟਰ ਲਈ 500 ਲੋਕਾਂ ਨੂੰ ਖੁਦ ਚੱਲਣ ਵਾਲੀਆਂ ਕਾਰਾਂ ਲਈ ਸਾਫਟਵੇਅਰ ਤਿਆਰ ਕਰਨ ਵਾਸਤੇ ਹਾਇਰ ਕੀਤਾ ਜਾ ਰਿਹਾ ਹੈ।