ਟੋਰਾਂਟੋ, 12 ਨਵੰਬਰ (ਪੋਸਟ ਬਿਊਰੋ) : ਹਵਾਈ ਸਫਰ ਕਰਨ ਵਾਲੇ ਯਾਤਰੀਆਂ ਲਈ ਬਹੁਤੇ ਦੇਸ਼ਾਂ ਵੱਲੋਂ ਕੋਵਿਡ-19 ਸਬੰਧੀ ਨੈਗੇਟਿਵ ਟੈਸਟ ਨੂੰ ਲਾਜ਼ਮੀ ਕੀਤਾ ਗਿਆ ਹੈ ਪਰ ਇਹ ਪਤਾ ਲੱਗਿਆ ਹੈ ਕਿ ਕੁੱਝ ਟੂਰਿਸਟ ਹਰ ਹਾਲ ਸਫਰ ਕਰਨ ਲਈ ਜਾਅਲੀ ਟੈਸਟ ਰਿਜ਼ਲਟ ਵੀ ਵਿਖਾ ਕੇ ਆਪਣਾ ਉੱਲੂ ਸਿੱਧਾ ਕਰ ਰਹੇ ਹਨ|
ਪੀਸੀਆਰ ਦੇ ਨੈਗੇਟਿਵ ਟੈਸਟ ਹਾਸਲ ਕਰਨ, ਜੋ ਕਿ ਡਿਪਾਰਚਰ ਸਮੇਂ ਹਾਸਲ ਕਰਨਾ ਔਖਾ ਹੈ, ਦੀ ਥਾਂ ਉੱਤੇ ਕੁੱਝ ਯਾਤਰੀ ਏਅਰਪੋਰਟ ਉੱਤੇ ਜਾਂ ਆਪਣੇ ਟਰੈਵਲ ਏਜੰਟਾਂ ਤੋਂ ਜਾਅਲੀ ਟੈਸਟ ਰਿਜ਼ਲਟ ਹਾਸਲ ਕਰ ਰਹੇ ਹਨ| ਇਸ ਤਰ੍ਹਾਂ ਦੇ ਕਈ ਮਾਮਲੇ ਬ੍ਰਾਜ਼ੀਲ, ਫਰਾਂਸ ਤੇ ਯੂ ਕੇ ਵਿੱਚ ਸਾਹਮਣੇ ਆ ਚੁੱਕੇ ਹਨ| ਅਧਿਕਾਰੀਆਂ ਵੱਲੋਂ ਦਿੱਤੀ ਗਈ ਚੇਤਾਵਲੀ ਅਨੁਸਾਰ ਟਰੈਵਲ ਸਬੰਧੀ ਪਾਬੰਦੀਆਂ ਲਾਗੂ ਹੋਣ ਦੇ ਬਾਵਜੂਦ ਕੁੱਝ ਯਾਤਰੀਆਂ ਵੱਲੋਂ ਅਜਿਹਾ ਕਰਨ ਨਾਲ ਹੋਰ ਪੈਸੈਂਜਰਜ਼ ਦੇ ਵਾਇਰਸ ਦੀ ਚਪੇਟ ਵਿੱਚ ਆਉਣ ਦਾ ਖਤਰਾ ਰਹਿੰਦਾ ਹੈ|
ਜ਼ਿਕਰਯੋਗ ਹੈ ਕਿ ਫਰਾਂਸ ਵਿੱਚ ਪੈਰਿਸ ਦੇ ਚਾਰਲਸ ਡੀ ਗੌਲੇ ਏਅਰਪੋਰਟ ਉੱਤੇ ਸਤੰਬਰ ਵਿੱਚ ਸੱਤ ਵਿਅਕਤੀਆਂ ਦੇ ਇੱਕ ਗਰੁੱਪ ਨੂੰ ਗ੍ਰਿਫਤਾਰ ਕੀਤਾ ਗਿਆ ਜਿਹੜੇ ਕਰੋਨਾਵਾਇਰਸ ਸਬੰਧੀ ਨੈਗੇਟਿਵ ਟੈਸਟ ਰਿਜ਼ਲਟਸ ਸਿੱਧ ਕਰਨ ਦੇ ਇਰਾਦੇ ਨਾਲ ਜਾਅਲੀ ਸਰਟੀਫਿਕੇਟ ਵੇਚ ਰਹੇ ਸਨ| ਫਰਾਂਸ ਤੋਂ ਇਥੋਪੀਆ ਜਾ ਰਹੇ ਇੱਕ ਟਰੈਵਲਰ ਕੋਲ ਜਾਅਲੀ ਸਰਟੀਫਿਕੇਟ ਹੋਣ ਤੋਂ ਬਾਅਦ ਜਾਰੀ ਕੀਤੀ ਗਈ ਜਾਂਚ ਵਿੱਚ ਇਸ ਗਰੁੱਪ ਦਾ ਪਰਦਾਫਾਸ਼ ਹੋਇਆ| ਇਹ ਗਰੁੱਪ ਜਾਅਲੀ ਟੈਸਟ ਰਿਜ਼ਲਟ ਬਦਲੇ ਪ੍ਰਤੀ ਵਿਅਕਤੀ 180 ਅਮਰੀਕੀ ਡਾਲਰ ਤੋਂ 360 ਅਮਰੀਕੀ ਡਾਲਰ ਤੱਕ ਵਸੂਲਦਾ ਸੀ|
ਇਨ੍ਹਾਂ ਸੱਤ ਵਿਅਕਤੀ ਉੱਤੇ ਫਰਾਡ ਤੇ ਧੋਖਾਧੜੀ ਦੇ ਚਾਰਜ ਲਾਏ ਗਏ ਹਨ| ਦੋਸ਼ੀ ਪਾਏ ਜਾਣ ਉੱਤੇ ਉਨ੍ਹਾਂ ਨੂੰ ਪੰਜ ਸਾਲ ਦੀ ਕੈਦ ਤੇ ਵੱਧ ਤੋਂ ਵੱਧ 445,000 ਅਮਰੀਕੀ ਡਾਲਰ ਦਾ ਜੁਰਮਾਨਾ ਹੋ ਸਕਦਾ ਹੈ| ਸਾਊਥ ਅਮਰੀਕਾ ਵਿੱਚ ਵੀ ਅਜਿਹੇ ਮਾਮਲੇ ਸਾਹਮਣੇ ਆਏ ਹਨ|