ਮਿਸੀਸਾਗਾ, 11 ਨਵੰਬਰ (ਪੋਸਟ ਬਿਊਰੋ) : ਪਿਛਲੇ ਸਾਲ ਮਿਸੀਸਾਗਾ ਵਿੱਚ ਸਟੱਫਵਿੱਲ ਦੇ ਇੱਕ ਵਿਅਕਤੀ ਦਾ ਕਤਲ ਕਰਨ ਦੇ ਸਬੰਧ ਵਿੱਚ ਪੁਲਿਸ ਨੇ ਚੌਥੇ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ ਹੈ|
ਬਰੈਂਪਟਨ ਦੇ 34 ਸਾਲਾ ਜਸਟਿਨ ਮੈਲਕੌਮ ਨੂੰ ਮਾਰੀਓ ਇਬ੍ਰਾਹਿਮ ਦੀ ਮੌਤ ਦੇ ਸਬੰਧ ਵਿੱਚ ਫਰਸਟ ਡਿਗਰੀ ਮਰਡਰ ਲਈ ਚਾਰਜ ਕੀਤਾ ਗਿਆ ਹੈ| ਉਸ ਦੀ ਗ੍ਰਿਫਤਾਰੀ ਲਈ ਮਾਰਚ 2020 ਵਿੱਚ ਵਾਰੰਟ ਜਾਰੀ ਕੀਤੇ ਗਏ ਸਨ| ਇੱਥੇ ਦੱਸਣਾ ਬਣਦਾ ਹੈ ਕਿ 26 ਸਾਲਾ ਇਬ੍ਰਾਹਿਮ 22 ਅਕਤੂਬਰ, 2019 ਦੀ ਰਾਤ ਨੂੰ ਬਰਨਹੈਮਥੌਰਪ ਰੋਡ ਵੈਸਟ ਤੇ ਕੌਨਫੈਡਰੇਸ਼ਨ ਪਾਰਕਵੇਅ ਨੇੜੇ ਵੈੱਬ ਡਰਾਈਵ ਉੱਤੇ ਸਥਿਤ ਕੌਂਡੋ ਕਾਂਪਲੈਕਸ ਦੇ ਬਾਹਰ ਪਾਰਕ ਕੀਤੀ ਗਈ ਆਪਣੀ ਕਾਰ ਵਿੱਚ ਬੈਠਾ ਸੀ|
ਪੁਲਿਸ ਨੇ ਦੱਸਿਆ ਕਿ ਇੱਕ ਮਸ਼ਕੂਕ ਕਾਰ ਕੋਲ ਆਇਆ ਤੇ ਉਸ ਨੇ ਇਬ੍ਰਾਹਿਮ ਉੱਤੇ ਕਈ ਗੋਲੀਆਂ ਚਲਾਈਆਂ ਤੇ ਫਿਰ ਮੌਕੇ ਤੋਂ ਫਰਾਰ ਹੋ ਗਿਆ| ਬਾਅਦ ਵਿੱਚ ਇਬ੍ਰਾਹਿਮ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ| ਇੱਕ ਰਲੀਜ਼ ਵਿੱਚ ਪੀਲ ਪੁਲਿਸ ਨੇ ਆਖਿਆ ਕਿ ਇਬ੍ਰਾਹਿਮ ਆਪਣੇ ਦੋਸਤ ਨਾਲ 20 ਅਕਤੂਬਰ ਨੂੰ ਮਿਸੀਸਾਗਾ ਤੋਂ ਤੁਰਿਆ ਸੀ ਤੇ ਉਹ ਹਾਈਵੇਅ 401 ਉੱਤੇ ਜਾ ਰਹੇ ਸਨ ਤੇ ਜਦੋਂ ਹਾਈਵੇਅ 427 ਉੱਤੇ ਪਹੁੰਚਣ ਵਾਲੇ ਹੋਏ ਤਾਂ ਇੱਕ ਹੋਰ ਗੱਡੀ ਉਨ੍ਹਾਂ ਦੇ ਨਾਲ ਪਹੁੰਚੀ ਤੇ ਉਨ੍ਹਾਂ ਉੱਤੇ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ|
ਇਸ ਘਟਨਾ ਵਿੱਚ ਕੋਈ ਵੀ ਜ਼ਖ਼ਮੀ ਨਹੀਂ ਹੋਇਆ| 30 ਦਸੰਬਰ, 2019 ਨੂੰ ਪੁਲਿਸ ਨੇ ਬਰੈਂਪਟਨ ਦੇ 38 ਸਾਲਾ ਜੇਸਨ ਵਿਲੀਅਮਜ਼ ਨੂੰ ਗ੍ਰਿਫਤਾਰ ਕੀਤਾ ਤੇ ਇਬ੍ਰਾਹਿਮ ਦੇ ਫਰਸਟ ਡਿਗਰੀ ਮਰਡਰ ਦੇ ਮਾਮਲੇ ਵਿੱਚ ਉਸ ਨੂੰ ਚਾਰਜ ਕੀਤਾ ਗਿਆ| ਵਿਲੀਅਮਜ਼ ਨੂੰ ਹੁਣ 20 ਅਕਤੂਬਰ, 2019 ਨੂੰ ਹੋਈ ਹਾਈਵੇਅ ਸੂæਟਿੰਗ ਦੇ ਸਬੰਧ ਵਿੱਚ ਕਤਲ ਦੀ ਕੋਸ਼ਿਸ਼ ਦੇ ਮਾਮਲੇ ਵਿੱਚ ਚਾਰਜ ਕੀਤਾ ਗਿਆ ਹੈ| ਵਿਲੀਅਮਜ਼ ਤੀਜਾ ਵਿਅਕਤੀ ਹੈ ਜਿਸ ਨੂੰ ਇਬ੍ਰਾਹਿਮ ਦੀ ਮੌਤ ਦੇ ਸਬੰਧ ਵਿੱਚ ਚਾਰਜ ਕੀਤਾ ਗਿਆ ਹੈ|
ਮਿਸੀਸਾਗਾ ਦੇ 24 ਸਾਲਾ ਬ੍ਰੈਂਡਨ ਡਰੇਕ ਸਾਇਮਨ ਤੇ 24 ਸਾਲਾ ਮੈਲਨੀ ਕ੍ਰਿਸਟੀਨ ਨੂੰ ਵੀ ਇਸ ਮਾਮਲੇ ਵਿੱਚ ਫਰਸਟ ਡਿਗਰੀ ਮਰਡਰ ਲਈ 4 ਦਸੰਬਰ, 2019 ਨੂੰ ਚਾਰਜ ਕੀਤਾ ਗਿਆ ਸੀ|