ਵਾਟਰਲੂ, 9 ਨਵੰਬਰ (ਪੋਸਟ ਬਿਊਰੋ) : ਵਾਟਰਲੂ ਰੀਜਨ ਪਬਲਿਕ ਹੈਲਥ ਅਧਿਕਾਰੀਆਂ ਵੱਲੋਂ ਇੱਕ ਲੋਕਲ ਰੈਸਟੋਰੈਂਟ ਜਾਣ ਵਾਲੇ ਲੋਕਾਂ ਨੂੰ ਕੋਵਿਡ-19 ਆਊਟਬ੍ਰੇਕ ਤੋਂ ਬਾਅਦ ਸੈਲਫ ਆਈਸੋਲੇਟ ਕਰਨ ਦੀ ਸਲਾਹ ਦਿੱਤੀ ਜਾ ਰਹੀ ਹੈ|
ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਕਿਚਨਰ, ਓਨਟਾਰੀਓ ਵਿੱਚ ਅਲਗਾਰਵ ਰੈਸਟੋਰੈਂਟ ਨਾਲ ਸਬੰਧਤ ਛੇ ਮਾਮਲਿਆਂ ਦੀ ਪੁਸ਼ਟੀ ਹੋਈ ਹੈ| ਵਾਟਰਲੂ ਪਬਲਿਕ ਹੈਲਥ ਦੇ ਦੱਸਣ ਮੁਤਾਬਕ 27 ਅਕਤੂਬਰ ਤੋਂ 4 ਨਵੰਬਰ ਦਰਮਿਆਨ 175 ਲੋਕ ਵਾਇਰਸ ਦਾ ਸ਼ਿਕਾਰ ਹੋਏ ਹੋ ਸਕਦੇ ਹਨ| ਇਸ ਅਰਸੇ ਦੌਰਾਨ ਇਸ ਰੈਸਟੋਰੈਂਟ ਦਾ ਦੌਰਾ ਕਰਨ ਵਾਲੇ ਲੋਕਾਂ ਨੂੰ ਅਧਿਕਾਰੀਆਂ ਵੱਲੋਂ 14 ਦਿਨ ਲਈ ਕੁਆਰਨਟੀਨ ਹੋਣ ਦੀ ਅਤੇ ਟੈਸਟ ਕਰਵਾਉਣ ਦੀ ਸਲਾਹ ਦਿੱਤੀ ਜਾ ਰਹੀ ਹੈ|
ਅਲਗਾਰਵ ਰੈਸਟੋਰੈਂਟ ਨੂੰ ਬੰਦ ਕਰ ਦਿੱਤਾ ਗਿਆ ਹੈ ਤੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਪੂਰਾ ਸਹਿਯੋਗ ਦਿੱਤਾ ਜਾ ਰਿਹਾ ਹੈ| ਪਬਲਿਕ ਹੈਲਥ ਅਨੁਸਾਰ ਇਸ ਗੱਲ ਦੇ ਪੁਖਤਾ ਸਬੂਤ ਹਨ ਜਿੱਥੇ ਰੈਸਟੋਰੈਂਟ ਤੇ ਹੋਰਨਾਂ ਸੈਟਿੰਗਜ਼ ਵਿੱਚ ਹੋਏ ਇੱਕਠ ਕਾਰਨ ਕੋਵਿਡ-19 ਫੈਲਿਆ ਹੋਵੇ| ਉਨ੍ਹਾਂ ਆਖਿਆ ਕਿ ਉਨ੍ਹਾਂ ਵੱਲੋਂ ਅਜਿਹੀਆਂ ਸੈਟਿੰਗਜ਼ ਵਿੱਚ ਹਾਈ ਰਿਸਕ ਵਿਅਕਤੀਆਂ ਦੀ ਪਛਾਣ ਕਰਕੇ ਉਨ੍ਹਾਂ ਨਾਲ ਸੰਪਰਕ ਵੀ ਕੀਤਾ ਗਿਆ ਹੈ|