ਮਿਸੀਸਾਗਾ 25 ਨਵੰਬਰ ਪੋਸਟ ਬਿਉਰੋ: ‘ਸੀ ਜੇ ਐਮ ਆਰ 1320 ਏ ਐਮ ਰੇਡੀਓ ਸਟੇਸ਼ਨ ਦੇ ਰੇਡੀਓ ਪ੍ਰੋਡਿਊਸਰਾਂ ਵੱਲੋਂ ਸਿੱਖ ਭਾਈਚਾਰੇ ਵੱਲੋਂ ਚਲਾਏ ਜਾਂਦੇ ਸੇਵਾ ਫੂਡ ਬੈਂਕ ਲਈ ਇੱਕ ਸਫ਼ਲ ਰੇਡੀਓਥਾਨ ਕਰਕੇ 1 ਲੱਖ 70 ਹਜ਼ਾਰ ਤੋਂ ਵੱਧ ਡਾਲਰ ਇੱਕਤਰ ਕੀਤੇ ਗਏ। 23 ਨਵੰਬਰ ਦਿਨ ਸ਼ੁੱਕਰਵਾਰ ਨੂੰ ਸਾਰਾ ਦਿਨ ਚੱਲੇ ਇਸ ਗਰੈਂਡ ਰੇਡੀਓਥਾਨ ਵਿੱਚ ਹਰ ਪੰਜਾਬੀ ਰੇਡੀਓ ਪ੍ਰੋਗਰਾਮ ਨੇ ਵੱਧ ਚੜ ਕੇ ਹਿੱਸਾ ਪਾਇਆ ਜਿਸਨੂੰ ਕਮਿਉਨਿਟੀ ਦੇ ਦਾਨੀਆਂ ਵੱਲੋਂ ਭਰਵਾਂ ਹੁੰਗਾਰਾ ਦਿੱਤਾ ਗਿਆ। ਇਹ ਰੇਡੀਓਥਾਨ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਜਨਮ ਦਿਵਸ ਨੂੰ ਸਮ੍ਰਪਿੱਤ ਸੀ।

ਰੇਡੀਓਥਾਨ ਨੂੰ ਸਹਿਯੋਗ ਦੇਣ ਵਾਲੇ ਪ੍ਰੋਗਰਾਮਾਂ ਵਿੱਚ ਰੰਗਲਾ ਪੰਜਾਬ, ਪਰਵਾਸੀ, ਪੰਜਾਬ ਦੀ ਗੂੰਜ, ਗੀਤਾਂ ਨਾਲ ਪ੍ਰੀਤਾਂ, ਯਾਹੂ ਰੇਡੀਓ, ਫੁੱਲਕਾਰੀ, ਸਰਗਮ, ਅੱਜ ਦੀ ਆਵਾਜ਼ ਅਤੇ ਮਹਿਫਲ ਰੇਡੀਓ ਸ਼ਾਮਲ ਰਹੇ। ਇਸਤੋਂ ਇਲਾਵਾ ਵੀਕਐਂਡ ਦੌਰਾਨ ਚੱਲਣ ਵਾਲੇ ਪ੍ਰੋਗਰਾਮਾਂ ‘ਦਿਲ ਆਪਣਾ ਪੰਜਾਬੀ, ਸਾਂਝ ਦਿਲਾਂ ਦੀ, ਆਪਣਾ ਪੰਜਾਬ ਰੇਡੀਓ, ਸਾਡਾ ਵਿਰਸਾ ਅਤੇ ਰੋਡ ਨਿਊਜ਼ ਰੰਗੋਲੀ ਪ੍ਰੋਗਰਾਮਾਂ ਵੱਲੋਂ ਵੀ ਦਿਲ ਜਾਨ ਨਾਲ ਮੁਹਿੰਮ ਵਿੱਚ ਯੋਗਦਾਨ ਪਾਇਆ ਗਿਆ। ਸੀ ਜੇ ਐਮ ਆਰ ਦੀ ਮੈਨੇਜਮੈਂਟ ਵੱਲੋਂ ਵੀ ਇਸ ਮੁਹਿੰਮ ਨੂੰ ਪੂਰਾ ਸਹਿਯੋਗ ਦਿੱਤਾ ਗਿਆ।

 ਫੂਡ ਡਰਾਈਵ ਦੇ ਸਫ਼ਲ ਰਹਿਣ ਉੱਤੇ ਦਿਲਬਾਗ ਚਾਵਲਾ, ਡਾਕਟਰ ਬਲਵਿੰਦਰ ਅਤੇ ਕੁਲਦੀਪ ਦੀਪਕ ਸਮੇਤ ਸਮੂਹ ਰੇਡੀਓ ਹੋਸਟਾਂ ਨੇ ਸਮੁੱਚੀ ਕਮਿਉਨਿਟੀ ਦਾ ਨਿਭਾਈ ਗਈ ਸੇਵਾ ਲਈ ਧੰਨਵਾਦ ਕੀਤਾ ਹੈ। ਸੇਵਾ ਫੂਡ ਬੈਂਕ ਦੀ ਪ੍ਰਬੰਧਕ ਜੋਤੀ ਬੇਦੀ ਨੇ ਆਖਿਆ ਹੈ ਕਿ ਇਸ ਦਾਨ ਨਾਲ ਗਰੀਬ ਤਬਕੇ ਦੇ ਲੋਕਾਂ ਨੂੰ ਜੀਵਨ ਨਿਰਬਾਹ ਲਈ ਪੇਸ਼ ਮੁਸ਼ਕਲਾਂ ਨਾਲ ਸਿੱਝਣ ਵਿੱਚ ਭਾਰੀ ਮਦਦ ਮਿਲੇਗੀ।